Read Quechua Bolivia DC Bible ISAÍAS 60 Bible Online

ISAÍAS 60 - Quechua Bolivia DC Bible bible

ISAÍAS 60

¹Sayarikuy, lliphipiy, imaraykuchus k'anchayniykeqa llojsimunña, Señorpa k'anchaynenqa qanman chayamusunkiña.

²Kay pacha tukuynejta laqhaykonqa, jinallataj nacionestapis. Chaywampis Señorpa k'anchaynenqa pataykipi kanqa. Chay Señorpa k'anchaynenqa qannejta k'ancharenqa.

³Tukuy naciones qampa k'anchayniykipi purenqanku, reyestaj chay k'anchayniykej lliphipiynimpi.

⁴Muyuyniykita qhawarikuy. Kaykunaqa ujllaman tantaykukuspa qanman kutimpusunku. Wawasniykeqa karu llajtasmanta jamusunku, warmi wawasniykitapis mark'api apampushanku.

⁵Chaypacha qanqa paykunata qhawarispa sumajta k'ancharinki; sonqoykipitaj maytapuni kusikunki. Qanman mar qocha cantospi kajkuna, tukuy nacionespa qhapajyaynimpis qanman chayachimonqanku.

⁶Ashkha camellos junt'aykamusonqanku, jinallataj dromedarios sutiyoj camellospis Madianmanta, Efamantawan. Tukuy Sabamanta kajkuna apamonqanku qorita, inciensotawan, Señorpa sutintaj maytapuni yupaychanqanku.

⁷Cedarmanta tukuy ovejaspis qanman tantaykakamusonqanku; Nebaiotmanta carnerospis rikuchikuta altarniypi jaywanaykipaj kanqa; chaykunawan kusikuna wasiyta astawan k'achanchasaj.

⁸Pikunataj kaykuna kanku phuyu jina oqharikojkuna, palomas jina wasinkuman phawaykachajkunari?

⁹Cheqamanta noqata mar qocha cantosmanta kajkuna suyashawanku, Tarsismanta kaj buques wawasniykiman qolqesninkuta, qorisninkutawan apamunku. Israelpa Santo Diosnimpa sutinrayku qhawachisunki, chay Señor Diosniykej sumajpaj qhawasqa kasqanrayku.

¹⁰Jinamanta karu llajtayojkuna perqasniykita ruwapusonqanku, reyesninkupis kamachisqaykita ruwanqanku; imaraykuchus phiñakuspa jasut'erqayki. Chaywampis khuyakoj sonqoyoj kasqayrayku qanta khuyasqayki.

¹¹Punkusniykeqa tuta p'unchay kichasqallapuni kanqanku. Qanman tukuy naciones kapuyninkuta apamunankupaj, jinallataj reyesninkupis chayman pusamusqa kanankupaj.

¹²Chayrayku mayqen nacionchá, chayri ima llajtachá qanta mana kasuyta munanqachu chayqa, chinkachisqa, ch'inyachisqataj kanqa.

¹³Libanopi aswan sumaj kaj imasnenqa qanman jamusonqa, ciprés sach'as, pino sach'as ima. Chaywan ajllakusqay cheqata k'achanchapunawampaj, maypichus noqa tiyakuni chayta sumaj k'achanchasqa kanampaj.

¹⁴Llakichisojkunaj wawasnenqa, llamp'u sonqoman tukuspa jamusonqanku; ñak'arichisorqachej chaykunaqa chakisniykiman k'umuykamusonqachej. Israelpa Diosnimpa ayllun, Señorpa ayllun, nispa sutichasonqankutaj.

¹⁵Qanqa chay jina wijch'usqa chejnisqataj karqanki, qan chaynejta mana pipis pasayllatapis munajchu. Kunanqa sumajyachisqayki tukuy kusikunankupaj.

¹⁶Waj nacionespaj lechenta ujyanki, reyespa kapuyninwan kausanki. Chaypacha rejsiwanki noqa Señor salvajniyki, imamantapis orqhosojniyki, Jacobpa kallpachajnin ima kasqayta.

¹⁷Chayman apamusqayki broncemantaqa qorita, fierromantaqa qolqeta, maderamantaqa bronceta, rumispa cuentanmantataj fierrota. Kamachisojpa cuentanmanta, ñak'arichisojpa cuentanmantawan, sonqo tiyakuyta justiciatawan churapusqayki.

¹⁸Llajtaykipeqa manaña ñak'arichinasmanta parlanqankuchu, manataj urmachinasmanta, nitaj thuñinasmantapis; manachayqa perqasniykita salvación nispa sutichanki, punkusniykipitaj Señorta yupaychaykuna k'askachisqa kanqa.

¹⁹Chaypacha mana intichu, nitaj killachu k'anchamusonqa, mana chayqa kikin Señorpuni wiñaypaj k'anchamusonqa; kikin Diosniyki k'anchayniykeqa kanqa.

²⁰Intiykeqa mana jayk'ajpis yaykuponqachu, nitaj killa wañupis kanqachu. Wiñaypaj Señorlla k'anchayniykeqa kanqa, llakisqalla purinayki p'unchaykunapis tukukaponqa.

²¹Llajtaykipi runasqa tukuy imata cheqantapuni ruwanqanku; jallp'ata chayaqenkupaj wiñaypaj jap'ikonqanku, ajinamanta makisniywan ruwasqasniy ch'illchimojkuna noqata yupaychanawankupaj.

²²Aswan juch'uy kaj runaqa waranqata miranqa, aswan mana kasuy runapis uj jatun nacionman tukonqa. Noqa Señorman chaytaqa nini. Chay imasqa usqhayta junt'akonqapuni.