Read Quechua Bolivia DC Bible LEVÍTICO 14 Bible Online

LEVÍTICO 14 - Quechua Bolivia DC Bible bible

LEVÍTICO 14

¹Señorqa Moisesman kay jinata parlarqa: Kay kamachiy kashan lepra onqoyniyojkuna imaynatachus llimphuchakunankumanta: Leprawan onqosqaqa sacerdotej ñaupaqenman pusasqa kanqa.

³Sacerdotetaj jaramanta jawaman llojsenqa chay onqosqata qhawanampaj. Sichus sacerdoteqa rikun chay runaj lepra onqoynin thañishasqantaña chayqa, sacerdoteqa apachimonqa iskay kausashaj p'isqosta, chaykunataj llimphus kananku tiyan; uj cedro maderatawan, puka q'aytuta, hisopo nisqa qhoratawan.

⁴

⁵Jinaspataj kamachenqa ujnin p'isqota wañuchinankuta uj t'uru manka patapi, mayqenchus kanqa juturi yakuyoj.

⁶Chaymantataj oqharenqa kausashaj p'isqota, cedro maderata, puka q'aytuta hisopotawan. Chaykunatataj joq'ochanqa chay wañusqa p'isqoj yawarninwan juturi yaku patapi.

⁷Chaymantataj qanchis kutita chay yawarwan ch'ajchonqa lepramanta llimphu kaj runata. Jinamanta nenqa lepramanta llimphuña kasqanta. Jinaspataj chay kausashaj p'isqota kachariponqa.

⁸Pichus llimphuchakojqa p'achasninta t'ajsakonqa, jinallataj pelosninta ruthukonqa, ajinamanta llimphuchasqa kanqa. Chaymantaraj yaykonqa jaraman, chaywampis qanchis diastaraj paypa toldonmanta jawapi tiyakonqa.

⁹Qanchis p'unchaypitaj tukuy chujchasninta ruthukonqa, jinallataj sunkhasninta, ñawi pata pelosninta, tukuy ukhumpi kaj pelosnintawan. Chaymantataj p'achasninta t'ajsakonqa, tukuy ukhuntapis mayllakullanqataj. Chaymantaraj payqa llimphuchasqa kanqa.

¹⁰Pusaj kaj p'unchaypitaj iskay sumachaj kaj corderosta apamonqa mana imanasqasta, uj watayoj china ovejata mana iman imanasqata. Chantapis sojta kilos khuskanniyoj sumaj kaj jak'uta aceitewan ñat'usqata jaywasqa kanampaj khuskan botella aceitewan.

¹¹Llimphuchayta ruwaj sacerdote, chay llimphuchakoj jamoj runata, chay imastawan khuska, Señorpa ñaupaqenman pusanqa Dioswan tinkukuna toldo punkuman.

¹²Chaymantataj sacerdoteqa ujnin kaj corderota jap'enqa. Chaytataj khuskan botella aceitetawan Señorman jaywanqa chay runaj juchasnimpa cuentanmanta, Señorpa ñaupaqempitaj chay jaywanasta rikuchinampaj.

¹³Sacerdoteqa chay corderota ñak'anqa, maynejpichus t'aqasqa cheqapi wañuchinampaj animalesta rikuchikuspaj juchaj cuentanmanta ruphachisqa kanankupaj chaynejpi. Juchaj cuentanmanta rikuchiku, jinallataj juchamanta rikuchikupis sacerdotepaj kanqa, imaraykuchus chayqa sumaj t'aqasqamin.

¹⁴Chaymantataj sacerdoteqa chay uywaj uj chhika yawarninwan jawanqa llimphuchakojpa paña ningrimpa urannejman, paña makimpa mama dedonman, paña chakimpa mama dedonmanwan.

¹⁵Chaymantataj sacerdoteqa uj chhika aceiteta lloq'e maki qochanman jich'akonqa.

¹⁶Jinaspataj paña maki dedonwan chhaponqa, chay uj makimpi kashaj aceiteman. Chay dedollanwantaj qanchis kutita ch'ajchonqa. Señorpa ñaupaqempi aceitewan ch'ajchonqa.

¹⁷Makimpi kasharqaraj chay aceitellawantaj sacerdoteqa chay llimphuchakoj runata jawenqa, paña ningrimpa urannejman, paña makimpa mama dedonman, paña chakimpa mama dedonman, maynejkunapichus yawarwan jawisqaña chaykunapi.

