Read Quechua Bolivia DC Bible LEVÍTICO 13 Bible Online

LEVÍTICO 13 - Quechua Bolivia DC Bible bible

LEVÍTICO 13

¹Señorqa Moisesman, Aaronmanwan kay jinata parlarqa: Sichus maqempa ukhumpi ima punkiy rikhurinman, chay qhashqas, chayri yuraj llijtis, chayri llijtis lepra jina chayqa, rikuchikamonqanku sacerdote Aaronman, chayri sacerdote wawasninman.

³Chaykunata sacerdoteqa qhawanqa. Sichus chay llijti chaynejpi pelo yurajman kutinman, chay llijtitaj astawan t'oqoykukun chayqa, lepra onqoypuni kanqa. Sacerdote qhawajtintaj chay runaj onqoyninta, ninmantaj jinapuni kasqanta chayqa, chay runaqa millay onqoyniyojpaj qhawasqa kanqa.

⁴Sichus uj runaj ukhumpi rikhurin uj yuraj llijti, manataj t'oqokunchu, nitaj pelosnimpis yurajyanchu chayqa, sacerdote chay onqosqata qanchis p'unchayta wisq'anqa.

⁵Chay qanchis p'unchaymanta sacerdoteqa ujtawan qhawallanqataj. Sichus chay onqoyqa kikillampuni, manataj astawan jatunyanchu chayqa, uj qanchis p'unchaytawan wisq'allanqataj.

⁶Chay qanchis p'unchaymantaqa sacerdote ujtawan qhawallanqataj. Sichus chaykama chay onqoyqa thañisqaña, mana astawan jatunyanchu chayqa, sacerdote nenqa, chay runaqa llimphuña kasqanta, ukhumpi phusullu onqoymanta. Onqosqaqa p'achasninta t'ajsakonqa, chaymantaraj llimphupaj qhawasqa kanqa.

⁷Sichus chay yuraj phusullu miraykullanmantaj chay runaj ukhumpi, sacerdote payta llimphupaj qhawasqanmantaña chayqa, ujtawan sacerdotewan qhawachikoj rillachuntaj.

⁸Sichus chay sacerdote qhawan chay runaj onqoynin astawan miraykusqanta tukuy ukhumpi chayqa, mana llimphu kasqanta nenqa, lepra onqoyniyoj kasqanrayku.

⁹Maypachachus uj runapi lepra onqoy rikhurejtenqa sacerdoteman apanqanku.

¹⁰Chaypi sacerdote qhawanqa, sichus chay runaj punkisqan yuraj, pelosnimpis chay cheqapi yurajllataj, chaynejpi aychantaj llijtiyasqa kanman chayqa, chay runaj onqoynenqa uj saphichasqa lepra. Sacerdoteqa chay runata mana allimpaj qhawanqa. Chantapis chay runataqa manaña wisq'anqachu, imaraykuchus mana allimpaj qhawasqaña.

¹¹

¹²Sichus lepra nisqa onqoyqa runaj tukuy ukhunta junt'aykun chakisninmanta umankama sacerdotej rikusqanman jina chayqa, chaypacha sacerdoteqa payta qhawanqa.

¹³Sichus lepra nisqa onqoyqa chay runaj tukuy ukhunta junt'aykun chayqa, sacerdote nenqa chay runa llimphu kasqanta, imaraykuchus chay lepra onqoynenqa yurajman tukun, chay runaqa llimphupaj qhawasqaña.

¹⁴Chaymantaqa maypachachus llijtiyasqa aychan may cheqapipis rikhurinman chayqa, chay runaqa mana llimphupajchu qhawasqa kanqa.

¹⁵Chaypacha sacerdote chay llijtiyasqa aychanta qhawanqa, nenqataj mana llimphuchu kasqanta. Chay llijti aychaqa mana llimphuchu, chayqa lepramin.

¹⁶Chanta sichus chay llijtiyasqa aycha yurajyallanqataj chayqa, chay onqosqaqa rinan tiyan sacerdotejman.

¹⁷Sacerdotetaj payta qhawanqa. Sichus llijtiyasqa aychaqa yurajyasqaña chayqa, sacerdote nenqa chay runa llimphuña kasqanta, aychan llimphuña kasqanrayku.

¹⁸Sichus mayqen runa ima llijti onqoymantapis thañinman chayqa, chay thañisqa cheqa yurajta punkinman, chayri yuraj pukaman, chhoqopachataj rikhurinman chayqa, sacerdoteman qhawachikamuchun.

¹⁹

²⁰Sichus sacerdote qhawaspa rikun chay cheqaqa t'oqoyaykusqanta, pelosnimpis yurajman tukusqanta chayqa, chaypacha nenqa chay runaqa mana llimphuchu kasqanta, imaraykuchus chay llijtenqa lepra onqoy kasqanta.

