Read Quechua Bolivia DC Bible LEVÍTICO 11 Bible Online

LEVÍTICO 11 - Quechua Bolivia DC Bible bible

LEVÍTICO 11

¹Señorqa Moisesmanwan, Aaronmanwan kay jinata parlarqa: Israelitasman niychej: Tukuy uywasmanta kay mundopi kajkunamanta mikhuyta atinkichej, kutipakoj animalesta, phapatusnin iskayman palqasniyojta. Kay uywastaqa kutipakojkunamanta, chayri phapatusnimpis palqasniyojkunamanta ama mikhunkichejchu kaykunata: Camello kutipakun, manataj phapatusnin palqasniyojchu, chayta. Chayqa mana llimphu nisqa uywapaj qhawasqachu.

⁵Qowipis kutipakun, chaywampis chakisnenqa mana iskayman palqasqachu, chayrayku mana llimphu nisqa uywapaj qhawasqachu.

⁶Castilla qowipis kutipakun, chaywampis chakisnenqa mana iskayman palqasqachu. Chayrayku mana llimphu nisqa uywapaj qhawasqachu.

⁷Khucheqa iskayman palqasqa phapatusniyoj, chaywampis mana kutipakunchu. Chayrayku mana llimphu nisqa uywapaj qhawasqachu.

⁸Chay uywaspa aychasninta ama mikhunkichejchu, ni llujchirillankichejpischu wañusqa aychanta. Chay aychaqa mana llimphu nisqa aychapajchu qhawasqa kanqa.

⁹Yakupi kausajkunamanta mikhunkichej: Mar qochapi kajkunatapis, mayuspi kajkunatapis, mayqenkunachus aletasniyoj, escamasniyoj kanku chaykunata.

¹⁰Mana aletasniyoj, nitaj escamasniyoj kajkunaqa millay animalespaj qhawasqas kanku: Mar qochapi kajpis, mayuspi kajkunapis: Jatuchajpis kachunku, juch'uykunapis kachunku.

¹¹Chay aychasta ama mikhunkichejchu, millay uywaspaj qhawankichej, ni llujchirillankichejpischu may jina munana aychantapis.

¹²Yakupi tukuy kajkunamanta mana aletasniyoj, nitaj escamasniyoj kajkunamanta ama mikhunkichejchu. Kaykunaqa millay animalespaj qhawasqas kanku.

¹³Lijrasniyoj phawaykachajkunamanta ama mikhunkichejchu, millaypaj qhawankichej kaykunata: Ankasta, tullu p'aki ankasta, yaku ankasta, suwintusta, imaymana laya mamanista, imaymana laya q'arqañasta, surista, ch'useqasta, gaviotasta, imaymana laya gavilanesta, jukusta, cormoranista, ibiskunata, jatun kunkayoj pilista, jatun chhuruyoj yaku pilista, suweq'arasta, cigüeñasta, imaymana laya garzasta, abubilla nisqa p'isqosta, ch'iñista ima.

²⁰Tukuy laya phawaykachaj pampapi purej khurusta amapuni mikhunkichejchu, millachikunkichej.

²¹Chaywampis mikhuyta atinkichej tawa chakisniyoj lijrasniyoj phinkiykachajkunata kay pampapi.

²²Chaykunamantaqa mikhuyta atinkichej kaykunata: Tukuy laya langostasta, siripitasta, t'intista ima.

²³Chaymantaqa tukuy waj phawaykachaj, pampapi purej khurustapis millaypaj qhawankichej.

²⁴Kay jinata ruwaspa millaypaj qhawasqa kankichej: Chay wañusqa animalesta llankhaspa ch'ichipaj qhawasqas kankichej ch'isiyaykuykama.

²⁵Pillapis chay wañusqa animalesta oqharejqa p'achasninta t'ajsakonqa, ch'isiyaykuykama ch'ichipaj qhawasqa kanqa.

²⁶Mayqen animaleschus phapatusnin mana iskayman palqasniyojchu kanqa chayqa, chayri manachus kutipakoj kanqa chayqa, chay animalesta qhawankichej ch'ichi animalespaj. Chantapis pichus chaykunata llankhajqa ch'ichipaj qhawasqa kanqa.

²⁷Ima tawa chakiyoj uywasllapis chaki plantasninkuwan purinku chayqa, chay animalesta qhawankichej ch'ichi uywapaj. Chanta pillapis chay wañusqa uywasta llankhajqa, ch'isiyaykuykama ch'ichipaj qhawasqa kanqa.

