Read Quechua Bolivia DC Bible LEVÍTICO 23 Bible Online

LEVÍTICO 23 - Quechua Bolivia DC Bible bible

LEVÍTICO 23

¹Señorqa Moisesman kay jinata parlarqa: Israelitasman niy kay jinata: Kay diaspi Señorpaj fiesta ruwankichej, chaypi qankunaqa tantakunkichej Señorta yupaychanaykichejpaj chay sumaj diapi.

³Sojta p'unchayta llank'anki, qanchis kaj p'unchaypitaj mana imatapis ruwankichu. Chay p'unchayqa qampaj uj sumaj p'unchay kanqa samarikunaykipaj. Sumaj tantakuytaj kanqa. Maypichá tiyakunki chaypi chay diaqa samarikunaykipaj, Señorta jatunchanaykipajtaj kanqa.

⁴Señormanta yuyarikuna p'unchaykunaqa kaykuna, mayqen p'unchaykunapichus qankuna tantakunkichej, chaykuna: Señormanta yuyarikuspa Pascuata ruwankichej qallarikuy killapi chunka tawayoj p'unchay ch'isiyaykushajtin.

⁶Chay kikin killapi chunka phishqayoj p'unchay kashajtin, mana levadurayoj t'anta fiestata, Señormanta yuyarikuspa. Chaymantataj qanchis p'unchayta mikhunkichej mana levadurayoj t'antallata.

⁷Ñaupaj kaj p'unchaypi tantakunkichej Señorta yupaychanaykichejpaj, amataj chay p'unchaypi ruwaychejchu ni ima ruwanata.

⁸Chay qanchis p'unchaykunapi Señorpaj rikuchikusta ruphachinkichej, qanchis kaj p'unchaypitaj Señorta yupaychanaykichejpaj tantakunkichej. Chay p'unchaypi ama ni imata ruwankichejchu.

⁹Señorqa Moisesman kay jinata parlarqa: Israelitasman kayta niy: Ima jallp'atachus qosqaykichej chayman chayaspa, chay jallp'api ñaupaj kaj poqochisqaykichej trigosta ruthuspa, sacerdoteman ñaupaj kaj marq'ata apankichej.

¹¹Samarikuna p'unchaypa q'ayantin sacerdote chay rikuchikuta Señorman rikuchenqa, ajinamanta qankuna bendicisqas kanaykichejpaj.

¹²Ima p'unchaychus Señorman chay trigo marq'ay rikuchikuta qonkichej, chay p'unchayllapitaj uj watayoj sumajnin kaj corderota jaywankichej Señorpaj ruphachisqa kanampaj.

¹³Chanta apamullankichejtaj sumajnin kaj ñut'u jak'uta tawa kilos khuskanniyojta aceitewan ñat'usqata, chayta Señorpaj ruphachenqa. Chay ruphachispa jaywasqampa q'apaynenqa Señorpaj allin kanqa. Chantapis apamullanqankutaj uj litro vinota jaywaspa ch'ajchunampaj.

¹⁴Ima p'unchaychus poqochisqasniykichejmanta Señorman rikuchikuta apanaykichejkamaqa, amaraj mikhunkichejchu t'antata, trigo jank'ata, nitaj llullu trigo espigastapis. Kay kamacheyqa wiñaypaj kanqa wawasniykichejpaj wawasninkama ruwanankupaj maypichá tiyakunkichej chaykunapi.

¹⁵Ima p'unchaychus chay trigo marq'ayta Señorman ofrendata jina rikuchinkichej samarikuna p'unchaypi chay q'ayantinmantapacha yupankichej qanchis semanasta.

¹⁶Samarikuna p'unchaypa q'ayantinkama yupankichej phishqa chunka diasta. Chaymanta Señorman qollankichejtaj mosoj rikuchikuta.

¹⁷Chaymanta apallankichejtaj wasiykichejmanta sumachaj iskay t'antasta, ñut'u jak'umanta levadurayoj ruwasqasta. Sapa ujnintaj tawa kilo jak'umanta kanqa. Chayqa kanqa Señorpaj ñaupaj kaj poqoymanta sumajnin kaj rikuchiku.

¹⁸T'antatawan khuska apankichej qanchis corderosta uj watayojta mana iman imanasqata, uj torillota, iskay carnerostawan. Chantaqa ch'aki mikhuykunamanta rikuchikusta, vinotawan jaywanapaj Señorman sumaj q'apashajta ruphachispa.

¹⁹Juchasmanta rikuchikuta jaywanapajqa uj chivota apamunkichej, allinyakuy rikuchikuta jaywanapajtaj iskay corderosta uj watayojtakama apamunkichej.

²⁰Sacerdoteqa chaykunata sumaj rikuchikuta Señorman jaywanqa, ñaupaj poqoykunamanta ruwasqa t'antasta, iskay corderostawan. Chaykunaqa Señorman t'aqasqas, sacerdotespajtaj kanqanku.

