Read Quechua Bolivia DC Bible ISAÍAS 8 Bible Online

ISAÍAS 8 - Quechua Bolivia DC Bible bible

ISAÍAS 8

¹Señorqa niwarqa: Uj jatun tablata jap'ispa, chayman sut'ita qhelqay Maher-salal-hasbaz sutita.

²Chaytaqa ruway sacerdote Uriaspa ñaupaqempi, Jeberequiaspa wawan Zacariaspa ñaupaqempi ima.

³Chay qhapata warmiy profetisawan puñorqani, paytaj onqoj rikhurispa uj wawata nacechikorqa. Chaypachataj Señorqa niwarqa: Wawaykitaqa Maher-salal-hasbazta sutichay.

⁴Chay wawa manaraj, tatáy, mamáy niyta yachashajtin, Damascoj qhapaj kayninta, Samariaj tukuy imasnintawan Asiriaj reynin apakaponqa, nispa.

⁵Chaymanta Señorqa ujtawan nillawarqataj: Kay runasqa alliyllamanta correshaj Siloé yakuta qhesachanku, Rezinta, Remaliastawan manchachikusqankurayku.

⁷Chayrayku, Señorqa paykunaj patankuta yakuwan llump'irichenqa, manchayta correshajta, ashkhawantaj. Chayqa kashan Asiria rey, tukuy atiyninwan. Chay yakoqa tukuy mayusta atipaspa, tukuy mayu cantosta wasarenqa.

⁸Chaytaj Judakama chayanqa, tukuynintataj p'ampaykonqa, kunkankama chayaspa. Emanuelníy, tukuynin jallp'aykita lijrawan qhataykonqa.

⁹Naciones tantakuychej, qankunaqa t'unasqas kankichej. Qankunapis karu llajtayojkuna uyariychej: May jinatapis wakichikuychej, qankunaqa atipasqas kankichej. Imayna maqanastapis wakichikuychej, urmankichejpuni.

¹⁰Sumajtapis yachachinakuychej qhasi manakajpaj kanqa. Imatapis parlasqaykichejqa, manapuni junt'akonqanku, imaraykuchus Diosqa noqaykuwan kashan.

¹¹Señorqa sumajta makiymanta jap'iykuwaspa amapuni kay runaspa ñanninta purinayta yachachiwarqa, nispa: Ama qankunaqa ch'ajwa niychejchu, runas imatapis ch'ajwa nispa nejtinkoqa. Amataj qankunaqa mancharikunkichejchu, paykuna imamantapis mancharikojtinkoqa.

¹³Tukuy Atiyniyoj Señorllata Santopaj qhawaychej; payllata manchachikuychej, payllata kasuychej.

¹⁴Payqa iskaynin nacionespaj yupaychana wasinku kanqa. Chaywampis payqa misk'ana rumi kanqa. Chaytaj iskaynin Israel nacionesta urmachenqa. Payqa, ch'ipa jina, tojlla jinataj Jerusalempi tiyakojkunapaj kanqa.

¹⁵Ashkhas chaypi misk'akuspa urmaranqanku, wañonqankutaj. Ashkhas jap'ichikonqanku, presochasqastaj kanqanku.

¹⁶Kay kamachisqasniyta allinta waqaychaychej. Yachachisqasniypaj sonqosninman kay yachachisqasniyta churaychej.

¹⁷Señorllapi suyasaj, payqa Jacobpa mirayninmanta uyanta pakaykumpis. Payllapitaj atienekusaj.

¹⁸Noqa, Señor qowasqan wawasniywan, israelitaspaj uj señal jina kayku, Tukuy Atiyniyoj Señorpa churasqasnin; Payqa Sión orqopi tiyakun.

¹⁹Sichus chay runas nisonqachej: Tapuriychej wañusqaspa almasninta, chhichinakuspa parlaj layqasta ima, nispa chayqa, niychej: Manachu runasqa Diosnillankuta tapurikunkuman? Wañusqastarajchu kausajkunamanta tapurikunkuman?, nispa.

²⁰Chayrayku kutiriychej leyman, imatachus yachachisqaymanwan. Sichus mana chayman jinachu nenqanku chayqa, paykunapi mana cheqa kaj kanchu.

²¹Runasqa kayman jaqayman puriykachanqanku may llakisqas, yarqhasqastaj. Chay jina yarqhasqa kaspa runasqa may phiñasman tukonqanku, qallarenqankutaj reyninkuta, Diosninkutapis maldiciyta, uyankuta pataman oqharispa.

²²Jallp'ata qhawarispataj rikonqanku llakiyta, laqhayayta, laqhapachata, may waqaytataj, laqha ukhupitaj rikhurenqanku.