Read Quechua Bolivia DC Bible ISAÍAS 6 Bible Online

ISAÍAS 6 - Quechua Bolivia DC Bible bible

ISAÍAS 6

¹Rey Uziaspa wañupusqan watapi, Señorta rikorqani uj sumaj alto trono patapi tiyashajta, p'achampa cantosnintaj yupaychana wasiman junt'aykorqa.

²Paypa patampitaj Serafín nisqa ángeles kasharqanku, sapa ujnintaj sojta lijrasniyojkama karqanku, iskay lijrasninkuwanqa uyasninkuta pakakorqanku, iskaywantaj chakisninkuta, iskaywantaj phawarqanku.

³Purajmantataj ninakorqanku: Santo, santo, santo Tukuy Atiyniyoj Señorqa; tukuy kay pachaqa lliphipiyninwan junt'a kashan, nispa.

⁴Chay jinata qhaparisqankuwan Diosta yupaychana wasej punkusnin kharkatiterqa, chay ukhumantaj q'osñi junt'aykorqa.

⁵Noqataj nerqani: Ay, noqamanta, kunanqa wañusajchari! Kikin ñawisniywan Tukuy Atiyniyoj Señorta rikuni, kay jina ch'ichi simi runa kanaypaj, kay jina ch'ichi parlayniyoj runaspa chaupimpi kashaspa.

⁶Chantá, ujnin kaj lijrayojqa ujllata noqaman phawamuwarqa, altarmanta tenazaswan nina brasasta oqhariykukuspa.

⁷Chaywan simiyman churawaspataj niwarqa: Qhaway, kay ninaqa simiykiman chayan. Kunanqa juchaykeqa qhechusqa, juchaykimanta llimphuchasqataj kanki.

⁸Chaymantataj Señorta nishajta uyarerqani: Pitataj kachasajri? Pitaj palabrasniykuta willamonqari?, nispa. Chantá noqataj nerqani: Kaypi kani Señor, noqata kachaway ari, nispa.

⁹Paytaj niwarqa: Riy, kay jinata chay runasman willamuy: Allinta uyarishaspapis, mana yachayta atinkichejchu, rikushaspapis manallataj unanchayta atinkichejchu.

¹⁰Kay runaspa sonqonkuta rumiyachiy; ningrisninkuta wisk'aykuy, ñawisninkutapis ciegoyachiy, chay jinamanta ama rikunankupaj, ama uyarinankupaj, nitaj unanchanankupaj; ama kutirikunankupaj, noqa paykunata mana thañichinaypaj.

¹¹Noqataj taporqani: Señor, mashkha unaytataj kay kanqari?, nispa. Paytaj niwarqa: kayqa kanqa llajtas chinkachisqa kanankama, mana uj runayoj kanankama, wasis mana runayoj kanankama, chay campospis ch'in qhepakunankama;

¹²Señor runasta karuman apachinankama, chay jallp'a ch'impacha kanankama.

¹³Sichus chunkamanta ujllapis qhepakunman, chaypis chinkachisqallapuni kanqa. Imaynatachus roble sach'ata, encina sach'atapis k'utojtinchej k'ullullanña qhepakun, ajinata qhepakonqa chay ajllasqay aylloqa.