Read Quechua Bolivia DC Bible ISAÍAS 63 Bible Online

ISAÍAS 63 - Quechua Bolivia DC Bible bible

ISAÍAS 63

¹Pitaj kay puka p'achayoj Edonmanta, Bosramanta jamushanri? Pitaj kayri, atiyniyoj jina puka p'achata churakojri? Noqa kani, cheqan kajta willaspa atiywan salvanaypaj.

²Imajtintaj p'achasniykeqa chay jina pukari, uvas ch'irwanapi sarojkunaj p'achan jinari?

³Arí, noqalla uvas ch'irwanapeqa saruni. Mana pipis noqawan llajtaymanta saroj karqachu. Arí, phiñakuyniywan sarorqani, may phiñakuyniy paykunata taripan. Chayrayku chaypi yawarninku p'achayman ch'allpaykamuwan, ajinamanta tukuy p'achay pukachasqa.

⁴Mayk'ajchus ayni kutichinayqa sonqoypiña karqa, t'ustita ruwanay p'unchayqa chayamun.

⁵Qhawarerqani, mana pipis yanapawaj karqachu. Mayta t'ukorqani mana pipis paykunaman kutikoj kasqanmanta, ajinapi makisniywan munasqayta ruwarqani, k'ajaj phiñakuyniywan imatachus nisqayta junt'arqani.

⁶K'ajaj phiñakuyniywan chay runasta t'usterqani. Phiñakuywan tukucherqani. Yawar mayusta puriricherqani.

⁷Noqaqa Señorpa khuyakuyninmanta yuyarikusajpuni, Señorta yupaychanasmanta, Señorpa kamachiwasqanchejman jina; chay jina atiyninta israelitasman rikuchisqanmanta, jatun khuyakuyninta, munakuynintataj rikuchiwasqanchejmantawan.

⁸Señorqa nerqa: Cheqamanta noqaj aylluy kanku, mana llullakoj wawas kanku, noqataj paykunata salvarqani, nispa.

⁹Israelitas llakisqa kashajtinku, paypis llakisqallataj karqa, angelnintaj paykunataqa orqhomorqa. Munakuyninwan khuyakuyninwantaj paykunataqa librarqa, unaymantapacha sapa p'unchay waqaychaspa pusamorqataj.

¹⁰Chaywampis paykunaqa mana kasukuspa, Santo Espiritunta phiñacherqanku; chayrayku paykunaj contranta phiñarikorqa, paykuna kikinwan maqanakuspa.

¹¹Chaypacha payqa kamachin Moisesmanta, ayllun israelitasmantawan yuyarikorqa nerqataj: Maytaj kunan mar qochamanta wicharichimusorqachej, ovejasta jina michejnintawan khuska, chayri? Maytaj kunan Santo Espiritunta israelitaspa chaupinman churarqa chayri?

¹²Maytaj kunan Moisespa ñaupaqenta atiynimpa k'anchayninwan pusakorqachej chayri; pichus paykunaj ñaupaqempi yakuta iskayman t'aqarqa chayri, ajinamanta atiyniyoj kasqanta wiñaypaj rikuchejri?

¹³Maytaj kunan chay jina mana purinasta pusaykachajri, caballo jina ch'in pampasta, mana imamampis misk'achispa pusaykachajri?

¹⁴Paykunataqa vallesman uraykamoj uywasta jina Señorpa Espíritun micherqa. Ajinata qanqa israelitasniykita pusaykacharqanki, tukuynejpi mentasqa kanaykipaj.

¹⁵Qanqa janaj pachamanta qhawarimuy, k'acha tiyakunaykimanta allinta qhawariy. Qanllata munakusunankuta munasqaykeqa maytaj kunanri? Chay atiyniyki, sonqoykipis manañachu t'impurin, khuyakuykunasniykipis manañachu noqapaj tiyan? Manañachu sonqoykimanta khuyakoyqa llojsimuyta atin?

¹⁶Qanlla tataykoqa kanki, Abraham tataykuta, mana rejsiwaykuchu. Israelqa mana yuyarikuwaykuchu. Qanlla tataykoqa kanki Señor. Noqaykoj wiñay salvawajniyku sutiyoj nisqa kanki.

¹⁷Imajtintaj, Señor, ñankunasniykimanta pantachiwaykuri, qanta manchachikunaykumantapis sonqoykuta rumiyachiwaykuri? Kay kamachisniykita munakusqaykirayku, chayaqeyki aylluykitawan, qhawarimuwayku ari.

¹⁸Pisi p'unchaykunallapaj Santo llajtaykeqa jap'erqa, Enemigosniykutaj yupaychana wasita saruranku.

¹⁹Noqaykoqa qanman jamuyku, mana jayk'ajpis kamachejniyoj jina; runasqa mana rejsiwaykuchu sutiykimanta.