Read Quechua Bolivia DC Bible LEVÍTICO 8 Bible Online

LEVÍTICO 8 - Quechua Bolivia DC Bible bible

LEVÍTICO 8

¹Señorqa Moisesman kay jinata parlarqa: Kunanqa Aaronta, wawasnintawan jap'iy. Chantapis oqharikuy sacerdote p'achasta, jawina aceiteta, juchasrayku wañuchina uj waka uñata, iskay corderosta, mana levadurayoj t'antasniyoj canastastawan.

³Tukuy israelitasta Dioswan tinkukuna toldo punkuman tantachiy.

⁴Moisestaj Señorpa kamachisqanman jina ruwarqa. Runasqa Dioswan tinkukuna toldo punkuman tantakamorqanku.

⁵Chaypitaj Moisesqa tukuy israelitasman nerqa: Señorqa kayta nin ruwanata.

⁶Chaymantataj Moisesqa Aaronman, wawasninmanwan nerqa payman qayllanankuta. Qayllajtinkutaj paykunata yakuwan mayllarqa.

⁷Aaronmantaj p'achata churarqa, chumpiwantaj mat'iykorqa. Patanmantaj qhatakuna p'achata churarqa; chaypa patanmantaj churaykorqa efod p'achata, sumajta wataykorqa chay efodpa watusnillanwantaj.

⁸Chaypa patanmantaj warkhuykorqa warkhuna nisqa walqa ch'uspata jina. Chaymantataj churarqa Urim Tumim nisqa cheqanchaj imasta.

⁹Umanmantaj churarqa uj muru ch'uluta, chay ch'uloj ñaupajninmantaj k'askaykucherqa uj p'altachasqa qori pilluta, sacerdotepaj t'aqasqa kasqan yachakunampaj, Señor Moisesman kamachisqanman jina.

¹⁰Chaymanta Moisesqa t'aqasqa jawina aceiteta oqharispa, jich'arqa Dioswan tinkukuna toldomanta, imachus chay ukhupi kajkunamanwan, Señorpaj t'aqasqa kanampaj.

¹¹Chay kikin aceitellawantaj qanchis kutita altarta ch'ajchorqa. Chaymantataj altarman jich'aykorqa, chaypi kaj tukuy imasmanwan. Chaymantataj ch'ajchullarqataj mayllakuna ch'illamisman, sayanantawan, Señorpaj t'aqasqa kanampaj.

¹²Chaymanta Moisesqa Aarompa umanman chay ajllaspa jawina aceitewan jich'aykorqa, sacerdotepaj t'aqasqa kanampaj.

¹³Chaymantaqa Aarompa wawasnintañataj wajyarqa. P'achastataj churakunankupaj jaywararqa, chumpicherqataj. Chaymantataj umasninkuman muru ch'ulusta churaracherqa, imaynatachus Señorqa Moisesman kamachisqanman jina.

¹⁴Chaymantataj Moisesqa kamacherqa, juchasrayku rikuchiku jaywasqa waka uñata apamunankuta. Aaronwan, wawasninwan imataj chay waka uñaj umanman makisninkuta churararqanku.

¹⁵Chaymantataj Moisesqa chay waka uñata ñak'arqa, pisi yawarta jap'ispataj maki dedonwan altarpa cantosnimpi wajras jina ruwasqa karqanku chaykunata jawerqa tukuy muyuynintinta t'aqasqa kanampaj. Chaymanta puchoj yawarwantaj altarpa muyuyninta jich'arqa. Ajinamanta altarqa t'aqasqa karqa, allinyakuytataj tarinankupaj.

¹⁶Chay qhepatataj Moisesqa wiracharqa chay uywaj tukuy ch'unchula wirasninta, kukupi patasnimpi kaj wirasninta, chantaqa iskaynin lurun wirasninta ima khuchukarqanku. Tukuynintataj altar patapi ruphaykucherqa.

¹⁷Uywaj wakin puchoj aychasnintataj, qaranta, wanuntawan jaramanta jawaman orqhospa Moisesqa ninawan ruphaykucherqa, Señorqa payman kamachisqanman jina.

¹⁸Chaymanta Moisesqa nerqa qayllachinankuta rikuchiku jaywasqa corderota ruphachisqa kanampaj. Chay uywaj umanmantaj Aaronwan, wawasninwan makisninkuta churarqanku.