¹⁸Chaymantataj makimpi puchoj aceitewan sacerdoteqa jawenqa llimphuchakoj runaj umanta. Ajinamanta sacerdoteqa chay rikuchikuwan Señormanta perdonta tarenqa juchachakoj runapaj.

¹⁹Chaymantataj sacerdoteqa chay runaj juchasninrayku apamusqan rikuchikutañataj jaywanqa, ajinamanta chay ch'ichichakoj runaqa llimphuchasqa kanqa. Chaymantataj chay apamusqa uywata ñak'anqa ruphachisqa kanampaj, jaywanqataj altar patapi, ch'aki mikhuna rikuchikutawan. Ajinamanta sacerdoteqa chay rikuchikuwan Señormanta perdonta tarenqa chay juchachakoj runapaj, chay runataj llimphuchasqa kanqa.

²⁰

²¹Sichus chay runa ancha wajcha kasqanrayku mana atinmanchu chay kamachisqa rikuchikuta apamuyta chayqa, apamuchun juchanrayku rikuchikuta jina uj corderota. Chayta sacerdoteman jaywachun juchasnimpa cuentanmanta perdonta tarinampaj. Apamullachuntaj iskay kilota sumajnin kaj jak'uta aceitewan ñat'usqata, ch'aki mikhuy rikuchikuta jina khuskan botella aceitetawan.

²²Chanta apamullachuntaj iskay jurk'utasta, chayri iskay irpasta, atisqanman jina. Ujnin kajqa juchasnimpa cuentanmanta, ujnin kajtaj ruphachimpaj kanampaj.

²³Pusaj kaj p'unchaypitaj chay tukuyninta sacerdoteman apamonqa llimphuchasqa kanampaj; chaykunatataj jaywanqa Señorpa ñaupaqempi, Dioswan tinkukuna toldo punkupi.

²⁴Sacerdotetaj juchaj cuentanmanta chay corderota khuskan botella aceitetawan jap'enqa, jinaspataj chaykunata rikuchikuta jina Señorpa ñaupaqenman jaywanqa.

²⁵Chaymanta juchaj cuentanmanta rikuchiku apamusqa corderota ñak'anqa. Chay corderoj uj chhika yawarninta jap'ispa, chaywan jawenqa llimphuchakojpa paña ningrimpa urannejman, paña makimpa mama dedonman, paña chakimpa mama dedonmanwan.

²⁶Jinaspataj sacerdoteqa uj chhika aceiteta lloq'e maki qochanman jich'anqa.

²⁷Lloq'e maki qochampi kaj aceitewantaj sacerdoteqa paña maki dedonman qanchis kutita ch'ajchonqa Señorpa ñaupaqempi.

²⁸Makimpi kashanqa chay aceitewantaj sacerdoteqa jawenqa, llimphuchakoj runata paña makimpa urannejman, paña makimpa mama dedonman, paña chakimpa mama dedonmanwan, maynejkunapichus yawarwan jawerqaña chaykunata.

²⁹Makimpi puchoj aceitewantaj sacerdoteqa llimphuchakoj runaj umanta jawenqa, ajinamanta chay runaqa juchasninmanta perdonta tarinampaj.

³⁰Chaymantataj chay llimphuchakoj runa atisqanman jina apamusqanmanta sacerdoteqa ujnin kaj jurk'utata, chayri ujnin kaj irpata Señorman jaywanqa.

³¹Ujnin kajta chay runaj juchasninrayku rikuchikupaj jaywanqa. Ujnin kajtataj ch'aki mikhuna rikuchikutawan khuska ruphachenqa. Ajinamanta sacerdoteqa chay rikuchikuwan Señormanta perdonta tarenqa chay llimphuchakoj runapaj.

³²Kaykuna kamachiykunas kanku pisi kapuyniyojkunapaj, lepra onqoyninkumanta llimphuchasqas kanankupaj.

³³Señorqa Moisesman Aaronmanwan kay jinata parlarqa: Maypachachus Canaán jallp'aman chayankichej, qankunaman qopuykichej chay jallp'aman, qorwariyaytataj mayqempa wasinmampis apachimuyman chayqa, chay wasiyoj renqa sacerdoteman willamoj, wasiypi qorwariyay lepra jina rikhurin, nispa.

³⁴

³⁵

³⁶Sacerdotetaj manaraj wasiman yaykushaspa, chay wasita ch'usajyachenqa, amaraj chay qorwariyay ni imaman chimpashajtin. Chaymantaraj chay wasiman sacerdoteqa yaykonqa, chay qorwariyayta qhawaj.

