Read Quechua Bolivia DC Bible JEREMÍAS 16 Bible Online

JEREMÍAS 16 - Quechua Bolivia DC Bible bible

JEREMÍAS 16

¹Señorqa noqaman parlaspa niwarqa: Ama casarakuychu, nitaj kay jallp'api wawasniyojtajchu kay.

³Noqaqa Señor nisqayki imaschus qhatirinanta kay jallp'api wawas nacekojkunata, jinallataj tatasninkutapis.

⁴Wañonqanku millay sinch'i onqoykunawan, mana pipis paykunamanta waqanqachu, nitaj p'ampajkuna kanqachu, pampapi wanu jina wijch'urasqas qhepakonqanku. Maqanakuykuna paykunataqa tukuchenqa. Ayasninkutataj chay aycha mikhu phawajkunawan, monte animaleswan mikhonqanku, nispa.

⁵Señorqa nillawarqataj: Ama yaykuychu maypichus uj wañusqa runamanta llakisqa kashanku chay wasiman; ama waqaychu, nitaj payrayku llakiyniykitapis rikuchiychu, imaraykuchus kay aylluymantaqa oqhariniña chay sonqo tiyasqa kayniyta, munakuyniyta, chanta khuyakuyniyta ima. Noqa Señor chayta nini.

⁶Kay jallp'apeqa jatunkunamanta, juch'uykunamantapis wañonqanku; mana pipis paypaj kanqachu, nitaj waqanqankuchu, llakiykunatapis mana rikuchenqankuchu, ukhusninkuta maqakuspa, chayri chujchasninkuta q'ararakuspapis.

⁷Chay wañojpa ayllusninta sonqochaykunampaj mana pipis qorpachakusta ruwanqachu, nitaj tatan wañupojtin, chayri maman wañupojtimpis.

⁸Maypichus qhochukusta ruwashanku chay wasiman ama yaykuychu paykunawan tiyaykukuspa mikhoj, ujyajtaj.

⁹Noqaqa Tukuy Atiyniyoj Señor Israelpa Diosnin chayta parlani: Noqa chinkachisaj kay naciompi fiestaspi takiykunasninkuta, jinataj kusikuykunasninkuta, chanta casarakupi takiykunasninkutapis. Kay p'unchaykunaspi chay tukoyqa qhatirisonqachej qankunaj rikunaykichejta.

¹⁰Maypachachus aylluyman kay willanata parlajtiyki tapusonqanku: Imaraykutaj Señorqa kay jatun ñak'ariykunata contraykupi kamacherqari? Ima sajrataj ruwarqaykuri? Ima juchatataj ruwaykuman karqa Señor Diosniykojpa contrampiri?, nispa.

¹¹Qantaj paykunaman kutichinki: Señorqa nillantaj: Kay tukoyqa qhatirisunkichej ñaupa tatasniykichej saqerpayawarqanku, waj dioskunata, qhepantataj riporqanku yupaychaykunasta qonankupaj; noqata saqerpariwarqanku, manataj junt'arqankuchu chay noqaj yachachisqasniyta.

¹²Qankunataj paykunamanta aswan mana allinta ruwajkuna kankichej, sapa ujniykichej mana kasukuspa sonqoykichejpa sajra munayninman jinalla ruwarqankichej, manataj noqaqa kasuwarqankichejchu.

¹³Chayraykumin kay jallp'amanta wijch'usqaykichej tatasniykichej mana rejsisqankuman, nitaj qankunapis rejsisqaykichejman. Chaypitaj tukuy p'unchay mana rejsisqaykichej dioskunasllata yupaychankichej, manapuni qankunamanta khuyakusajchu, nispa.

¹⁴Chaywampis waj tiempopi chayamorqa, noqa Señor chayta nini, chaypeqa manaña jurankichejchu, nispa: Señorpa kausayninrayku, pichus israelitasta Egipto jallp'amanta orqhomorqa, nispa.

¹⁵Manachayqa ninkichej: Señorpa kausayninrayku, pichus israelitasta wichay jallp'amanta orqhomorqa, jinataj chay tukuy maymanchus ch'eqerachisqas karqankichej chay jallp'asmantapis. Noqa ruwasaj qankuna jallp'aykichejman kutimpunaykichejta, chay ñaupa tatasniykichejman qorqani chay jallp'asman.

¹⁶Noqa jamuchisaj ashkha challwa jap'ejkunata, noqa Señor chayta nini, challwasta jina israelitasta jap'inankupaj, chanta kachamullasajtaj ashkha uywa wañuchejkunata, wañurachisunaykichejpaj tukuy orqospi, lomaspi, jinataj chay chhanka k'ajllusnimpipis.

¹⁷Tukuy ruwasqasniykichejta rikuni. Chay juchasta ruwasqasniykichejpis rikuyniymantaqa mana pakasqachu karqa.

¹⁸Jinapis, ñaupajtaqa uj jinatawan pagachikusaj tukuy sajra ruwasqasninkumanta, jinataj juchasninkumantapis, imaraykuchus jallp'ayta ch'ichicharqanku chay millay wañusqa lantisninkuwan, paykuna ruwarqanku chay mana munasqay imasta, chayaqepaj jina qorqani chay tukuy jallp'api.

¹⁹Señorníy, qanmin kallpayqa, waqaychawajniytaj kanki, ñak'ariy ratospi qanllamin pakawajniy kanki. Qanman tukuy naciones jamonqanku. Kay pachaj cantosninmantapacha nisonqanku: chay qhasi dioskunallatamin mana atiyniyojkunata, chay mana imapaj allinchu kajkunata ñaupa tatasniyku chayaqenkupaj jina jap'erqanku.

²⁰Runaqa dioskunata mana ruwayta atinmanchu. Chaypachaqa chay dioskunas manapuni cheqan dioskunachu kanku.

²¹Chayrayku kunan kutipi atiyniyta rikuchisqaykichej, ajinamanta yachanaykichejpaj suteyqa Señorpuni kasqanta.