²⁸Kikillantaj pillapis chay uywas wañusqata oqharejqa, p'achasninta t'ajsakonqa, ch'isiyaykuykama ch'ichipaj qhawasqa kanqa. Qankunaqa chay animalesta ch'ichipaj qhawanaykichej tiyan.

²⁹Pampata qhatatakuspa purej animalesmanta qankunaqa ch'ichipaj qhawanaykichej tiyan kaykunata: Q'ara chupata, juk'uchata, tukuy laya katarista, salamandras nisqa ararankhasta, caimanesta, yaku ararankhasta, jallp'a ararankhasta, camaleones nisqata ima.

³¹Tukuy animalesmantaqa chaykunata ch'ichipaj qhawankichej. Pillapis chay wañusqa animalesta llankharejqa ch'isiyaykuykama ch'ichipaj qhawasqa kanqa.

³²Jinallataj imamanchus chay wañusqas urmaykonqanku, chaypis ch'ichillapajtaj qhawasqas kanqanku. Tukuy ima maderamanta, p'achas, qaras, costales, llank'anapaj herramientaspis yakuman churasqas kanqanku, ch'ichipajtaj qhawasqas kanqanku ch'isiyaykuykama, chaymantataj llimphuman tukonqanku.

³³Sichus ima t'uru mankaman urmaykunman mayqen wañusqa animalpis chayqa, chay manka ukhupi kajqa ch'ichichasqa kanqa; chay mankataqa p'akinkichej.

³⁴Sichus ima mikhunaman chay mankamanta yakuta jich'aykunman chayqa, ch'ichipaj qhawasqa kanqa, jinallataj chay mankapi kaj yakupis ch'ichichasqa kanqa.

³⁵Imasmanchus chay wañusqas urmaykonqanku chayqa, ch'ichipaj qhawasqas kanqanku. Hornopis kachun, q'onchapis kachun, t'unasqas kanqanku. Chaykunaqa ch'ichichasqas kanku. Chayrayku qankunaqa chaykunata ch'ichispaj qhawankichej.

³⁶Chaywampis yaku pujyus, yaku simis imaqa llimphullapuni kanqa. Pichus chay wañusqa animalta llankhajlla ch'ichichasqaqa kanqa.

³⁷Sichus chay wañusqa animal tarpuna mujusman urmaykunman chayqa, chay mujoqa llimphullapuni kanqa.

³⁸Sichus chay muju joq'o kashajtin, chay wañusqa urmaykunman chayqa, chay mujoqa ch'ichichasqa kanqa.

³⁹Sichus mikhunaykichej kaj uywa wañunman chayqa, chaytataj pipis llankhajqa, ch'isiyaykuykama ch'ichichasqa kanqa.

⁴⁰Pichus chay wañusqa animalpa aychanta mikhojqa, p'achasninta t'ajsakonqa, ch'isiyaykukamataj ch'ichichasqa kanqa. Pichus chay wañusqa animalta aysarejpis p'achasninta t'ajsakonqa, ch'isiyaykuykamataj ch'ichichasqa kanqa.

⁴¹Amapuni mikhunkichejchu kay jallp'a patapi qhatatakuspa purejkunata, chaykunaqa millaypaj qhawasqas kanqanku.

⁴²Chay tukuy animales jallp'a patapi qhatatakuspa purejkunata amapuni mikhunkichejchu, panzanwan qhatatakojpis kachun, tawa chakiyojpis kachun, chayri ashkha chakisniyojpis kachun. Chaykunaqa millaypaj qhawasqas kanqanku.

⁴³Chayrayku qankunaqa amapuni chay animaleswan millayta ch'ichichakuychejchu, imaraykuchus noqaqa Señor Diosniykichej kani. Chayrayku qankunaqa llimphuchakunaykichej tiyan, llimphustaj sonqosniykichejpi kanaykichej tiyan, imaraykuchus noqa llimphuymin kani. Qankunaqa amapuni ni ima qhatatakuspa purej animalesnejta ch'ichichakunkichejchu.

⁴⁵Noqaqa Señor kani, Egiptomanta orqhomorqaykichej Diosniykichej kanaypaj. Chayrayku qankunaqa llimphuspuni kanaykichej tiyan, imaraykuchus noqaqa santomin kani.

⁴⁶Animalesmanta kamachiykuna kaykuna kanku, lijrayojkunamanta, tukuy yakupi kausajkunamanta, jallp'a patapi qhatatakuspa purej animalesmantawan.

⁴⁷Chanta rejsinkichej ch'ichi kajta, mana ch'ichi kajtapis, ima animalestachus mikhunamanta, ima animalestachus mana mikhunamantawan.