Read Quechua Bolivia DC Bible JEREMÍAS 10 Bible Online

JEREMÍAS 10 - Quechua Bolivia DC Bible bible

JEREMÍAS 10

¹Uyariy, qan Israel ayllu; kay willayta Señorqa apachimusunki.

²Señorqa nin: Ama waj nacionespa ruwasqasnillantataj ruwaychejchu, nillataj cielopi ima t'ukunas kajtin mancharikuychejchu, waj nacionespi jinaqa.

³Chay aylluspa ususninkoqa mana imapaj walejchu. Montepi uj k'aspita k'utuytawan cincelninwan llajllanku.

⁴Chay qhepantataj qolqewan, qoriwan k'achanchaykunku, chantaqa clavoswan, martillowantaj mana urmanampaj sumajta k'askaykuchinku.

⁵Chay lantisqa p'isqo manchachiman rijch'akunku, imaynatachus chajra tarpusqaman manchachita churanku ajinata; chay lanteqa mana parlanchu, waj q'epiykachanaraj, imaraykuchus mana purinkuchu. Ama paykunamantaqa manchachikuychejchu. Chaykunaqa mana sajrata ruwankuchu, manataj allin kajtapis ruwankuchu.

⁶Señor, mana pipis qan jina kanchu: Qanqa jatun kanki, sutiykeqa may jatun atiyniyojtaj.

⁷Pitaj qanta mana manchachikusonqachu nacionespa reynintari? Qanqa manchachikunapaj nisqa kanki. Tukuy yachayniyojkunamanta, reyesmantapis manapuni qan jinaqa kanchu.

⁸Tukuy paykuna wampus kanku, mana uj chhikan yachayninkupis kanchu. Uj juch'uy k'aspillaqa mana imatapis yachachinchu.

⁹Lantisninkoqa Tarsismanta qolqe apamusqallankumanta, Ufasmantawan qorita apamusqallankumantawan kanku. Chaykunaqa k'aspi llajllajkunaj, jinallataj titi jich'ajkunaj ruwasqallan kanku. P'achasnimpis lila telasmanta, jinallataj puka telasmanta k'achituta ruwajkunaj ruwasqasnin kanku.

¹⁰Señorqa cheqan Diospuni, kausaj Diospuni, wiñaypaj reytaj. Maypachachus pay phiñarikun chayqa, jallp'antin kharkatitin. Nacionestaj phiñakuyninta mana jap'ikuyta atinkuchu.

¹¹Qankuna, Israelitas, niychej lantista yupaychajkunaman: Chay dioskunaqa mana kay pachata, nitaj janaj patatapis ruwarqankuchu, chaykunaqa kay pachamanta chinkarenqanku, mana ujllapis janaj pachaj urampeqa qhepakonqañachu.

¹²Señorqa atiyninwan kay pachata ruwarqa, yachayninwantaj mundota sayacherqa, yachayniyoj kasqanwantaj janaj pachatapis aysatatarqa.

¹³Jatun sinch'i qhapariyninwan janaj pachapi yakuspis tantakunku, jallp'aj cantosninmantapacha phuyusta wicharichimun, paramunampajpis lliuj lliujkunasta k'ancharichimun, jallch'asqa kasqanmanta wayrasta orqhomun.

¹⁴Tukuy runas mana yuyayniyojkuna, wampustaj kanku, pichus lantikunata ruwajqa p'enqaypi rikhurin, chaykunaqa yanqha lantislla, manataj kausayniyojchu kanku.

¹⁵Chaykunaqa qhasi manakaj, asikunapaj jinataj, juicio p'unchaypi chinkachisqas kanqanku.

¹⁶Waj jinapuni kay tukuy imasta ruwajqa, chaymin Jacobpa Diosnenqa. Paymin Israel aylluta paypata kanampaj ajllakorqa. Tukuy Atiyniyoj Señormin sutenqa. Profetaqa nin:

¹⁷Qan nación muyuykusqa llajtaspi tiyakoj, tukuy kapuyniykita oqhariy.

¹⁸Imaraykuchus Señorqa nin: Kunan kutipeqa kay jallp'api tiyakojkunata karuman wijch'usaj. Ñak'ariykunasmantaj churasaj, ichachus jinamanta tariwankuman. Nación kutichin:

¹⁹Ay noqamanta, mana imayoj llakiyllapiña rikhurini! Nanachikusqasneyqa mana thañiy atej! Kay nanaytaqa ñak'ariylla kasqanta yuyarqani.

²⁰Toldosniypis tukuynin llik'irasas kashanku, tukuy watanasnimpis p'itirasqas kashanku. Wawasniypis saqerapuwanku, manaña kankuchu, manaña pipis toldosniyta oqharipuwajqa kanchu, nitaj lonasninta aysaykurejpis kanchu. Profeta kutichin:

²¹Kay aylluta michejkunaqa wampus kanku; Señorta mana mask'ankuchu. Chayraykumin paykunaqa mana allinchu rinku, tukuy uywasninkupis ch'eqerasqas kashanku.

²²Allinta uyariychej, uj willay chayamun! Pata lado llajtasmanta uj jatun ch'ajway jamushan, chaytaj Judáj llajtasninta uj ch'in pampaman tukuchenqa atojkunallaña kausanankupaj jina.

²³Señor, yachani runaqa kausayninmanta mana dueñochu kasqanta, nitaj kausaynimpi maymanchus rinantapis kamachiyta atisqanta.

²⁴Jasut'iwayku, yachachiwayku, cheqan kasqaykiman jina. Señor, amataj phiñakuywanchu, manachayqa wañuchiwaykumanchari.

²⁵Phiñakuyniykita kachaykuy, qanta mana rejsisunkuchu chay nacionespa patanman; jinallataj pikunachus sutiykita mana oqharinkuchu chaykunaman, imaraykuchus Judá aylluta mana ujniyojta tukorqochinku, jinamanta llajtataqa raqaykunasllataña saqerparinku.