Read Quechua Bolivia DC Bible LEVÍTICO 24 Bible Online

LEVÍTICO 24 - Quechua Bolivia DC Bible bible

LEVÍTICO 24

¹Señorqa Moisesman kay jinata parlarqa: Israelitasta kamachiy, apamunankuta sumajnin kaj olivo aceiteta k'anchanaspaj ajinamanta k'anchanallankupajpuni.

³Chay k'anchaykunata allinta Aaronqa ch'isiyaymanta sut'iyaykama, Señorpa ñaupaqempi k'anchanallankupajpuni, Dioswan parlana toldopi, Diospa tratonwan kaj cajón qayllapi, velomanta jawapi. Kay kamacheyqa tukuy mirayniykichejpaj wiñaypaj kanqa.

⁴Aaronqa chay k'anchanata churanqa ch'uwa qorimanta ruwasqa jatun sayachina k'anchanaman, Señorpa ñaupaqempi k'anchanallampajpuni.

⁵Sumajnin kaj jak'umanta chunka iskayniyoj t'antata ruwaspa sayachiy, sapa ujnin kachun tawa kilosmanta.

⁶Chaytataj churanqa Señorpa ñaupaqenman ch'uwa qorimanta ruwasqa mesaman, iskayman t'aqaspa sapa uj ladoman sojtakama sinrullata.

⁷Sapa uj sinru patamantaj sumaj kaj inciensota churanki, chaytaj kanqa yuyarikuna rikuchiku Señoraj ruphachisqa ofrenda jina.

⁸Kaytaqa sapa samarikuna p'unchay Señorpa ñaupaqenman churanaykichejpuni, israelitaspa sutinkupi. Kay tratoqa wiñaypaj kanqa.

⁹Kay t'antasqa Aaronmpata wawasnimpatawampuni kashan. Chanta chaykunata paykuna mikhukapunanku tiyan, Diospaj nisqa llimphu cheqapi. Ofrendasqa Señorpaj ruphachisqasmantaqa aswan sumajpuni kayqa.

¹⁰Israelitas ukhupi karqa uj runa, mamanmanta israelita, tatanmantataj egipcio. Mamampa sutin karqa Selomit, pay karqa Dibrej wawan Dan ayllumanta. Chay runaqa uj israelitawan k'aminakuyta qallarerqanku.

¹¹Chay israelita warmej wawanqa Diospa contranta rimarqa, Diospa sutinta maldicispa. Chayrayku Moisesman pusamorqanku.

¹²Jinaspataj chay runataqa waqaycharqanku Señor imatachus kamachinankama.

¹³Chaymantataj Señorqa Moisesman kay jinata parlarqa: Jaramanta jawaman orqhoy chay pichus maldiciwajta. Chay nisqanta uyarejkunataj makisninkuta paypa uman pataman churachunku, jinaspataj tukuy runas rumiwan ch'anqaspa wañuchichunku.

¹⁵Kunanqa israelitasman niy: Mayqellampis Diosnimpa sutinta maldicejqa juchachasqa kanqa.

¹⁶Pillapis Señorpa contranta rimajtaqa tukuy runas rumiwan ch'anqaspa wañuchenqanku. Señorpa contranta rimajqa karu llajtayojpis kachun, chayri israelitapis kachun, wañuchisqa kanqa.

¹⁷Pillapis runa masinta wañuchejqa, wañuchisqallataj kanqa.

¹⁸Pillapis waj runaj wakanta wañuchejqa kutichinan tiyan, uywamanta uywallatataj.

¹⁹Pillapis ima sajrata ayllu masimpaj ruwajmanqa, chay jina sajrallatataj payman kutichenqanku.

²⁰Imata p'akin chayqa, pay p'akisqallataj kanqa, ñawimanta ñawi, kirumanta kiru; imatachus waj runajta nanachin, chay kikin nanachisqallataj pay kanqa.

²¹Pichus uj runaj uywanta wañuchejqa, kausashaj uywata kutichinan tiyan. Pichus uj runata wañuchejqa wañuchisqallataj kanqa.

²²Chay kamachiyllapuni karu llajtayojkunapajpis kanqa, jinallataj chay kikin llajtayojkunapajpis. Noqamin kani Señor Diosniykichejqa.

²³Chay Moisesqa israelitasman willarqa. Paykunata pichus Diospa contranta parlajta, jaramanta jawaman orqhorqanku. Chaypitaj rumiwan ch'anqaspa wañucherqanku. Chayta israelitasqa ruwarqanku imaynatachus Señorqa Moisesman kamachisqanman jina.