²¹Sichus chay nanasqan cheqapi rikun pelosnin manaña yurajyasqanta, nitaj aychampis t'oqoyaykusqanta, manachayqa chinkapusqantaña chayqa, chay sacerdote qanchis p'unchayta wisq'anqa.

²²Sichus chay llijteqa astawan wiñanman chayqa, sacerdote nenqa chay runa mana llimphuchu kasqanta; nenqataj chay llijtenqa lepra onqoy kasqanta.

²³Chanta sichus chay nanasqan mana wiñanchu chayqa, manachayqa nanasqampa t'irillan kasqanta chayqa, sacerdote chay runata nenqa llimphu kasqanta.

²⁴Sichus mayqempis ninapi ruphachikunman, chay ruphasqa aychan cheqapitaj rikhurinman yuraj puka llijti, chayri yuraj llijti chayqa, sacerdote chayta qhawanqa. Sichus chay nanasqa cheqapi pelosqa yurajman tukunman, aychampis ruphasqa t'irimpi astawan t'oqoyanman chayqa, chay ruphasqa cheqapi rikhurisqaqa lepra onqoy, chayta sacerdoteqa nenqa chay runaqa mana llimphuchu kasqanta, lepra onqoyniyoj kasqanrayku.

²⁵

²⁶Chanta sichus sacerdoteqa chayta qhawarispa mana rikunchu chay nanasqa cheqapi yurajyasqa pelosta chayqa, nitaj astawan t'oqoyasqanta, manachayqa astawan chinkapushasqanta. Jinamanta sacerdoteqa chay runata qanchis p'unchayta wisq'anqa.

²⁷Chay qanchis p'unchaymanta sacerdoteqa ujtawan chay runata qhawanqa. Sichus chay onqoy astawan jatunyarqa chayqa, sacerdote chay runata nenqa mana llimphuchu kasqanta, lepra llijti onqoyniyoj kasqanrayku.

²⁸Sichus chay nanasqa mana astawan jatunyanchu, chinkapushantaj chayqa, chay punkisqaqa ruphasqallamanta. Ajinaqa sacerdote chay runata nenqa llimphu kasqanta, chay punkisqaqa ruphasqamanta t'irilla.

²⁹Maypachachus uj qharejta, chayri warmejta umampi, chayri k'akimpi uj llijti onqoy rikhurin chayqa, chayta sacerdote qhawanqa. Sichus chay llijti t'oqoyashan, pelostaj q'elluyaspa raluyashan chayqa, sacerdote chay runata nenqa mana llimphuchu kasqanta; alqayay onqoyniyoj kasqanrayku umampi chayri k'akimpitaj.

³⁰

³¹Sacerdoteqa chay alqayay onqoyta qhawashajtin rikunman mana astawan t'oqosqa kasqanta, nitaj chaynejpi yana pelos kasqanta chayqa, sacerdote chay runata qanchis p'unchayta wisq'anqa.

³²Qanchis kaj p'unchaypi sacerdoteqa ujtawan qhawanqa chay llijtita. Sichus chay alqayay onqoy mana astawan jatunyanchu, nitaj astawan t'oqoyanchu, nitaj pelospis chaynejpi q'elluyanchu chayqa, sacerdote chay runata nenqa sunkhasninta, chujchasnintapis ruthukunanta; chay maynejpichus alqayarqa chaynejllata mana ruthukonqachu. Chaymantataj sacerdoteqa qanchis p'unchayta wisq'anqa.

³³

³⁴Chay qanchis p'unchaymantataj sacerdoteqa ujtawan qhawallanqataj chay alqayasqa karqa chaynejta. Sichus chay onqoy mana astawan jatunyanchu, nitaj astawan t'oqoyanchu chayqa, sacerdote nenqa chay runa llimphuña kasqanta. Chaymantataj chay runaqa p'achasninta t'ajsanqa, llimphuchasqataj kanqa.

³⁵Sichus chay alqayay onqoy astawan chay runapi jatunyan, sacerdote llimphu nisqanmanta chayqa, sacerdoteqa ujtawan qhawanqa chay onqosqa runata. Sichus chay alqayay onqoy astawan jatunyan chayqa, sacerdote amaña q'ellu pelosta mask'achunchu. Chay runaqa mana llimphupajchu qhawasqa kanqa.

³⁶

³⁷Chanta sichus sacerdoteqa yuyanman chay alqayay onqoyta thañisqanta, chaynejpitaj yana pelos rikhurisqantapis chayqa, chay niyta munan chay onqoyqa thañisqantaña. Sacerdoteqa nenqa chay runa llimphuña kasqanta.

