Read Quechua Bolivia DC Bible JEREMÍAS 12 Bible Online

JEREMÍAS 12 - Quechua Bolivia DC Bible bible

JEREMÍAS 12

¹Señor, qanwan siminakuni chayqa, qampa nisqaykipuni aswan allin kajqa llojsin, chaywampis tapurisuyta munayman, imaraykuchus chay wakin imas ajina kasqanta. Chay juchasapastaqa imaraykutaj allin rinri? Imaraykutaj chay wasanchajkunapis mana ima ch'ajwaywan kausakunkuri?

²Qan paykunata sayacherqanki, paykunarí saphichakunku, wiñanku, chanta poqonkutaj. Siminkumantaqa qayllaykipi kasqankuta ninku, sonqonkupirí qanmantaqa karupi kashanku.

³Qantaj, Señor, rejsiwanki, rikuwankitaj, yachankitaj qanwan imaynachus yuyayniypi kasqayta. Kay runasta apakapuy, ovejasta jina wañuyman qhatiykapuy, k'illpiykuy chay wañuchina p'unchaypaj.

⁴Mayk'ajkamataj jallp'a ch'akillapuni kanqari, campopi qhoraspis qawisqas kanqankuri? Uywakuna, phawajkunapis wañurapushanku, kay jallp'api tiyakojkunaspa juchasninrayku. Paykuna yuyanku ruwasqasninkuta mana rikusqaykita.

⁵Chakipi purejkunawan churakuspa mayta sayk'unki chayqa, caballospi rejkunawan imaynatataj atipanakuwajri? Mana ima ch'ajwajniyoj jallp'api, mana walejchu kanki chayqa, imanankitaj chay sach'ararasniyoj Jordampiri?

⁶Kikin wauqesniyki kajkunallamantataj wasanchasunku, qhepaykimantataj phiñasqas qhaparimusunku. Ama paykunapi chhikata atienekuychu, ni misk'i parlaywan parlasojtinkupis.

⁷Aylluyta saqerparini, noqaypata kajllata saqerparini. Chay munasqa nacionniyta enemigosniyman enqhaykuni.

⁸Chay noqajta karqa chay aylloqa, uj montepi león jina kashan, noqaj contraypi qhaparirin, chayrayku paytaqa chejnikuni.

⁹Kay noqaj aylloyqa, imaynatachus k'achitu phurusniyoj aycha mikhu p'isqo jina, chaytataj waj aycha mikhu p'isqos maqaj churakunku, ajina kashanku. Jamuychej, tukuy sajra animales kajkuna, tantaykukuychej uj sumaj mikhuy qarakuta ruwanaykichejpaj.

¹⁰Ashkha enemigosniypa kurajkunasnin uvas huertayta t'ustiykunku, chayaqe jallp'aytataj saruranku. Q'arasqa ch'in pampaman chay munasqa jallp'ayta tukuchinku.

¹¹Ch'in pachata, q'ara pampatataj saqerparinku. Tukuynin jallp'a ch'inyachisqa kashan, manataj pipis imanej kanchu.

¹²Tukuynin ch'in pampaj orqosninta jamorqanku, millay phiña runas, noqa Señorpata uj espaday tiyapuwan, kay jallp'ata cantonmanta cantonkama tukuchinaypaj jina, sonqo tiyasqa kayqa mana pipajpis kanqachu.

¹³Tarporqanku trigota, khishkasllatataj oqharerqanku. Tukuypa llank'asqankoqa qhasillapaj karqa. Chajrasqa mana poqorqachu, noqaj sinch'i phiñakuyniyrayku.

¹⁴Ajinata Señorqa nin: Israel qayllapi tiyakojkuna juchasapa runasman, pikunachus phiñarerqanku chay chayaqenkupaj jina qorqa Israel ayllun chayta: Noqa t'irasqaykichej jallp'asniykichejmanta, Judatapis orqhollasajtaj paykuna chaupimanta.

¹⁵Jinapis, wijch'uytawankamaqa paykunamanta khuyakullasajtaj wasisninkuman kutichimuspa, kikin jallp'ankuman.

¹⁶Cheqamanta paykunaqa aylluyman, Baalpa sutimpi jurallata yachacherqanku, kunantaj aylluy ukhuman jamuspa tiyakapuyta atenqanku. Cheqamantachus aylluypa Diospi creeyninta jap'ikonqanku, sutiyraykutaj juranqanku, Señorpa kausayninrayku nispa chayqa.

¹⁷Chaywampis, mana kasukoj naciontaqa saphinmanta t'iraytawan chinkachisaj. Noqa Señor chaytaqa nini.