Read Quechua Bolivia DC Bible ISAÍAS 45 Bible Online

ISAÍAS 45 - Quechua Bolivia DC Bible bible

ISAÍAS 45

¹Ajinata ajllasqa Ciroman Señorqa nin: Noqa qanqa paña makiykimanta jap'erqayki, ñaupaqeykipi nacioneswan kasuchikunaykipaj, tukuy reyesta munayniykipi apaykachanaykipaj. Ñaupaqeykipi punkusta kicharerqani, manataj saqerqanichu punkus wisq'akunanta.

²Noqa qampa ñaupaqeykita risaj, moqo moqosta khuskachasaj; broncemanta ruwasqa punkusta t'unarasaj, fierro barretastapis p'akirasaj.

³Ima kapuykunachus pakasqa kashan chaykunatapis noqa rikuchisqayki, maykunapichus pakasqa kashan chaykunata, noqa Israelpa Señor Diosnin kasqayta yachanaykipaj, sutiykimanta wajyasoj kasqaytawan.

⁴Kamachiy Jacobta munakusqayrayku, ajllasqay Israelrayku sutiykimanta wajyarqayki; mana rejsishawajtiykipis sumaj sutiwan suticharqayki.

⁵Noqamin Señorqa kani. Noqamanta astawan waj diosqa manapuni kanchu. Qan mana rejsishawajtiykipis noqa qantaqa sumajta sayacherqayki atipanaykipaj;

⁶tukuy yachanankupaj intej llojsimuyninmanta, intej chinkaykuyninkama, noqamanta astawanqa mana waj dios kasqanta. Noqa k'atalla Diosqa kani, astawanqa mana kanchu.

⁷Noqa ruwani k'anchayta, laqhayayta. Noqallataj ruwani sonqo tiyakuyta, llakiytapis. Noqa Señorlla chay tukuy imastaqa ruwani.

⁸Cielo, qanqa patamanta ch'ajchumuy, phuyus, qankunapis cheqanchayta parachimuychej; chaytataj jallp'aqa jap'enqa, chaywantaj jallp'aqa salvacionta cheqanchaytapis poqochun. Kay imastaqa noqa Señor ruwachini.

⁹Pichus ruwajninwan churanakojqa imanallanqachus! T'urumanta ruwasqakamalla k'aminakuyta atinkumanchu? T'uru mankaqa ruwajninta ninmanchu: Imata ruwashanki, chayri ninmantajchu ruwasqaykeqa mana allinchu, nispa?

¹⁰Manallataj pi runapis tatanta ninmanchu, Imapaj yumawankiri? Manallataj mamantapis ninmanchu: Imapaj nacechiwarqankiri?, nispa.

¹¹Israelitasta Ruwaj Señor Santo Diosqa kay jinata nin: Kunanqa tapuriway qhepaman imachus jamunan kashan chaymanta, wawasniy imatachus ruwanankumanta kamachiway, makisniywan imastachus ruwasqasniymantawan.

¹²Noqa jallp'ata ruwarqani, chaymantaj runata ruwaspa churarqani, cielota makisniywan qhatatarqani, kamacherqanitaj chayman qoyllurkuna rikhurimunankuta.

¹³Noqa rijch'arichini Cirotaqa cheqanta ruwaspa atipanampaj, may ñantachus purinasninta cheqanchapusaj; paymin llajtaytaqa watejmanta ruwapuwanqa, karuman apasqa kashanku chaykunatapis kacharichipuwanqa, mana qolqeraykuchu, nitaj imata munasqanraykuchu. Ajinata nin Tukuy Atiyniyoj Señorqa.

¹⁴Chanta israelitasman nillantaj Señorqa: Egiptoj campo runas, Etiopía qhatojkunapis, Sabá llajtamanta kaj; jatuchaj runas ima qanman k'umuykusonqanku, qampata kamachisniyki kanqanku. Qhepaykita cadenaswan watasqas renqanku. Cheqamanta ñaupaqeykiman qonqoriykukuspa mañakusonqa: Cheqamanta qampi Diosqa kashan, chay Diosmanta astawan waj Diosqa mana kanchu.

¹⁵Cheqamanta qanqa mana rikukoj Dios kanki, israelitasta salvaj Dios.

¹⁶Tukuyninku paykunaqa k'umuykachachisqas, p'enqachisqastaj kanqanku; jinallataj imaymana lantista ruwajkunapis may p'enqaypi rikhurenqanku.

¹⁷Señorqa israelitasta wiñaypaj salvarqa. Qankunaqa mana p'enqakunkichejchu, manataj k'umuykachankichejchu jayk'ajpis.

¹⁸Janaj pachata ruwaj Señorqa, payllataj Dios kay jallp'ata ruwaj, chay ruwasqanta sumajta sayachej, manataj qhasipajchu chay imasta ruwaj, chaypi tiyakunankupaj ruwajqa, nin: Noqamin Señorqa kani, noqamanta astawan wajqa mana kanchu.

¹⁹Noqaqa mana pakaypichu parlani, manataj jallp'api maynejpichus laqha kashan chaypichu. Jacobpa mirayninmanqa mana nerqanichu: Pejtusqa ukhupi mask'awaychej, nispa. Noqaqa Señor kani, cheqata parlani, cheqantataj imatapis willaykichej.

²⁰Tantakuspa jamuwaychej. Tukuy nacionespi kausashajkuna qayllamuwaychej. Maderamanta ruwasqa lantisninkuta oqharispa apajkunaqa mana yachankuchu imatachus ruwasqankuta. Mana salvayta atej diosmanta qhasi manakajllata mañakunku.

²¹Qankuna allinta parlaychej, ruwasqasninkuta rikuchiychej, munankichej chayqa ujkuna ujkuna tapunakuychej: Pitaj qallariymantapacha kay imasta ruwarqari? Pitaj unaymantapacha kay imasta willanri? Manachu noqa Señor chay imastaqa willarqaykichej? Noqamanta astawan waj diosqa mana kanchu. Cheqan Diosqa, tukuy imata atipajqa, manapuni ujpis kanchu; noqalla kani.

²²Noqaman jamuychej tukuy jallp'api tiyajkuna. Noqamin Diosqa kani. Noqa salvasqaykichej. Mana astawan wajqa kanchu.

²³Noqa kikiy juramentota ruwani, kikin simiymanta llojsin imatachus cheqanta ruwanay. Chay nisqayqa junt'akonqapuni. Chaytaj kay jina: Noqaman tukuypis qonqorikuwanqanku, sutiypitaj juraspa noqamanta nenqanku:

²⁴Cheqamanta Señorllapi kashan cheqanchayqa, kallpapis. Payllaman tukuypis jamonqanku, pikunachus contranta ruwarqanku chaykunapis may p'enqaypi rikhurenqanku.

²⁵Señorllapi tukuypi llimphuchasqas kanqanku. Chaypacha Israelpa miraynenqa mayta kusikonqanku.