Read Quechua Bolivia DC Bible ISAÍAS 54 Bible Online

ISAÍAS 54 - Quechua Bolivia DC Bible bible

ISAÍAS 54

¹Señorqa nin: Jatunmanta kusikuy ari mana wawa rejsej warmi, mana wachakoj warmi. Jatunmanta takispa kusikuy mana onqokuyta yachaj warmi. Wijch'usqa warmejtaraj ashkha wawasnenqa kanqa, casada warmejmanta nisqaqa.

²Astawan toldoykita jatunyachiy, tiyanaykej cortinasninta jatunman aysatatay. Chay toldoykita jap'ichinayki waskastapis astawan jatunyachiy, ch'akarpusnintapis sumajta takaykuy.

³Lloq'emantaj pañamantaj jatunyanki; mirayniykeqa nacionesta jap'ikaponqanku. Chay saqerasqa ch'in llajtasman junt'anqanku.

⁴Ama manchachikuychu ari. Qanqa mana ch'aukiyasqachu kanki. Ama qanqa p'enqakuychu, manamin p'enqachisqachu kanki. Qanqa qonqapunki sipas kashaspa p'enqakoj kasqaykita, jinallataj viuda kashajtiyki qhesachasusqankutapis.

⁵Qanta ruwasorqa chaymin qampa qosaykeqa; sutintaj Tukuy Atiyniyoj Señor; Israelpa Santo Diosninmin kacharichisojniykeqa. Payqa tukuy kay pachapi kajkunaj Diosninku.

⁶Qanqa sipaspacha wijch'usqa may llakisqa warmi jina karqanki. Chaywampis, Señorqa watejmanta wajyakapusorqa. Ajinatataj nisunki:

⁷Noqaqa pisi p'unchaykunasllata saqerparerqayki, chaywampis jatun khuyakuyniywan jap'ikapullasqaykitaj.

⁸Uj pisita phiñakuspa qanmanta uyayta pakarqani; chaywampis wiñaypaj munakuyniywan qantaqa khuyarqayki. Ajinata salvajniyki Señorqa nisunki.

⁹Kay imastaqa Noéj p'unchaynimpi jina ruwasaj. Chaypacha juraspa nerqani manaña jayk'ajpis yakoqa jallp'ata p'ampananta. Ajinata kunanqa juraspa nini manaña ujtawan qampaj phiñakunayta, manañataj k'amisunayta.

¹⁰Khuyakoj Señorniykeqa nisunki: Tukuy orqosqa kuyurenqanku, lomaspis kharkatitenqanku; munakuyniyrí qanmantaqa manapuni t'aqakusonqachu, sonqo tiyakuy tratota ruwasqanchejpis manapuni p'akikonqachu.

¹¹Wajcha, llakiywan ñak'arej llajta, sinch'i wayrawan jasut'isqa, ni pi sonqochajniyojtaj. K'acha rumis patapi sayachisqayki, cimientosniykipis zafiromanta kanqa.

¹²Torresniykita rubí nisqa rumismanta ruwasaj, wasi punkusniykitapis berilo nisqa rumismanta ruwapusqayki, perqastapis muyurichipusqayki lliphipej rumismanta.

¹³Tukuynin wawasniykiman Señorqa yachachipusonqa; chay wawasniykej kusiynintaj may jatun kanqa.

¹⁴Cheqan kajwan sumaj sayachisqa kanki; ñak'ariymanta karunchakunki, manañataj manchachikunkichu, imaraykuchus manchachikoyqa manaña qanman qayllamusonqachu.

¹⁵Pichus qanta maqaj sayaykamusonqa chayqa, mana noqaj kamachisqaychu. Pillapis qampa contraykipi jatarejqa ñaupaqeykipi urmanqa.

¹⁶Qhawariy, noqa herrerotaqa ruwani, paytaj ninata phukuspa k'ajachin. Chaypi unuyachispataj payqa llank'anampaj herramientasta ruwan. Noqallataj thuñej runastaqa thuñinampaj ruwani.

¹⁷Mana mayqen arma ruwasqankupis qantaqa chinkachisonqachu, pichus contraykita parlajtaqa juezpa ñaupaqempi ch'inyachillankipuni. Kay imasta noqaqa kasuwaj kamachisniymanqa qoni, atipayninkupis noqamanta llojsenqa, nispa Señorqa nin.