Read Quechua Bolivia DC Bible LEVÍTICO 17 Bible Online

LEVÍTICO 17 - Quechua Bolivia DC Bible bible

LEVÍTICO 17

¹Señorqa kay jinata Moisesman parlarqa: Aaronman wawasninmanwan niy, chanta israelitasmanwan Señorqa kay kamachiykunata qosqanta:

³Mayqen israelitallapis wakata ñak'anman, chayri ovejata, cabratapis jara ukhupi, chayri jaramanta jawapipis, manataj Dioswan tinkukuna toldo punkumampis Señorman uj ofrendata jina jaywanapaj, Diospa tiyakunan chay qayllapi chayqa, chay runaqa juchayoj kanqa, chay uywaspa yawarninta jich'asqanrayku, chayrayku ayllun ukhumanta chinkachisqa kanqa.

⁵Israelitasqa Señorman apamuchunku uywasninkuta, campopi ñak'ayta yachanku chayta Dioswan tinkukuna toldo punkupi sacerdote allinyanakuy ofrendata jaywanankupaj, jinamanta ama maypipis chay uywasta ñak'anallankupaj.

⁶Sacerdoteqa chay uywaspa yawarninwan altar patata ch'ajchumonqa, mayqenchus kashan Dioswan tinkukuna toldo punku yaykuypi. Wirasnintataj Señorpaj ruphachenqa, chay ruphachispa jaywasqampa q'apaynintaj Señorpaj allin kanqa.

⁷Amaña jayk'ajpis rikuchikusninkuta jaywanqankuchu chay supaykunaman, mayqenkunatachus yupaychanku, mayqenkunanejtachus juchachakunku. Kay kamacheyqa wiñaypaj kanqa, qankunapaj, tukuy mirayniykichejpajpis.

⁸Kikillantataj niy: Mayqen israelitallapis, chayri karu llajtayoj qankunawan tiyakoj ruphachikupaj rikuchikunta, chayri ima rikuchikullatapis jaywanman chayqa, manataj apamunmanchu Dioswan tinkukuna toldo punkuman rikuchikusninta Señorman jaywanampaj chayqa, chay runaqa ayllun ukhumanta chinkachisqa kanqa.

¹⁰Noqaqa pichus yawarta mikhojpa contrampi kasaj. Ni pi israelitas, nitaj karu llajtayojkuna qankunawan tiyakojkunapis yawarta mikhuyta atinkuchu ni imaynamanta. Chay mikhoj runaqa, ayllun ukhumanta chinkachisqa kanqa.

¹¹Imaraykuchus tukuy kausajpataqa yawarnimpi kausaynin kashan. Noqa kamachiykichej yawarta altarman ch'ajchumunaykichejta juchasniykichej perdonasqa kanampaj. Yawarqa kausaymin, chaynejta juchasqa pampachasqas kanku.

¹²Chayrayku israelitasman nini: Ama mayqenniykichej, nitaj karu llajtayoj qankunawan tiyakojpis yawartaqa mikhunanchu tiyan.

¹³Mayqen israelitallapis, chayri karu llajtayoj qankunawan tiyakoj, ima llimphu nisqa animaltapis, chayri ima llimphu nisqa lijrayojtapis jap'ejqa, chaypa yawarninta jallp'aman sut'uchispa p'ampaykunan tiyan.

¹⁴Imaraykuchus tukuy ima kausajpataqa kausaynin yawarpi kashan. Chayrayku israelistasman nini, ni ima kausajpata yawarninta mikhunkichejchu. Imaraykuchus tukuy ima kausajpata yawarpi kausaynin kashan. Chayrayku yawarta mikhojqa ayllun ukhumanta chinkachisqa kanqa.

¹⁵Mayqen israelitallapis, chayri karu llajtayoj qankunawan tiyakoj ima uywaj wañusqa aychanta mikhojqa, chayri ima sajra animalpa jap'isqampa puchu aychanta mikhojqa, p'achasninta t'ajsakunan tiyan, jinallataj ukhusnintapis yakuwan mayllakunan tiyan. Ch'isiyaykukamataj mana llimphupaj qhawasqa kanqa. Chaymantataj llimphuchasqa kanqa.

¹⁶Sichus mana p'achasninta t'ajsakonqachu, nitaj ukhusnintapis mayllakonqachu chayqa, chay runa juchachasqa kanqa.