Read Quechua Bolivia DC Bible ISAÍAS 5 Bible Online

ISAÍAS 5 - Quechua Bolivia DC Bible bible

ISAÍAS 5

¹Kunanqa takirisaj munasqaypa sutimpi, uvas sach'asmanta takiysituta. Munasqaypata uvas sach'asnenqa uj kinraypi sumaj jallp'api karqa.

²Jallp'ata allarqa, rumisnintataj pallarqa, chaymantaj sumajnin kaj uvas k'aspista plantarqa. Chay uvas chajraj chaupimpitaj uj ch'ujllata ruwarqa, chaymantaqa ruwallarqataj uj uvas ch'irwanata. Munasqayqa suyarqa sumajta uvasnin poqonanta, chay tukuywampis k'allku uvasllata poqorqa.

³Kunanqa Jerusalenmanta, Judamantawan kajkuna, niychej ari, pitaj juchayoj? Uvas chajraychu, chayri noqachu?

⁴Imatawantaj ruwanay kanman karqa uvas sach'asniytari? Manachu allinta plantarqani? Noqaqa suyarqani uvasniy sumajta poqonanta. Imajtintaj k'allku uvasllata poqonri?

⁵Kunanqa, uvas sach'asniywan imanasajchus chayta nisqaykichej: Perqasninta thuñisaj, jinamanta chinkanqa, perqasninta urmarachisaj, tukuy sarunankupaj.

⁶Ch'impachata ruwasaj. Manaña puntasninta k'utonqankuchu, nitaj qhoranqankuchu. Khishkalla junt'aykonqa waj qhoraspiwan. Phuyusman nisaj amaña chaynejman paramunanta.

⁷Tukuy Atiyniyoj Señorpa uvas sach'asnenqa, Israelmin. Judapi kaj runasqa may munasqa uvas plantakusqan kanku. Señorqa suyarqa israelitas leyta junt'anankuta, astawanqa runa wañuchinakuyllata tarin; Payqa suyarqa imapis cheqan kananta, astawanqa nanaywan qhapariyllata tarin.

⁸Ay, imanallankichejchus ashkha wasista rantejkunaqa, ashkha jallp'asta rantejkuna, wajkunapajtaj mana imata saqenkichejchu, qankunallapis kay jallp'a patapi kawajchej qhapajyajkuna jina!

⁹Tukuy Atiyniyoj Señorqa niwan, ashkha wasis thuñisqas kananta; manañataj pipis chay wasispi tiyakunanta, jatuchajpis kachun, k'achituspis kachun.

¹⁰Kinsa hectárea uvasmanta uj yuru vinolla kanqa. Chunka carga trigo mujumanta uj kargu trigollata poqonqa.

¹¹Ay, imanallankichejchus tutamanta jatariytawan machajkunaqa; ch'isiyanankama machasqas, vino ujyaspalla kajkunaqa!

¹²Qankunaqa jatuchaj mikhuykunata wakirichinkichej, chaypitaj tocarinkichej arpasta, guitarrasta, cajasta, qenastawan. Qankunaqa ashkha vinota ujyarinkichej, manañataj qhawarinkichejchu Señorpa ruwanasninta, nitaj makisninwan ruwasqasnintapis.

¹³Chayrayku, aylloyqa mana yachakuyta munasqanrayku ch'in pampaman apachisqa kanqa. Tukuy runastaj kurajkunasninkuwan khuska yarqhaywan, ch'akiywantaj wañonqanku.

¹⁴Wañoyqa yarqhasqa siminta jatunta kicharin. Chayman chinkarenqanku qhapajkuna, runasnintin, paykunawan kusikojkunapis.

¹⁵Runasqa k'umuykachachisqas kanqanku. Mayta runaykachajkunapis k'umuykuchisqas kanqanku.

¹⁶Tukuy Atiyniyoj Señorqa cheqan kajta atiyninwan rikuchenqa, Santo Diosqa llimphu kayninta rikuchenqa cheqanta ruwaspa.

¹⁷Llajtasqa urmachisqas kanqanku, chay raqay ukhuspitaj ovejasta, cabrastawan michenqanku.

¹⁸Ay, qankunamanta llullakuspa sajra kajta qhatatejkunaqa, carretata jina qhatatinku juchata qhatatejkunaqa!

¹⁹Qankunaqa ninkichej: Diosqa usqhayta ruwachun imachus ruwanan kajta, noqanchej rikunanchejpaj. Israelpa Santo Diosnenqa usqhayllata junt'achun ruwanan kajta, noqanchej yachananchejpaj.

²⁰Ay, qankunamanta, mana allin kajta allin ninkichej, allin kajtataj mana allinchu ninkichej; k'anchaytaqa laqhaman tukuchinkichej, laqhatataj k'anchayman; Jaya kajta, misk'i ninkichej, misk'i kajtataj jaya ninkichej.

²¹Ay qankunaqa yachayniyoj kasqaykichejta creekunkichej, may yuyayniyoj kasqaykichejta yuyakunkichej!

²²Ay, qankunamanta vinota ujyanapaj wapu kajkuna, qankunataqa ni pipis ujyanasta wakichiypeqa atipasunkichejchu.

²³Qankunaqa lluk'inas kajtin juchayojta mana juchayojman tukuchinkichej, mana juchayojtataj juchachankichej.

²⁴Chayrayku, imaynatachus ninaqa ichhuta q'olaykun, larwaynintaj ch'aki laqhesta ujllata rupharparin, ajinata qankunaqa chinkarparinkichej. Saphinmanta ismoj yura jina, t'ikasnintaj ñut'u jallp'aman tukupun, ajinata. Qankunaqa Tukuy Atiyniyoj Israelpa Santo Diosnimpa kamachisqantaqa mana kasunkichejchu.

²⁵Chayrayku Señorqa ayllumpa contranta k'ajajta phiñakorqa, makintataj jasut'inampaj oqharerqa. Orqospis kharkatiterqanku, wañusqastaj callesnimpi q'opa jina wijch'usqas karqanku. Chay tukuywampis Señorpa k'ajaj phiñakuynenqa manaraj thasnukunrajchu, payqa jasut'inampaj makin oqharisqallapuni kashan.

²⁶Karupi kaj nación jamunampaj señasta ruwan, jallp'aj k'uchunmantataj silbaspa wajyan. Chay naciontaj ujllata ima jina usqhayllata chayarparimun.

²⁷Chay runasmanta ni mayqennimpis sayk'usqachu, nitaj misk'akunchu. Mana mayqempis puñunchu, nitaj puñuyta k'aywinchu. Tukuyninku sumaj chumpisqas kanku, ujut'asninkoj watusnimpis mana p'itikunchu.

²⁸Flechasninkoqa sumaj filochasqas, arcosninkoqa sumaj mat'isqas. Caballosninkoj chakisnenqa rumi jina, carretasninkoj ruedasnenqa muyoj wayraman rijch'akun.

²⁹Qhaparisqankoqa leompaj qhaparisqan jina, uña león aychaman ch'ipaykukuspa qhaparin jina, sumajta qhaniykuspataj apan nitaj pipis qhechuyta atinchu.

³⁰Chay nacionqa chay p'unchaypi chayamuspa manchayta Israelpa contranta sonanqa mar qocha jina; pillapis jallp'ata qhawarejqa llakiywan laqhayaykushajta rikonqa, cielopi k'anchajkunatapis laqhayaykushajta.