Read Quechua Bolivia DC Bible ISAÍAS 47 Bible Online

ISAÍAS 47 - Quechua Bolivia DC Bible bible

ISAÍAS 47

¹Babilonia sipas, uraykuspa jallp'a patapi tiyamuy. Caldeo sipas, mana kamachinayoj kunanqa pampapi chukumuy. Kunanmantaqa, manaña sumaj k'acha llamp'u sonqo nisonqankuchu.

²Maran rumita jap'ispa jak'uta kutay; uma qhatanaykita qhatarakuy, qhoysu p'achaykita pataman oqharikuy, ujut'aykita lluch'ukuspa mayusta chimpay.

³Tukuy ukhuykipis q'alalla rikukonqa, p'enqayniykipis sut'ipacha kanqa, chaypacha aynita kutichisqayki. Mana pi runapis jark'awanqachu.

⁴Tukuy Atiyniyoj Señor, salvadorninchej, Israelpa Santo Diosnenqa, kay jinata nin:

⁵Caldea sipas, ch'inmanta chukuy, laqhayajman yaykuy; kunanmantaqa manaña jayk'ajpis nacionespa kamachejnin reina nisonqankuchu.

⁶Noqaqa mayta phiñakorqani Israel aylluypaj. Chaypacha Israel nacionniytaqa mana allimpajchu qhawarqani, makiykimantaj jaywarqayki. Qantaj mana khuyarispa ñak'arichipuwarqanki; kurajkunaj much'usninman qanqa chay chhika llasa yugoykita churarqanki.

⁷Qanqa nerqankitaj: Wiñaypaj noqaqa kamachejllapuni kasaj, nispa. Qanqa kay imasmanta mana yuyarerqankichu, manataj yuyarikorqankichu imaynapichus tukukunaykita.

⁸Chayrayku, kunanqa uyariy kayta, k'anchilla warmi. Kamachinaykipi kunanqa sumaj sumajta tiyarishanki, sonqoykipitaj nishayki: Noqalla kani. Noqamanta astawan wajqa mana kanchu. Mana noqaqa viudachu kasaj, manataj wawasniypis wañonqankuchu, nispa.

⁹Chay iskaynin llakiykuna ujllata uj p'unchayllapi qhatirisonqa, ujllapi mana wawasniyoj, mana qosayojtaj rikhurinki. Chay jina yatirisniyoj, layqasniyoj kashajtiykipis, chay llakiykunaqa kaymanta jinalla chayamusonqa.

¹⁰Qanqa sajra ruwasqasniykiman atienekuspa nerqanki: Mana pipis rikuwanchu, nispa. Qantaqa imatachus yachasqaykiwan, yachaynillaykiwantaj ch'aukiyasunku. Qantaj sonqoykipi nerqanki: Noqalla kani. Noqamanta astawan wajqa mana kanchu.

¹¹Mana, allin llakiypuni qanman jamusonqa. Chaytataj mana yachankichu maymantachus rikhurimusqanta. Mana allin kay chayamusonqa. Chaytataj mana imanayta atinkichu. Mana yuyashajtillayki chay tukuy ima ñak'ariykuna urmaykamusonqa.

¹²Kunanqa yatirisniykiwan layqasniykiwan, ima, kallaypuni. Chaykunata qanqa ruwachej kanki sipas kasqaykimantapacha. Ichapis allin risonqa, ichapis runaswan allimpi qhawachikuwaj ari.

¹³Ashkha yuyaychajkunawan sayk'usqaña kanki. Kunanqa qanta jark'akusuchunku, janaj pachata qhawajkuna, qoyllurkunamanta yachajkuna, killasta yupajkuna, ajinamanta qhepaman imaschus jamusunanta yachajkuna ima.

¹⁴Qhawariy. Chaykunaqa q'opa jinalla kanqanku. Ninataj paykunataqa ruphanqa, manataj nina larwaymanta ayqekuyta atinkuchu. Mana nina k'ajaj qhepakonqachu, manataj ninaj larwaynillampis chaypa qayllampi tiyaykuspa q'oñikunapaj kanqachu.

¹⁵Ajina kanqa chay layqaswan, sipas kasqaykimantapacha kausakorqanki chaykunawan. Chay runasqa sapa ujninku munasqankuman jina millay ñanninkuta purerqanku. Kunanqa mana pipis salvasojqa kanchu.