Read Quechua Bolivia DC Bible LEVÍTICO 19 Bible Online

LEVÍTICO 19 - Quechua Bolivia DC Bible bible

LEVÍTICO 19

¹Señorqa kay jinata Moisesman parlarqa: Niy tukuynin israelitasman: Qankunaqa llimphus kaychej, imaraykuchus noqa Señor Diosniykichejqa, llimphumin kani.

³Sapa ujniykichej respetachun tatanta, mamantawan. Jinallataj waqaychachun samarina p'unchaykunasniyta. Noqamin Señor Diosniykichejqa kani.

⁴Ama lantismanqa kutiriychejchu. Amataj dioskunata metal unuyasqamanta ruwakuychejchu. Noqamin Señor Diosniykichejqa kani.

⁵Maypachachus allinyakuy rikuchikuta Señorman jaywaspaqa, chayta ruwaychej, Dios jap'ikunampaj jina.

⁶Chay qosqaykichej uywaqa chay diapacha mikhusqa kanan tiyan, manachayri q'ayantin. Chaymanta minchhantimpaj puchojtaqa ninawan ruphachenqanku.

⁷Sichus minchhantimpaj mikhonqanku chayqa, qhesachasqa kanqa. Diosqa mana munanqachu chayta.

⁸Pichus mikhojqa juchachasqa kanqa. Chayrayku ayllun chaupimanta chinkachisqa kanqa, Señorman jaywasqa kajta millayta ruwasqanmanta.

⁹Maypachachus cosecha chayamojtenqa, ama tukuynintapunichu ruthunki, qhepaykipi trigo espigas qhepakojkunataqa amaña chajmankichu.

¹⁰Uvas sach'asniykimanta ama tukuyninta pallankichu, nitaj pampaman urmajkunatapis oqharinkiñachu; imaraykuchus chaykunata wajchas pallakonqanku, jinallataj karu llajtayojkunapis. Noqamin Señor Diosniykichejqa kani.

¹¹Ama suwaychejchu. Ama llullakuychejchu, nitaj ch'aukiyanakuychejchu.

¹²Amamin sutiypi llullakuspaqa jurankichejchu, imaraykuchus jinamanta qankunaqa sutiyta qhesachawajchej. Noqamin Señorqa kani.

¹³Ama runa masiykita maytapuni llakichinkichu, nitaj paypata kajtapis suwankichu. Ama peonniykej pagonta q'ayantinkama waqaychakunkichu.

¹⁴Ama joq'ara kajpa contranta maldicinkichu. Ama ni ima pantanata ciegoj purinanman churankichu. Diosniykita manchachikunki. Noqamin Señorqa kani.

¹⁵Sichus qan juez kanki chayqa, cheqanta ruwanki, ama wajchaman sayakuspa, nitaj qhapajman sayakuspa. Cheqan juiciota qanqa ruwanki.

¹⁶Ama runa masiykiman qhasi manakaj cuentosta apankichu. Amallataj runa masiykita llullakusqaykiwan wañuysinkichu. Noqamin Señorqa kani.

¹⁷Ama chejnikuyniykita sonqoykipi waqaychankichu wauqeykej contranta. Runa masiykita k'amiy, ama k'aminayki kajtin, ama qampis juchallikunaykipaj.

¹⁸Ama llajta masiykimanqa ima sajramanta ayñita kutichinkichu. Runa masiykita ama chejninkichu. Astawanqa, paykunata munakuy qan kikiykita jina. Noqamin Señorqa kani.

¹⁹Kamachiykunasniyta kasukunki: Uywasniykita ama waj uywastawan torochinkichu. Jallp'asniykipi ama tarpunkichu chajrusqa mujusta. Tukuy imamanta ruwasqa ch'ali p'achasta ama churakunkichu.

²⁰Sichus pipis uj kamachi warmiwan puñuykakapunman, chaytaj waj runaj kamachimpajtaj parlapayasqaña karqa, chay warmi manaraj rantisqachu, nitaj kacharisqarajchu kanqa chayqa, iskayninku jasut'isqas kananku tiyan. Chaywampis mana wañuy jasut'iwanchu, imaraykuchus chay warmeqa manaraj kacharisqachu karqa.

²¹Chay runaqa Señorman jaywanan tiyan uj corderota chay juchachakusqanmanta; chaytataj apanan tiyan Dioswan tinkukuna toldo punku yaykuyman.

²²Sacerdoteqa chay corderota rikuchikuta Señorman jaywaspa, perdonta tarenqa chay juchachakoj runapaj. Jinamanta perdonasqa kanqa chay jucha ruwasqanmanta.

²³Canaán jallp'aman yaykuspaqa tukuy laya poqoj sach'asta churankichej, poqoykunasninta ama p'itinkichejchu, nitaj mikhunkichejchu kinsa wata junt'ata, mana llimphupaj qhawasqas kasqankurayku.

²⁴Tawa watamantataj tukuy poqoykunasninta Señorpaj t'aqankichej fiestata ruwaspa.

²⁵Phishqa watamantataj mikhunkichej chay poqoykunata. Ajinamanta chay sach'asqa aswan sumajta poqopusonqachej. Noqamin kani Señor Diosniykichejqa.

²⁶Ama ni ima aychata yawarnintinta mikhunkichejchu. Ama adivino kayta yachaychejchu, nitaj qhepaman imaschus kanantapis yachaychejchu.

²⁷Chujchasniykichejtaqa ama muyullataqa k'utukunkichejchu, nitaj sunkhasniykichejpa puntasnintapis.

²⁸Ama wañusqaraykoqa ukhuykichejta k'irinchakunkichejchu, nitaj ima señalestapis ukhuykichejpi ruwakunkichejchu. Noqamin Señorqa kani.

²⁹Ama warmi wawaykita p'enqaypi rikhurejta saqenkichu, nitaj khuchi warmiman tukojtapis qhawallankichu. Ajinata ruwajtiykeqa tukuy llajta masisniyki qan kikillantaj ruwanayanqanku.

³⁰Samarikuna p'unchaykunasniyta waqaychaychej. Tiyakunay cheqatapis llimphupaj qhawaychej. Noqamin Señorqa kani.

³¹Ama wañusqasta tapojkunamanqa qayllaychejchu, nitaj layqasmampis. Ama chaykunaman tapukuspataj ch'ichichakuychejchu. Noqa Señor Diosniykichejqa kani.

³²Kuraj runastaqa sayarikuspa napaykuy, jinallataj Diosniykitapis jatunchay. Noqamin Señorqa kani.

³³Qankuna ukhupi tiyakoj karu llajtayojkunata ama llakichinkichejchu.

³⁴Paykunata qankuna kikiykichejta jina qhawaychej, paykunata munakuychej, imaraykuchus qankuna kikillantaj. Qankunapis yuyarikuychej, karu llajtayoj jinallataj Egipto jallp'api tiyakusqaykichejta. Noqamin Señor Diosniykichejqa kani.

³⁵Cheqan juiciota ruwankichej, imallatapis medishaspa, pesashaspa, waj imasta yakuta jina vendeshaspapis.

³⁶Qankunaqa cheqan balanzasniyoj kankichej, jinallataj cheqan pesasniyoj, cheqan chimpusniyoj ima. Noqamin Señor Diosniykichejqa kani. Noqamin qankunataqa Egiptomanta orqhomorqaykichej.

³⁷Ajinaqa, tukuy kamachiykunasniyta, imastachus nisqasniyta allinta ruwaspa cheqanta junt'aychej. Noqamin Señorqa kani.