Read Quechua Bolivia DC Bible ISAÍAS 7 Bible Online

ISAÍAS 7 - Quechua Bolivia DC Bible bible

ISAÍAS 7

¹Uziaspa allchhin, Jotampa wawan Acaz, Judapi rey kashajtin, Siriamanta rey Rezinwan, Israelmanta Remaliaspa wawan Pekapiwan, Jerusalenman wicharerqanku jap'inankupaj, manataj chay llajtaman yaykuyta aterqankuchu.

²Chaytataj Judapi rey Acazman willamorqanku: Siriamanta kajkunawan, Efrainmanta kajkunapiwan ujllaman ujchakusqankuta, nispa. Chayta uyarispataj reywan, runasninwanqa maytapuni qharakatiterqanku, wayramojtin orqo sach'as kuyunku jinata.

³Señortaj Isaiasman nerqa: Qanwan, wawayki Sear-jasubwan rey Acazta taripamuychej, pata estanquej larq'an tukukun chayman, p'acha t'ajsana jallp'a ñan pataman, chaypitaj niy: Allinta qhawakuy, ama llakikuychu; ama manchachikuychu, nitaj q'ewakuychu, chay iskay q'osñej nina k'aspismanta, Rezín, Siriawan, Remaliaspa wawampa k'ajaj phiñakuyninkumanta.

⁵Siriamanta kajkunawan, Efraín llajtamanta kajkunawan, Remaliaspa wawanwan ima, qampa contraykipi oqharikushanku. Nispa: Judaj contrampi rinachej, paykunata mancharichimuspa chay Judá llajtata jap'ikapunachej, chaymantaj churamunachej Tabelpa wawanta rey kanampaj.

⁷Astawampis Señor nin: Chay jinaqa mana kanqachu, nitaj jayk'ajpis junt'akonqachu.

⁸Arampa capitalnenqa Damasco, Damascoj reynintaj Rezín; Samariataj Efraimpa capitalnin, Remaliaspa wawantaj Samariaj reynin. Sojta chunka phishqayoj watasmantataj Efraenqa manaña nacionchu kanqa. Sichus qankunapis mana creenkichejchu chayqa, mana sayayta atinkichejchu.

¹⁰Señorqa Acazman nillarqataj: Señor Diosniykimanta uj señalta mañakuy, ukhupachamantapis kachun, chayri janaj pachamantapis kachun.

¹²Acaztaj nerqa: Mana mañakuymanchu, manataj Señortaqa probaymanchu.

¹³Isaiastaj nerqa: Kunanqa uyariychej, Davidpa mirayninmanta kajkuna. Qankunapajqa runasta sayk'uchinaqa pisichu, Diosniytapis sayk'uchiyta munanaykichejpajqa?

¹⁴Kikin Señormin señalta qosonqachej. Qhawariychej, manaraj qharita rejsej sipas wijsallikun, nacechikuspataj, wawanta Emanuelta sutichanqa.

¹⁵Wawaqa mantequillata, misk'itawan mikhonqa, mana allin kajta qhesachayta, allin kajtataj ajllayta yachanankama.

¹⁶Wawa manaraj yuyayninman chayashajtin, chay manchachikushanki chay reyespa nacionninkoqa saqerparisqa kanqa.

¹⁷Señorqa mana allin p'unchaykunata apachimusonqa, qanman aylluykiman, tataykej wasinman ima. Chay jinata ni jayk'aj karqachu Efraín ayllu, Judá ayllumanta t'aqakusqanmantapacha. Chayta parlashan Asiria reymanta.

¹⁸Chaypacha Señorqa Egipto karu mayusmanta runasta ch'uspista jina wajyanqa, Asiriamantataj abejasta jina.

¹⁹Chay tukuy jamuspaqa sayanqanku, ch'in wayk'uspi, chhanka jusk'uspi, khishka ch'umispi, uywa ujyanaspi ima.

²⁰Chaypacha Señorqa Eufrates mayu chimpasmanta Asiria reyman, mañarisqa cuchillowan jina, israelitasta ruthonqa tukuy chujchasninta, sunkhasninta, tukuy ukhunta ima.

²¹Chaypacha runaqa uj wakata, iskay ovejastawan uywakonqa.

²²Ajinamanta lecheqa ashkha kanqa, chayrayku mikhonqanku mantequillata, misk'itawan chay jallp'api qhepakojkunaqa.

²³Chaypacha waranqa uvas sach'asniyoj jallp'aman, waranqa qolqe valejman, khishkaswan, khewayllusllawan junt'aykonqa

²⁴Chaymanqa arcoswan, flechaswan ima animalesta jap'ejlla yaykonqanku, imaraykuchus chay tukuynin jallp'asman khiskaswan qhewaylluswan junt'aykonqa.

²⁵Chay tukuynin lomasta ñaupajtaqa chujchukawan allaj kanku, chayman manaña chayanqankuchu, khishkasta, qhewayllusta ima manchachikuspa. Chayqa kanqa wakasta, ovejasta michinallapajña.