Read Quechua Bolivia DC Bible ISAÍAS 66 Bible Online

ISAÍAS 66 - Quechua Bolivia DC Bible bible

ISAÍAS 66

¹Señorqa nin: Janaj pachaqa noqaj tiyanay, kay pachataj chakisniypa sarukunan. Maytaj wasita ruwapunawaykichej karqa chayri, maynejpitaj noqaqa samarikusajri?

²Makiy kay tukuy imastaqa ruwarqa. Chayrayku kay imasqa karqa, nispa Señorqa nin. Chanta nillantaj, pichus llamp'u sonqoyoj kanqa chayta noqaqa qhawasaj, mayqenchus k'acha sonqoyoj kaspa palabrasniytapis uyariwanqa chayta.

³Pichus uj wakata ñak'aspa rikuchikuta apamuwajqa, uj runatapis wañuchishanman jina. Uj ovejata wañuchispa rikuchikuta apamojqa, alqotapis apamunman jina. Rikuchikuta apamojqa, khuchej yawarnintapis apamunman jina. Inciensota q'osñichejqa, lantimampis jaywashanman jina. Paykunaqa sapa ujninku imatachus munasqankuta ajllakunku, sonqonkoqa sajrallatapuni munan.

⁴Noqapis paykunapaj uj ñak'ariyta ajllapusaj, imatachus manchachikusqankuta paykunaman apachimusaj. Noqaqa wajyarqani, manataj pipis uyarimuwanchu. Parlapayarqani manataj pipis kutichimuwanchu, mana chayqa rikunayta sajrallata astawan ruwanku, imatachus mana rikuyllatapis munasqaytapuni paykunaqa ajllakunku.

⁵Señorpa palabranta uyariychej, kharkatitejkuna palabrasninta uyarispa, chaykuna. Qankunaj wauqesniykichej chejnikusunkichej, noqaj sutiyraykutaj jawaman qharqospa nisunkichej: Señorqa jatunchasqa kachun, nispa. Chaywampis Diosqa qankunaman kusikuyta rikuchenqa, paykunataj mana imanakuyta atenqankuchu.

⁶Imaynatachus llajta manchayta qhaparin, Diosta yupaychana wasipipis manchay qhapariy uyarikun, ajinata Señorqa qhaparichenqa enemigosninman aynita kutichispa.

⁷Manaraj onqokunampi wawata nacichinña, manaraj wijsa nanay jap'ishajtin, uj qhari wawata nacichinña.

⁸Pitaj chay jinata uyarinman karqari? Pitaj chay jinata rikunman karqari? Jallp'aqa ajinatachu uj p'unchayllapi nacichinman? Uj nación ajinatachu ujllapi rikhurimunman? Ajina Sión llajtaqa ujllata nanay jap'ejtinkama wawasnintaqa nacichikumpacha.

⁹Noqa ajinata onqochejqa, manachu kunan nacichichiyman?, nispa Señorqa nin. Noqa ajinata paqarichishaspaqa, nacinanta jark'aymanchu karqa?, nispa Diosniykeqa nin.

¹⁰Jerusalenwan khuska mayta kusirikuychej, payta munakojkuna. Tukuy payrayku llakiywan waqajkuna kusisqa kakuychej.

¹¹Chay jinamanta payta ñuñunaykichejpaj, kusiyninwan sajsakunaykichejpaj; lechenta ujyaspa, chay jina k'anchaynin ukhupi kakunaykichejpaj.

¹²Señorqa ajinata nin: Noqa chay llajta ukhunman sonqo tiyakuyta churani uj mayuta jina, tukuy nacionespa kusiynintawan mayu yakupis llump'irishanman jina. Chaynejta qankunaqa ñuñoj wawas jina kusikunkichej, makisninwan ichurikusonqachej, arphin patapitaj chhukusonqachej.

¹³Imaynatachus mamaqa wawanta kusichin, ajinallatataj noqapis qankunataqa kusichisqaykichej; chay kusiytaqa Jerusalempi tarinkichej.

¹⁴Chayta rikuspa mayta kusikunkichej; tullusniykichejqa sumajta kallpachakonqanku, imaynatachus qhoras q'omeryanqanku ajinata. Señorpa makimpa atiyninta kamachisnenqa sumajta rejsinku, enemigosninmantaj phiñakuyninta rikuchenqa.

¹⁵Señorqa ninawan jamonqa, carretasnenqa maqanakunapaj llojlla para jina jamonqa, manchay k'ajaj phiñakuyninwan jasut'inampaj. Ajinata paypa k'amiynenqa nina larway jina kanqa.

¹⁶Señorqa ninawan espadawantaj tukuyta cheqanchanqa, jinamanta Señorpa wañurachisqasnenqa ashkha kanqa.

¹⁷Llimphuman tukojkunaqa, huertaspi llimphuchakojkuna, qhepampi qhepampi sayajkuna, pikunachus khuchi aychata mikhojkuna, katari aychasta, juk'uchastapis, chaykunaqa cantollamanta wañonqanku, nispa nin Señorqa.

¹⁸Rejsini paykunaj ruwasqasninkuta, imatachus yuyasqankutapis. Uj p'unchay chayamonqaña tukuy nacionesta, ima parlayniyojchus kajkunatapis ujllaman tantanapaj. Chaypi jamuspa noqaj k'anchayniyta rejsenqanku.

¹⁹Paykunaj chaupinkuman uj señalta churasaj. Paykunamanta ujnin ayqekoj kajtataj kay nacionesman kachasaj: Tarsisman, Libiaman, flechayta yachaj Lidiaman, chantaqa, Tubalman, Greciaman, mar qocha cantospi karupi tiyakojkunaman. Paykuna noqamanta mana yachankuchu, manataj k'anchayniytapis imaynachus kasqanta rikunkuchu. Chaykunaman ima kachasaj. Imaynachus atiyniy kasqanta paykuna tukuy nacionesman willanqanku.

²⁰Paykunallataj tukuy nacionesmanta tukuy ayllusniykichejta, pusampusonqachej, uj rikuchikutapis Señorman apamushankuman jina; caballospi, carretaspi, litera ruwasqa carretaspi, mulaspi, camellospi ima, Jerusalén santo ajllasqay orqoyman, nispa nin Señorqa. Kikillantataj israelitaspis chay jampoj jinaqa Señorpa wasinman rikuchikusta apamonqanku, allin llimphu vasospi.

²¹Paykunamanta wakinta ajllasaj sacerdotes, levitas kanankupaj, nispa nin Señorqa.

²²Mosoj janaj pachata, mosoj kay pachatawan ruwasqayqa ñaupaqeypipuni kanqanku. Ajinata mirayniykichejqa unayta kanqanku, sutiykichejpis wiñaypaj mana chinkaj kanqanku.

²³Sapa killamanta killa, sapa samakuna p'unchaypi, paykunaqa tukuyninku noqaqa yupaychaj jamuwanqanku, nispa nin Señorqa.

²⁴Paykunaqa llojsimuytawan rikonqanku, pikunachus contraypi jatarikorqanku chaykunaj ayasninta; imaraykuchus chay runasta mikhoj khurusqa mana wañonqankuchu; paykunata q'olasharqa chay ninankupis mana thasnukonqachu. Paykunata rikuspataj tukuy runas mayta millachikonqanku.