Read Quechua Bolivia DC Bible ISAÍAS 55 Bible Online

ISAÍAS 55 - Quechua Bolivia DC Bible bible

ISAÍAS 55

¹Tukuy ch'akichikojkuna jamuychej yakuta ujyaj. Mana qolqeyojkuna jamullaychej, mikhullankichejtaj. Mana qolqellawan jamuspa jap'ikullaychej vinota, lechetapis.

²Imaraykutaj qolqeykichejta tukunkichej mana mikhuna kajllapi? Imaraykutaj pagoykichejta tukunkichej mana sajsachej imaspiri? Uyariwaychej allinta, allin kaj imastataj mikhunkichej. Chay imastaqa misk'ejta mikhunkichej.

³Ningriykichejwan sumajta uyariwaychej, noqamantaj qayllamuwaychej. Uyariwaychej ari kausanaykichejpaj. Qankunawan wiñaypaj uj tratota ruwasaj, imatachus munakuyniywan Davidman nerqani, chayta junt'aspa.

⁴Noqa paytaqa nacionesman willajta churarqani; chantá kamachejta, yachachejta ima.

⁵Qanqa mana rejsisqa runasta wajyanki, qanta mana rejsisoj runaspis corremusonqanku, Señor Diosniykirayku, noqa Israelpa Santo Diosnin qanta allimpaj qhawasusqayrayku.

⁶Señorta mask'aychej kunan tariyta atishaspa; kunan qayllapi kashajtin, Diosta wajyakuychej.

⁷Juchasapaqa sajra puriyninta saqechun. Sajra runaqa imatachus yuyasqasninta saqechun. Señorman kutirichun, imaraykuchus paymanta khuyakonqa. Diosman kutirichun. Payqa perdonanqapacha.

⁸Señorqa nin: Noqaj yuyasqasneyqa, mana qankunaj yuyasqaykichej jinachu; manataj ñanniykichejpis noqaj ñanniy jinachu.

⁹Imaynachus janaj pachaqa jallp'amanta aswan patapi, ajinallataj ñanneyqa ñanniykichejmanta aswan patapi; jinallataj qankunaj yuyasqasniykichejmanta, noqaj yuyasqayqa aswan patapi.

¹⁰Imaynatachus parawan rit'iwan patamanta uraykamuspa, manaña pataman kutirinchu, mana chayqa jallp'ata joq'ochan, chayman tarpusqatataj poqochin, mikhunapaj.

¹¹Ajinallataj kanqa noqaj simiymanta llojsej palabraqa. Mana noqaman jinallachu kutimonqa, manachayqa imatachus noqa munasqayta ruwanqa, imatachus noqa nerqani chayta junt'anqa.

¹²Qankunaqa kusisqas jaqaymanta llojsimunkichej, sonqo junt'asqastaj kutimunkichej. Orqoswan, lomaswanqa qankunaj ñaupaqeykichejpi maytapuni takirenqanku. Tukuy campopi sach'aspis mayta t'ajllarikonqanku.

¹³Khishkaspa cuentanmanta pino sach'as wiñanqa, itapallospa cuentanmanta arrayán sach'a wiñanqa. Chayqa kanqa uj señal Señorpa sutinta wiñaypaj yuyarikunapaj, ni jayk'aj qonqasqa kanampaj.