Read Quechua Bolivia DC Bible ISAÍAS 53 Bible Online

ISAÍAS 53 - Quechua Bolivia DC Bible bible

ISAÍAS 53

¹Mana pipis creenchu kay willasqaykutaqa; manallataj pipis Señorpa atiynintaqa repararqachu.

²Chay runaqa Señorpa ñaupaqempi uj ch'illchisqa sach'a jina wiñarqa, uj ch'aki jallp'api saphi jina. Mana k'achituchu karqa payta qhawananchejpajqa, nitaj k'acha uyayojchu karqa payta munakunanchejpajqa.

³Runaqa payta qhesacharqanku, qhawarqanku. Payqa imaymana nanayta, ñak'ariyta, llakiyta ima yacharqa. Paymanta uyanchejta pakakorqanchej, payta qhesacharqanchej. Mana paytaqa kasuta ruwarqanchejchu.

⁴Chaywampis, payqa nanayninchejta aparqa, llakiyninchejtawan. Noqanchejtaj yuyarqanchej paytaqa Dios jasut'ispa ñak'arichisqanta mayta k'umuykachachisqantataj.

⁵Payqa nanachisqa karqa Diosta mana kasusqanchejrayku. Juchanchejrayku tukuy ukhun t'unasqa karqa. Pay jasut'ita jap'ikusqanrayku sonqo tiyakuyta apamuwarqanchej, chay jina k'irisqa kasqanwantaj jampisqas kanchej.

⁶Tukuyninchej ovejas jina chinkaraporqanchej, sapa ujpis ñanninkutakama riporqanku. Chaywampis Señorqa tukuyninchejpa juchasninchejta payman q'epiricherqa.

⁷Payqa may jina maqasqa, llakichisqataj karqa, mana simillantapis kicharerqachu. Payqa oveja jina ñak'anaman apasqa karqa; imaynatachus oveja millmanta ch'inllamanta ruthuchikun, ajinata mana siminta kicharerqachu.

⁸Payqa wisq'asqa, juchachasqataj qhasillamanta rikhurerqa, manataj pipis paymantaqa sayakorqachu. Pitaj paymanta dakunri? Payqa jallp'a patamanta qhechusqa karqa, aylluypa juchasninrayku wañuchisqa karqa.

⁹Paytaqa juchasapaswan khuska p'ampaykorqanku; qhapaj runaspa p'ampakunan qayllapitaj. Payqa mana ima sajratapis ruwarqachu, nitaj siminmanta uj llulla palabrallapis llojserqachu.

¹⁰Chay tukuywampis, Señorqa ñak'arichiyta munarqa. Pay kikin kausayninta jucharayku rikuchikuta jina jaywaykukorqa. Chayrayku payqa mirayninta rikonqa, unaytataj kausanqa, paynejtataj Señorpa munaynenqa junt'akonqapuni.

¹¹Chay jina llakiyta jap'ispa kusiy poqoyta rikonqa, may kusisqataj qhepakonqa. Chay yachayninwan cheqan kamacheyqa ashkhasta salvanqa, paykunaj juchasninkutataj apanqa.

¹²Chayrayku atiyniyojkunamanwan khuska chayaqenta qopusaj. Chaymanta payqa atipajkunaj t'inkanta jap'ikaponqa, pay kikin wañuyman jaywakusqanrayku. Payqa juchasapaswan khuska yupasqa karqa, tukuypa juchasninta apaspa, Diosmantataj chay juchasapaspaj mañapuspa.