³⁷Sichus sacerdote chay wasiman yaykushaspa qhawanman perqa kinraykunapi rikhurisqanta, q'omer, chayri puka qorwariyaykunas, chaykunapitaj perqa t'oqoyasqanta chayqa, sacerdoteqa chay wasimanta llojsispa, punkuta wisq'anqa qanchis p'unchayta.

³⁸

³⁹Chay qanchis p'unchaykunamantataj sacerdoteqa ujtawan qhawamullanqataj. Sichus chay qorwariyay chay wasi perqaspi astawan miraykun chayqa, sacerdoteqa kamachenqa chay qorwariyasqa rumista orqhospa, llajtamanta jawaman q'opa jich'anaman wijch'umunankuta.

⁴⁰

⁴¹Chanta kamachillanqataj chay wasi ukhuta tukuyninta khitunankuta. Chay khitusqankumanta jallp'atataj llajtamanta jawaman q'opa jich'anaman wijch'umunankuta.

⁴²Chay rumista orqhosqankumantataj waj rumista churachunku, jinaspataj watejmanta t'uruwan llut'achunku chay wasej perqasninta.

⁴³Sichus chay qorwariyay ujtawan rikhurillantaj rumista orqhonankumanta, perqasta khitusqankumanta, watejmanta t'uruwan llut'asqankumanta chayqa, sacerdote ujtawan chay wasita qhawamonqa. Sichus watejmanta chay qorwariyay chay wasiman junt'aykullantaj chayqa, chay qorwariyayqa millay qorwariyay, jinamanta chay waseqa mana llimphupajchu qhawasqa kanqa.

⁴⁴

⁴⁵Chayrayku chay wasitaqa urmachichunku. Rumisninta, k'aspisninta, tukuy jallp'antawantaj, llajtamanta jawaman q'opa jinch'anaman wijch'umuchunku.

⁴⁶Pillapis chay wasiman yaykojqa, sacerdote qanchis p'unchayta wisq'achispa kashajtin chayqa, chay runa mana llimphupaj qhawasqachu kanqa ch'isiyaykuykama.

⁴⁷Pillapis chay wasipi mikhojqa, chayri puñojqa p'achasninta t'ajsanan tiyan.

⁴⁸Sichus sacerdoteqa ujtawan chay wasita qhawamun, chay llut'achisqasninmanta manaña chay qorwariyay astawan miranchu chay wasipi chayqa, sacerdote nenqa chay waseqa llimphuña kasqanta, chay qorwariyay chinkapusqanrayku.

⁴⁹Chay wasi llimphuchasqa kanampajtaj sacerdoteqa apachimusqanmanta rikuchikuta iskay p'isqetusta, cedro maderata, puka q'aytuta, hisopo nisqa qhoratawan.

⁵⁰Ujnin kaj p'isqetuta wañuchenqa, uj t'uru manka patapi juturi yakuyoj t'uru manka patapi.

⁵¹Jinaspataj cedro maderata, hisopo nisqa qhorata, puka q'aytuta, chay kausashaj p'isqetutawan joq'ochanqa chay wañusqa p'isqetoj yawarnimpi; t'uru mankapi juturi yakupitaj, jinaspataj chay wasita ch'ajchonqa qanchis kutita.

⁵²Ajinamanta chay wasita llimphuchanqa p'isqetoj yawarninwan, juturi yakuwan, kausashaj p'isqetuwan, cedro maderawan, hisopo nisqa qhorawan, puka q'aytuwan ima.

⁵³Jinaytawantaj chay kausashaj p'isqetuta llajtamanta jawapi kachariponqa. Ajinamanta chay sacerdoteqa chay rikuchikuwan chay wasita llimphuchanqa. Chay wasitaj llimphupaj qhawasqa kanqa.

⁵⁴Kaykuna kanku kamachiykuna imaynatachus ruwanata lepra llijti onqoymanta, chayri alqayay onqoymanta, p'achapi qorwariyaymanta, chanta wasispi qorwariyaykunamantapis. Jinallataj punkiy onqoymanta, ukhuspi qhashqas rikhurejkunamanta, yuraj llijtismantapis. Ajinamanta yachanqanku llimphuchus, chayri millay ch'ichichus kasqanta. Kaykuna kanku chay kamachiykuna chay lepra llijti onqoykunamanta.