Read Quechua Bolivia DC Bible LEVÍTICO 26 Bible Online

LEVÍTICO 26 - Quechua Bolivia DC Bible bible

LEVÍTICO 26

¹Ama ruwakunkichejchu ima lantitapis, nitaj imaman rijch'akojtapis. Llajtaykichejpeqa yupaychana rumitapis ama sayachinkichejchu, nitaj rumispipis warawasta ruwankichejchu. Chantaqa ama chaykunaman qonqorikunkichejchu, imaraykuchus noqamin kani qankunaj Señor Diosniykichej.

²Samarikuna p'unchaykunasniyta waqaychaychej, maypichus tiyakunay chaytapis allimpaj qhawaychej. Noqamin Señorqa kani.

³Sichus leyesniypi purinkichej, allintataj waqaychankichej kamachisqasniyta, chaykunatataj kasunkichej chayqa, jallp'aykichejman parachimusaj maychus tiempompi. Jallp'aykichejqa sumajta poqonqa, poqoy sach'asniykichejpis sumaj poqoyniyoj kanqa.

⁵Trigo oqharisqaykichejqa uvas pallanaykichejkama kanqa. Uvasniykichejtaj kapusonqachej tarpuy tiempokama. T'antata mikhunkichej sajsakunaykichejkama. Tukuy sonqo allinta tiyakunkichej chay jallp'api.

⁶Qankunaman qosqaykichej allin kakuyta chay jallp'api, manataj pata patallatachu puñunkichej; noqa chay jallp'ata jark'asaj sajra monte animalesmanta, jinallataj ch'ajwasmanta.

⁷Qankunaqa enemigosniykichejta ayqechinkichej, paykunataj ñaupaqeykichejpi espadawan t'ojsisqas wañuranqanku.

⁸Qankunamanta phishqalla pachaj runasta ayqechinkichej. Qankunamanta pachaj runastaj chunka waranqa runasqa ayqechenqanku. Jinamanta qankunaj ñaupaqeykichejpi enemigosniykichejqa espadawan t'ojsisqas wañuranqanku.

⁹Qankunata sumajta qhawasqaykichej, ashkhatataj mirachisqaykichej. Chantapis tratoyta qankunawan mana p'akisajchu.

¹⁰Ñaupajmanta rezago trigota mikhunkichej. Mosoj trigota waqaychanaykichejpaj rezagota jawaman orqhonkichej. Noqa qankuna chaupipi tiyakusaj, manataj qhesachasqaykichejchu.

¹²Noqa qankunaj chaupiykichejpi purisajpuni Diosniykichej kasaj, qankunataj noqaj aylluy kankichej.

¹³Noqamin kani qankunaj Señor Diosniykichejqa. Noqa Egiptomanta orqhomorqaykichej, manaña paykunaj wata kamachisnin kanaykichejpaj. Noqa yugoykichejpa coyundasninta p'itirani. Umaykichejta patata oqharichispa puricherqaykichej.

¹⁴Sichus qankuna mana kasuwankichejchu, nitaj kamachisqasniytapis allinta junt'ankichejchu, manachayqa qhesachankichej, mana allimpajtaj qhawankichej, kamachisqasniyta, nisqasniytapis, ajinamanta mana junt'aspa tukuy kamachisqasniyta, tratoytapis p'akinkichej chayqa, noqapis qankunawan kaj jinata ruwasaj, sinch'i manchayta apachimusqaykichej, wañuchej onqoyta, q'oñi onqoyta, ñawi onqoyta, tulluyay onqoytawan. Qhasilla tarpunkichej, enemigosniykichejtaj mikhuykaponqanku.

¹⁷Noqapis qankunaj contraykichejpi kasaj, enemigosniykichejtaj atipasonqachej. Chay enemigosniykichej qankunata kamachisonqachej, qankunataj mana pi ima nishajtillan ayqekunkichej.

¹⁸Kay tukuywampis manapuni kasuwankichejchu chayqa, qanchis kutita jasut'isqaykichej juchasniykichejrayku.

¹⁹Wapu wapu runaykachayniykichejta phirita ruwasaj, manataj parachimusajchu, jinamanta jallp'asniykichejpis mana poqonqankuchu.

²⁰Qhasillata kallpaykichejta tukuchinkichej, imaraykuchus jallp'apeqa manapuni imapis poqonqachu, ni campo sach'aspis poqonqankuchu.

²¹Sichus contrallaypipuni kankichej, manapunitaj kasuwankichejchu chayqa, uj qanchis kutitawan jasut'isqaykichej juchasniykichejman jina.

²²Qankunaj jallp'asniykichejman apachimusaj sajra monte animalesta wawasniykichejta mikhunankupaj, uywasniykichejtapis tukuchinankupaj. Jinamanta qankunapis pisiyankichej, ñankunasniykichejpis ch'inllaña qhepakonqanku.

²³Chay tukuywampis manapuni kasuwankichejchu, noqaj contrallaypuni kankichej chayqa, noqapis qankunaj contraykichejman tukusaj. Uj qanchis kutitawantaj jasut'isqaykichej juchasniykichejman jina.