²¹Chay kikin diallapitaj qankunapis ruwankichej sumaj tantakuyta, chaypachataj ama imatapis ruwankichejchu. Kay kamacheyqa tukuy mirayniykichejpaj wiñaypaj kanqa, maypichá tiyakunkichej chaypi.

²²Maypachachus cosecha chayamojtin ama tukuyninta oqharinkichejchu, nitaj espigastapis chajmakapunkichejchu, chaykunataqa saqankichej wajchaspaj, karu llajtayojkuna ima chajmakunankupaj. Noqamin Señorqa kani, qankunaj Diosniykichej.

²³Señorqa Moisesman kay jinata parlarqa: Israelitasman kayta niy: Qanchis kaj killapi ñaupaj kaj diapi uj samarikuna p'unchayta ruwankichej, tukuyniykichej sumajta tantarikuspa cornetasta waqarichinkichej.

²⁵Chay p'unchaypi uj sumaj rikuchikuta Señorpaj ruphachinkichej, manataj imatapis chay p'unchaypi ruwankichejchu.

²⁶Señorqa Moisesman kay jinata parlarqa: Chay kikin qanchis kaj killapi chunka diampi perdonta tarina p'unchay kanqa. Chaypaj ruwankichej sumaj tantakuyta, ayunanaykichejpaj, rikuchikuta Señorpaj ruphachinaykichejpajtaj.

²⁸Chay p'unchaypeqa amapuni imatapis ruwankichejchu, imaraykuchus chay p'unchayqa perdonta tarina p'unchay, mayqempichus Señorniykichej Diosmanta perdonta tarinkichej.

²⁹Pichus chay p'unchayta mana allimpajchu qhawanqa ayunaspa chayqa, pipis kachun ayllusnin ukhumanta chinkachisqa kanqa.

³⁰Pichus chay p'unchay imatapis ruwanqa chayqa, pipis kachun ayllun ukhumanta chinkachisaj.

³¹Chaypi amapuni imatapis ruwankichejchu. Kayqa uj kamachiy wiñaypaj tukuy mirayniykichejpaj, maypichá tiyakunkichej chaypi.

³²Chayqa qankunapaj kanqa uj samarikuna p'unchay, qankuna ayunanaykichejpaj, chay p'unchayta waqaychanaykichejpaj, chay killapi isq'on diaj ch'isiyayninmanta q'ayantin diaj ch'isiyayninkama.

³³Señorqa Moisesman kay jinata parlarqa: Israelitasman kay jinata niy: Chay kikin qanchis kaj killapi chunka phishqayoj día kashajtin, qanchis p'unchay junt'ata ramada raymita ruwachunku Señorta yupaychaspa.

³⁵Qallarikuy p'unchaypi sumaj tantakuy kanqa. Chaypachataj ama imatapis ruwankichejchu.

³⁶Qanchis kaj p'unchaykunapi rikuchikusta Señorpaj ruphachinkichej. Pusaj kaj p'unchaypitaj tantakunkichej Señorta yupaychanaykichejpaj. Chanta Señorpaj rikuchikusta ruphachillankichejtaj. Chay p'unchayqa fiesta p'unchay, chayrayku ama imatapis ruwankichejchu.

³⁷Kaykuna kanku Señorpaj t'aqasqas p'unchaykuna, mayqenkunapichus qankuna sumaj tantakuyta ruwankichej, chantapis chaykunallapitaj Señorman jaywankichej rikuchikusta ruphachispa, rikuchikusta ruphachinapaj ch'aki mikhuy rikuchikusta, vino rikuchikustawan. Chaykunata jaywanqanku p'unchayninman jina.

³⁸Chaywampis jaywallankichejtaj Señorpa samarikuna p'unchaykunasninmanta, rikuchikusmantapis, ofrendasta qosaj nisqaykichejmantapis wajtapuni jaywankichej.

³⁹Qanchis kaj killapi chunka phishqayoj kaj diapi cosechasniykichejta oqharisqaykichejmantaña, Señorta yupaychaspa fiestata ruwankichej qanchis p'unchayta. Samarikunkichejtaj ñaupaj kaj diapi, pusaj kaj diapi.

⁴⁰Ñaupaj kaj p'unchaypi tantakunkichej sumaj kaj sach'aspa poqoykunasninta, palma ramasta, ramarara sach'aspa palqasninta, mayu saucesta ima. Ajinata qanchis p'unchay junt'ata kusikunkichej Señor Diosniykichejpa ñaupaqempi.

⁴¹Chay fiestataqa sapa wata ruwankichej qanchis kaj killapi qanchis p'unchayta Señorta yupaychaspa.

⁴²Chay qanchis p'unchay enterota tiyankichej tukuy nacesqaykichejmantapacha kajkuna israelitas chay ramadas ukhupi.

⁴³Ajinamanta tukuy mirayniykichej yachanqanku noqa Egiptomanta israelitasta orqhomushajtiy, paykunata ramadas ukhupi tiyachisqayta. Noqa qankunaj Señor Diosniykichej kani.

⁴⁴Ajinata Moisesqa israelitasman kamacherqa, Señorta yupaychanapaj fiestasmanta.