Read Quechua Bolivia DC Bible ISAÍAS 41 Bible Online

ISAÍAS 41 - Quechua Bolivia DC Bible bible

ISAÍAS 41

¹Mar qocha churuspi kaj runas ch'in kaychej; tukuy llajtas kallpachakuychej. Qayllamuspa allinta parlawaychej, jinamanta yachasunchej pichus cheqan kasqanta.

²Pitaj inti llojsimuynejmanta rijch'arichimorqa sapa thaskiypi atipaj reytari? Pitaj payman nacionesta jaywarqa, reyestataj kamachicherqari? Ajinamanta espadanwan flechanwan ima ñut'uta ruwanampaj, ch'aki laqhesta jinataj, wayrawan apachinampajri?

³Payqa, paykunata qhatiykun, ñantataj mana ima nisqalla pasarparin, manapis chakisninta ñanman chayachinmanchu karqa jina.

⁴Pitaj kay imasta ruwarqari? Pitaj qallariymantapacha runasta wajyarqa kausanankupajri? Chaytaqa noqa Señor, uj k'ata Dioslla ruwani, qallariymantapacha tukukuykama.

⁵Mar qochaj cantompi kaj llajtasqa payta rikorqanku, manchachikuywantaj mayta kharkatiterqanku, Jallp'apis uj cantonmanta uj cantonkama ikhakorqa. Ujllaman tantaykukuspa jamorqanku.

⁶Sapa uj imatachá ruwayta yachasqanwan yanapanakunku. Chay runa masintaqa: Kallpachakuy, nispa, kallpachan.

⁷Carpinteroqa qorita unuyachejta yanaparqa, martillowan llusk'achajpis yunquepi wajtajta yanaparqa, kay soldasqaqa allillan kashan, nispa. Chaymantataj lantitaqa sumajta jap'iykucherqa clavoswan, ama kuyuykachanampaj.

⁸Uyariway ari, Israel ayllu, Jacobpa ayllun. Qanqa kamachiy kanki. Qanta noqaqa kausaqey Abrahampa mirayninmanta ajllakorqayki.

⁹Qantaqa jallp'aj tukukuyninmantapacha pusamorqayki, karu jallp'api kashajtiyki wajyamorqayki, nerqaykitaj: Qanqa noqaj kamachiy kanki. Noqaqa ajllakorqayki manataj qhesacharqaykichu, nispa.

¹⁰Qanqa, ama manchachikuychu. Noqaqa qanwampuni kashani, Ama iskayrayaychu. Noqaqa kallpachasoj Diosniyki kani. Atipachej paña makiywan sayachisqayki, yanapallasqaykipunitaj.

¹¹Qanta tukuy chejnikusojkunaqa p'enqachisqas k'umuykachachisqastaj kanqanku, mana imananankutapis yachakonqankuchu. Qanwan maqanakojkunaqa manapis kankumanchu karqa jina tukukaponqanku.

¹²Qanqa enemigosniykita mask'anki, manataj tarinkichu. Qanwan ch'ajwata ruwarqanku chaykunaqa, manapis kankumanchu karqa jina chinkaponqanku.

¹³Noqaqa paña makiykimanta jap'isoj Señor Diosniyki kani, niykitaj: Ama manchachikuychu, noqa yanapasqayki, nispa.

¹⁴Ama manchachikuychu pisi kallpayoj Israel, Jacobpa ayllun. Noqa yanapajniyki kani. Noqa Israelpa Santo Diosnin, Salvadorniyki kani.

¹⁵Noqaqa rastrillota jina ruwasqayki, mosojta sumaj kirusniyojtataj. Qanqa orqosta trillaspa, ñut'uman tukuchinki, lomastapis ichhuta jina ruwanki.

¹⁶Chaymantaqa wayrachinki, wayrataj apakaponqa, muyoj wayrataj kayman jaqayman t'akaranqa. Qantaj Señorpi kusikunki. Israelpa Santo Diosninmantataj mayta kusisqa yuyarikunki.

¹⁷Wajcha runas, mana imayoj kajkunaqa yakuta mask'anku, manataj tarinkuchu. Yaku ch'akiywan siminkupis pharallaña kashan. Noqa Señortaj paykunata uyarisaj. Noqa Israelpa Diosnin, paykunataqa mana saqerpayasajchu.

¹⁸Ch'aki orqospi mayusta rikhurichisaj, vallespitaj yaku juturista. Ch'aki pampaspi yaku qochasta rikhurichisaj, ch'aki jallp'aspitaj yakusta t'ojyachisaj.

¹⁹Ch'in pampapi wiñachisaj cedrosta, acacia sach'asta, arrayanesta, olivosta ima. Ch'aki jallp'aspi wiñachillasajtaj pino sach'asta, ciprés sach'astawan.

²⁰Chayta ruwasaj tukuy runas rikunankupaj, allinta reparaspa umachakunankupaj, noqa Señor, atiyniywan kay imasta ruwasqayta, noqa Israelpa Santo Diosnin kay imasta rikhurichisqayta.

²¹Jacobpa reynin Señorqa nin: Nacionespa diosninkuna imatachus parlarinaykichejta rimariychej. Imachus kasqaykichejmanta parlaychej.

²²Jamuychej qhepaman, imaschus kananta willawayku. Qallariymantapacha imaschus pasarqa chaykunatapis, allinta tukuy sonqowan umachakunapaj. Willawayku ari, imaschus qhepaman kananta yachanaykupaj.

²³Allinta willawayku qhepaman imaschus kananta, ajinamanta yachanaykupaj cheqamanta qankuna dioskuna kasqaykichejta. Allintapis chayrí mana allintapis ruwaychej ari; t'ukunaykupaj, manchachikunaykupajpis.

²⁴Qankunaqa mana imachu kankichej, manataj imatapis ruwayta atinkichejchu. Chaynejta qankunata yupaychajkunaqa millachikuna kanku.

²⁵Patanejpi uj runata rikhurichini, payqa inti llojsimuymanta jamuspa sutiyta oqharin; kamachejkunataqa t'uruta jina saronqa, imaynatachus manka ruwajqa t'uruta sarun, ajinata.

²⁶Pitaj qallariymantapacha chayta willarqa, yachananchejpajri? Pitaj ñaupajmantapacha willarqa, chayqa cheqan ninanchejpajri? Chaqamanta mana pipis willarqachu, nitaj pipis yachacherqachu. Manataj pipis palabraykichejta uyarerqachu.

²⁷Kay palabrastaqa noqa qallariymantapacha Sionman willarqani, Jerusalenmantaj uj willajta kachamusaj. Payqa sumaj kusikuymanta willanqa.

²⁸Qhawarejtiy, mana chay dioskuna rikhurimunkuchu. Mana pi yuyaychajpis kanchu. Kay imasmanta tapurejtiypis mana pipis kutichiwaj karqachu.

²⁹Tukuyninku mana imapis kankuchu. Chaykunaqa mana imatapis ruwayta atinkuchu. Chay ruwasqanku lantisqa qhasi mana kaj ch'usajlla kanku.