³⁸Maypachachus uj qharejta, chayri uj warmejta ukhumpi yuraj qhashqas rikhurin chayqa, sacerdote chayta qhawanqa. Sichus chay runaj ukhumpi rikhurinman yuraj oqeyasqa alqas chaykunaqa qhashqa llojsimusqaslla. Jina kajtenqa chay runaqa llimphulla.

³⁹

⁴⁰Sichus mayqen runajta chujchasnin t'akakun, p'ajlataj rikhurin chayqa, chay runaqa llimphulla.

⁴¹Sichus frenten patallamanta chujchasnin t'akakun, jinamantataj p'ajla frente rikhurin chayqa, chay runapis llimphulla kashan.

⁴²Chanta sichus chay p'ajlampi pukayasqa yuraj llijtis rikhurin chayri, umaj qhepannejpi, chayri ñaupajnejpi chayqa, lepra onqoymin rikhurishan.

⁴³Chaymantataj sacerdote qhawanqa. Sichus chay runaj p'ajlampi llijti punkisqasnin yuraj pukayasqas kanman chayqa, chay runaj ukhumpi lepra onqoy rikhurin.

⁴⁴Ajinaqa chay runa leprawan onqosqa kashan; imaraykuchus umampi llijti rikhurin. Sacerdote chay runata nenqa mana llimphuchu kasqanta.

⁴⁵Pichus ajina llijti lepra onqoyniyojqa llik'isqa p'achasta churakuchun, ch'aska umallataj purichun, siminta qhataykukuspataj qhaparichun: Leprayoj kani! Leprayoj kani!, nispa.

⁴⁶Chay lepra onqoyniyoj kashaspaqa mana llimphupajchu qhawasqa kanqa. Chantapis sapallan tiyakunan tiyan jaramanta jawapi.

⁴⁷Sichus ima p'achapi, millmamanta, chayri linomanta ruwasqapi, qorwariyay rikhurinman chayqa, chayri ima awasqapi, linomanta, chayri millmamanta, chayri qaraspi, chayri qaramanta ima ruwasqapipis; sichus chay imaspi qorwariyayqa q'omeryasqa, chayri pukayasqa kanman chayqa, chay qorwariyayqa ch'ichichay qorwariyay kashan. Chaypachaqa chayta apaspa sacerdoteman rikuchikamuchun.

⁴⁸

⁴⁹

⁵⁰Chay qorwariyayta sacerdoteqa qhawanqa. Chay qorwariyasqataqa qanchis p'unchayta jallch'anqa.

⁵¹Qanchis p'unchaymantataj chay qorwariyasqata ujtawan qhawallanqataj. Sichus chay qorwariyasqaqa p'achapi, chayri awasqapi, chayri qaraspi, chayri qaramanta ima ruwasqapipis jatunyanman chayqa, chay qorwariyayqa millay qorwariyay mana llimphupajchu qhawasqa kanqa.

⁵²Ajinaqa chay imapichus qorwariyayqa rikhurenqa chayqa, tukukuynin ruphachisqa kachun, millay qorwariyay kasqanrayku.

⁵³Sichus sacerdote rikun chay qorwariyayqa mana astawan jatunyasqanta chayqa, pay kamachenqa chay imasta mayllanankuta, jinaspataj qanchis p'unchaytawan jallch'achinankuta.

⁵⁴

⁵⁵Chay qorwariyasqata mayllasqamantaña sacerdoteqa ujtawan qhawarenqa. Sichus mana chinkanchu chayqa, chay qorwariyayqa ch'ichichaj qorwariyasqa. Chay imapichus qorwariyasqa karqa, manapis jatunyanchu chayqa, ruphachisqa kachun ismusqa kasqanrayku, jawamanta ukhumantapis.

⁵⁶Sichus chay qorwariyasqata mayllasqamantaña sacerdoteqa qhawarispa rikunman qorwariyay chinkapushasqantaña chayqa, chay cheqanejta sacerdoteqa k'utonqa, p'achamantapis kachun, chayri qaramantapis, chayri awasqamantapis.

⁵⁷Sichus rikhurillanqapuni chay qorwariyayqa p'achapi, awasqapi, chayri qaramanta ruwasqapi chayqa, chay imapichus qorwariyay rikhurenqa chayqa ruphachisqa kachun.

⁵⁸Sichus mayllajtinku chay qorwariyay chinkanman p'achamanta, chayri awasqamanta, chayri qaramanta, ima ruwasqallamantapis chayqa, ujtawan t'ajsachunku, llimphuchasqataj kanqa.

⁵⁹Kaykuna kanku imaynatachus ruwanamanta kamachiykuna, chay qorwariyasqamanta, millmamanta ruwasqa p'achaspi, linomanta ruwasqs p'achaspi, awasqaspi, qarasmanta imachus ruwasqaspipis. Ajinamanta yachanankupaj kay imas llimphuchus, chayri millay ch'ichichus kasqankuta.