¹⁹Moisestaj chay uywata ñak'arqa, yawarnintataj ch'ajchorqa altar pataman, muyuyninmanwan.

²⁰Chay corderotaqa khuchurarqa. Chaymantataj umanta aycha khuchurasqata, wirasnintawan ruphacherqa.

²¹Chaymantataj ñak'asqa corderoj ch'unchulasninta, piernasnintawan, tukuyninta altar patapi ruphacherqa. Chay ruphachispa jaywasqampa q'apaynenqa Señorpaj sumaj karqa, Señorqa Moisesman kamachisqanman jina.

²²Chay qhepata Moisesqa apachimorqa ujnin corderotañataj llimphuchakuypaj kajta. Chaypa umanmantaj Aaronwan wawasninwan makisninkuta churarqanku.

²³Chaymantataj Moisesqa chay corderota ñak'arqa, uj pisi yawarninwantaj Aarompa paña ningrimpa uranta jawiykorqa, jinallataj paña makimpa mama dedonta, paña chakimpa mama dedontawan.

²⁴Chaymanta Moisesqa Aarompa wawasnintañataj qayllachimorqa. Kikillantataj yawarwan jawirarqa paña ningrinkoj uranta, paña makinkoj mama dedonta, paña chakinkoj mama dedontawan. Jinaspataj chay puchoj yawarta ch'ajchorqa altarpa patanman, muyuyninmanwan.

²⁵Chaymanta Moisesqa orqhorqa uywaj wirasninta, chupanta, ch'unchulasninta, tukuy wirasnintinta, wirasninta, iskaynin lurunisninta wirasnintinta, paña piernantawan.

²⁶Mana levadurayoj t'antayoj canastamanta, Señorpa ñaupaqenman apamusqankumanta, Moisesqa uj tortillata mana levadurayojta orqhorqa, uj tortillatataj aceitepi chayasqata, uj p'alta t'antatawan. Chaytataj churarqa wirawan, paña pierna aychantawan khuskata.

²⁷Tukuy chaykunata Aarompa makisninman wawasnimpa makisninmanwan jaywarqa Señorpa ñaupaqempi chayta rikuchinankupaj.

²⁸Chaymantataj Moisesqa makisninkumanta chaykunata jap'iytawan altarpi ruphacherqa, rikuchiku uywatawan khuska. Chayqa uj rikuchiku Señorpaj t'aqasqas kasqankumanta. Chay ruphachispa jaywasqampa q'apaynenqa Señorpaj allin karqa.

²⁹Moisesqa pecho aychanta oqharispa chayta Señorpa ñaupaqenman rikucherqa. Chay t'aqasqa corderoj pecho aychanqa Moisesman chayarqa, Señor payman kamachisqanman jina.

³⁰Chaymanta Moisesqa t'aqasqa jawina aceitemanta, altar patapi kasharqa chay yawartawan oqharerqa. Chaymantataj Aaronman wawasninmanwan ch'ajchuykorqa, tukuyninkoj sacerdote p'achasninkutawan. Ajinata Moisesqa Señorpaj t'aqarqa, Aaronta, wawasninta, tukuyninkoj sacerdote p'achasninkutawan.

³¹Chaymanta Moisesqa Aaronman wawasninmanwan kay jinata nerqa: Dioswan parlana toldo punkupi aychata chayachiychej, chay kikimpitaj mikhuychej, Señorpaj t'aqasqa t'anta canastapi kashan chaytawan, Señorpuni kay jinata kamachisqanman jina: Aaronwan, wawasninwan kay aychata mikhonqanku, nispa.

³²Chaymanta puchoj aychata, t'antatawan ruphachinkichej.

³³Chantapis ama karunchakunkichejchu Dioswan tinkukuna toldo punkumanta qanchis p'unchayta sacerdoteswan tukunaykichejkama.

³⁴Señorqa kamachin juchachakusqaykichejmanta perdonta tarinaykichejpajqa, ruwanaykichejta kunan ruwakushan ajinata.

³⁵Chayrayku qankunaqa Dioswan tinkukuna toldo punkupi kanaykichej tiyan tuta p'unchay, qanchis día junt'ata. Señorpa kamachisqanta kasuychej, manataj wañunkichejchu. Ajinata ari Señorqa kamachiwarqa.

³⁶Aaronqa wawasninwan ruwarqanku Señorpa Moisesnejta tukuynin kamachisqasninta.