²⁵Qankunaj pataykichejman maqanakuta apachimusaj, tratonchejta p'akisqaykichejrayku. Qankunataj ayqekunkichej llajtasniykichejman pakakoj. Noqataj chayman onqoykunata apachimusqaykichej, jinamanta qankunaqa enemigosniykichejpa makisninkuman urmankichej.

²⁶Maypachachus mikhunaykichejta pisiyachisaj chaypacha chunka warmis uj hornollapi t'antata chayachenqanku. Paykunaqa qankunaman may pisi t'antata qosonqachej, manataj sajsakunkichejchu.

²⁷Ajina kashajtimpis manapuni kasukunkichejchu, manachayqa contrallaypipuni kankichej chayqa, noqapis qankunaj contraykichejpi kasaj. May phiñakuywantaj qanchis kutitawan jasut'isqaykichej juchasniykichejrayku.

²⁹Jinamanta qankunaqa mikhunkichej qhari wawasniykichejta, warmi wawasniykichejtapis.

³⁰Noqataj t'unarasaj lomas patapi lantista yupaychana wasisniykichejta, incienso altaresniykichejtapis. Qankunaj ayasniykichejta chay mana kausayniyoj lantisniykichej pataman churamusaj. Ajinamanta chejniyniyta rikuchisqaykichej.

³¹Llajtasniykichejta raqayasta saqesaj, chinkachisaj yupaychana wasisniykichejtapis. Sumaj q'apashaj jaywawasqaykichejtapis manaña jap'isqaykichejchu.

³²Llajtaykichejta t'unasaj, chaymantaj tiyakoj jamonqanku enemigosniykichej. Paykunataj t'ukushaj qhepakonqanku.

³³Qankunaman maqanakuta apachimusaj, qankunata waj nacionesman ch'eqerachisqaykichej. Jallp'asniykichej ch'inman tukonqa, llajtasniykichejtaj manchay manchachikuna raqayasman tukonqanku.

³⁴Chaymanta jallp'asniykichej samarikonqanku, raqayas jina kanankukama, qankuna enemigosniykichejpa jallp'asninkupi kausamunaykichejkama. Ajinamanta jallp'aqa chay p'unchaykunapi samarikonqanku, ñaupajta mana samarikusqankumanta.

³⁵Raqayaypi kanankama jallp'aqa samakonqa, qankuna chaypi tiyashajtiykichej mana samakushankumanta.

³⁶Pikunachus enemigoj llajtampi kausankichejraj chaykunaman sinch'i manchachikuyta qosqaykichej, ayqenkichejtaj sach'a laqhe urmaspa chhaj nejtillan. Ajinata ayqenkichej pipis espadawan qhatishasunkichejman jina. Jinamanta qankunaqa mana pi imanashajtillan urmankichej.

³⁷Qankunapuralla takanakuspa urmarankichej, wañuchinakuy ch'ajwamantapis ayqeshawajchej jina, mana ni pipis qankunata qhatishajtillan. Ni mayqenniykichej enemigoykichejman kutichikuyta atinkichejchu.

³⁸Ajinamanta qankunaqa waj naciones chaupipi tukukunkichej, enemigosniykichejpa jallp'an tukuchisonqachej.

³⁹Chanta pikunachus kausasqankichejraj enemigosniykichejpa jallp'asnimpi chaykunaqa, juchasniykichejrayku umphuyankichej. Tatasniykichejwan khuska wañunkichej paykuna juchachasusqankurayku.

⁴⁰Qankunaqa niychejpis juchayoj kasqaykichejta, tatasniykichej juchayoj kasqankutapis, noqata qhesachawasqankuta contrayta juchachakusqankutapis.

⁴¹Noqapis qankunaj contraykichejta ruwasaj, pusasqaykichejtaj enemigosniykichejpa llajtanman. Chaypitaj sajra yuyayniykichej k'umuykukonqa. Juchasniykichejmanta jasut'isqaytataj allimpaj qhawankichej.

⁴²Chaymantaraj yuyarikusaj trato ruwasqaymanta Jacobwan, Isaacwan, Abrahamwan ima. Jinallataj yuyarikusaj ima jallp'atachus qosqaymantapis.

⁴³Jinamanta chay jallp'aqa qankunamanta samarikonqa, qankuna chaypi mana tiyanaykichejkama. Qankunaqa juchasniykichejrayku junt'anaykichej tiyan, kamachisqasniyta, leyesniytawan qhesachasqaykichejrayku.

⁴⁴Chay tukuywampis enemigoj llajtampi tiyakushajtiykichejpis, noqaqa mana qhesachasqaykichejchu, mana tukuchisqaykichejchu, nitaj ñaupa tatasniykichejwan tratota ruwasqaytapis p'akisajchu. Noqamin kani qankunaj Señor Diosniykichejqa.

⁴⁵Chantapis yuyarikullasajtaj, ima tratotachus Egiptomanta orqhomushaspa ruwasqayta, waj naciones rikushajtinku, Israelpa Diosnin kanaypaj. Noqamin Señorqa kani.

⁴⁶Kaykunamin kanku Señorpa leyesnin, imatachus kamachisqasnin, yachachiykunasnin ima, mayqenkunatachus Moisesnejta Señorqa Sinaí orqopi israelitasman qorqa.