Read Quechua Bolivia DC Bible JEREMÍAS 1 Bible Online

JEREMÍAS 1 - Quechua Bolivia DC Bible bible

JEREMÍAS 1

¹Hilciaspa wawan Jeremiaspa parlasqasninmanta, ruwasqasninmantawan willaykunas. Benjamín aylloj jallp'ampi Anatot llajtapi, sacerdote ayllus tiyakorqanku. Jeremiastaj chay ujnin kaj ayllumanta karqa.

²Jeremiasman Señor parlaykorqa, Amompa wawan Josías chunka kinsayoj watataña Judá jallp'api kamachishajtin.

³Chantá parlallarqataj Josiaspa wawan Joacín Judapi rey kashajtin, jinallataj Josiaspa ujnin wawan Sedequías, chunka ujniyoj watataña Judapi kamachinankama. Chayri, chay watamanta phishqa killankama, mayk'ajchus Jerusalempi tiyakojkuna jallp'ankumanta waj jallp'aman wijch'usqas karqanku chaypacha.

⁴Señorqa noqaman parlamuwaspa niwarqa: Manaraj qanman kausayta qoshaspa noqa ñapis qantaqa ajllarqaykiña. Manaraj paqarishajtiyki ñapis t'aqarqaykiña, nacionespa profetanku kanaykipaj.

⁶Noqataj kuticherqani: Ay Señor! Noqaqa waynallaraj kani, manaraj sumajta parlayta atinichu!

⁷Señortaj niwarqa: Ama waynallaraj kani nispaqa niwaychu. Qanqa rinayki tiyan maymanchus kachasqayki chayman; imatachus kamachisqayki chayta willamunki.

⁸Ama pitapis manchachikuychu. Noqaqa qanwan kasaj waqaychanasuypaj. Noqa Señor chayta nini.

⁹Chaypacha Señorqa makinwan simiyta llujchiykuworqa, niwarqataj:

¹⁰Noqa simiykiman palabrasniyta churani. Noqa kunan p'unchay atiyta qoyki aylluspi nacionespitaj, sik'inaykipaj, thuñinaykipaj, phirinaykipaj, t'unanaykipajtaj, chantá atillankitaj watejmanta jatarichiyta, sayachiytapis.

¹¹Señorqa noqaman parlamuwaspa nillawarqataj: Jeremías, imatataj rikunkiri?, nispa. Uj almendro k'aspita rikuni, nispa kuticherqani.

¹²Walej chay rikusqaykeqa, nispa Señorqa niwarqa. Jinaqa noqa allinta qhawasaj kay tukuy nisqasniy junt'akunanta.

¹³Iskay kaj kutipi Señorqa parlamullawarqataj kay jinata: Imatataj rikunkiri?, nispa tapuwarqa. Uj t'impushaj mankata rikuni, pata ladomanta jina jich'akamushajtaña, nispa kuticherqani.

¹⁴Chaypacha Señorqa niwarqa: Pata ladomantapacha ñak'areyqa jich'akamonqa, kay jallp'api tukuy tiyakojkunaj patanman.

¹⁵Noqa Señor cheqamanta niykichej: Pata ladomanta chay tukuy nacionesta wajyamusaj. Reyes jamonqanku, kikin Jerusalempa yaykunasnin punkusnimpitaj tiyanasninkuta churanqanku. Jerusalempa perqasnimpa qayllasninman jina, chantá Judá llajtas qayllamantaj.

¹⁶Kay jasut'i kanantamin kamachisaj saqerpayawarqanku chay juchasapaspa contrampi. Paykunaqa inciensota q'osñichispa yupaycharqanku chay mana rejsisqa dioskunata, paykuna kikinku ruwakusqankuman jaywaspa.

¹⁷Qantaj mat'ita chumpiykukuspa kallpachakuy. Riy, willamuytaj imatachus kamacherqayki chayta. Ama paykunamanta manchachikuychu, mana jina kajtenqa noqa kikiy paykunaj ñaupaqenkupi kharkatichisqayki.

¹⁸Kunan p'unchay noqa churayki, may sinch'i jark'achisqa llajtata jina, fierromanta ruwasqata jina, broncemanta perqa ruwasqata jina, tukuy Judá jallp'aj contrampi sayanaykipaj; jinallataj reyesnimpa, kurajkunasnimpa, sacerdotesnimpa, llajtapi tukuy kajkunaj contrampi ima.

¹⁹Paykunaqa qanwan maqanakusonqanku, manataj atipasonqankuchu, imaraykuchus qanwan noqa kasaj jark'asunaypaj. Noqa Señor chayta nini.