Read Quechua Bolivia DC Bible ISAÍAS 50 Bible Online

ISAÍAS 50 - Quechua Bolivia DC Bible bible

ISAÍAS 50

¹Señorqa nin: Ama yuyaychejchu mamaykichej Israel aylluyta qharqosqayta, uj runa warminta wijch'un jinataqa. Chayrí, yuyankichejchu mayqen manu runayman vendeykususqayta? Qhawariychej, qankunaqa sajra juchaykichejrayku vendechikunkichej. Diospa contranta oqharikusqaykichejrayku mamaykichej Israelqa wijch'usqa karqa.

²Imaraykutaj jamuspaqa mana pitapis tariparqanichuri, wajyashajtiypis mana pipis uyariwarqachuri? Ima kajtimpis chaymanta orqhonaypaj makeyqa p'akisqachu karqa? Manañachu atiyneyqa kasqa paykunata orqhonaypaj? Ujta k'amispa mar qochasta ch'akichini; chaypi kaj challwaspi yakumanta jina wañuraspa asnanankupaj.

³Cielotaqa laqhayajwan p'achallichini, llakiy p'achaswan jina qhataykuni.

⁴Señorqa yachayniyojkunaj yachayninta qowarqa, imaynamantachus sayk'usqasman parlanayta. Sapa paqarin uyarichiwan; ajinamanta yachachisqan jina sumajta uyarinaypaj.

⁵Señorqa ningrisniyta kichariwarqa, noqarí mana k'ullukorqanichu, nitaj qhepamampis kutirerqanichu.

⁶Seq'owajkunasmampis wasayta qorqani, sunkhayta t'irarichikullarqani, may jinata toreashawajtinkupis, thoqashawajtinkupis manapuni uyaytaqa pakarqanichu.

⁷Señormin noqataqa yanapawanqa, chayrayku toreawasqankoqa mana nanachiwanchu; sumajta uj chhanka jina sayani yachanitaj mana p'enqachisqachu kanayta.

⁸Jark'awajqa qayllallaypi kashan. Pillapis contraypi kanchu? Jaku rinachej ari juezpa ñaupaqenman. Pitaj noqata ch'ataykuwajri? Qayllaykamuwaspa niwachun.

⁹Señorniy noqataqa yanapawanqa; pitaj juchachawanqari? Tukuyninku chinkaponqanku, imaynatachus thutaj tukusqan p'acha mullphaspa chinkapun ajinata.

¹⁰Mayqellampis Señorta manchachikojkuna, kamachimpa parlasqasninta uyarejkuna. Pikunachus laqhayajpi purejkuna, Señorpa sutimpi atienekuychej. Diosniykichejpi atikuychej.

¹¹Qankunaqa tukuy ninata jap'ichejkuna, nina k'anchayta apaykachajkuna; chay nina jap'ichisqaykichejman urmankichej, ima k'anchaykunastachus jap'ichikunkichej chaykunallamantaj; llakiywantaj tukukunkichej. Kay jasut'itaqa Señorpuni apachimusonqachej.