Read Quechua Bolivia DC Bible JEREMÍAS 22 Bible Online

JEREMÍAS 22 - Quechua Bolivia DC Bible bible

JEREMÍAS 22

¹Señorqa niwarqa: Reypa palacionman riy, kaytataj willay: Judamanta reypa ñaupaqempi payqa tiyashan, Davidpa tronompi, chantá willay kamachisnimpa ñaupaqempi, jinataj llajtamanta runaspa ñaupaqempipis, kay jinata: Uyariychej Diospa palabranta, nispa.

³Kay llajtapi ruwaychej allin kajta, cheqan kajtataj. Chay ñak'arejkunata sajra runaspa ñaupaqenmanta kacharichiychej, ama k'umuykachachiychejchu, nitaj ñak'arichiychejchu waj llajtayojkunata, Amataj wajcha wawasta, warmi sapastapis. Ama wañuchiychejchu mana juchayoj runastaqa.

⁴Sichus cheqamanta kay kamachisqayta ruwankichej chayqa, qankunamanta reykunas Davidpa tronompi tiyaykunankupaj kallanqankupuni. Paykuna yaykurenqanku carretaspi, caballospitaj kay palacioj punkusninta kamachisninwan khuska, jinataj llajtapi kajkunawan ima.

⁵Manachus kay nisqasniyta junt'ankichej chayqa, kay palaciotapis raqaykunasllaman tukuchisaj. Noqa Señor chayta nini.

⁶Noqa Señor chayta nini, Judamanta reypa palacionqa kay jina kananta: Qan noqapajqa Galaad orqo jina kanki, Líbanoj orqo puntan jinataj. Kunantaj jurani uj ch'in pampaman tukuchinasuyta, mana pejpa tiyakuynin cheqaman.

⁷Hachasniyoj runasta contraykipi kachamusqayki tukuchinasuykipaj. Chay cedro sach'asniykita k'uturanqanku, ninawantaj enqhaykonqanku.

⁸Chay qhepanta waj llajtasniyoj runas, kay llajta qayllanta pasanqanku: Imaraykutaj Señorqa kay jinata jatun llajtawanqa ruwarqari?, nispa.

⁹Kutichenqankutaj: Imaraykuchus Señor Diosninkuwan tratota ruwasqankuta, saqerparispa waj dioskunallata yupaychaj kanku, nispa.

¹⁰Rey Josiasmanta ama waqaychejchu, amataj wañusqanmanta waqaychejchu; manchayqa wawan Salummanta waqaychej, pay mana kutimuyniyojta ripushasqanrayku, manaña rikonqachu maypichus nacekusqan jallp'anta.

¹¹Salomqa Diospa wawan karqa, Judamanta reytaj. Paytaj tatampa cuentanmanta kamacherqa, chay cheqamantataj llojsiporqa. Chay Salummantataj Señorqa nin: Manaña kutimonqachu.

¹²Manachayqa wañonqa maymanchus wijch'usqa karqa chay jallp'api, manañataj kay jallp'antaqa rikukaponqachu.

¹³Ay, qanmanta sajra ruwasqasniykiwan, manataj cheqan ruwasqasniykiwanchu oqharerqanki palaciosniykita, jatuchaj wasisniykita ima. Wakintataj mana jornalninmanta pagaspalla qhasimanta llank'acherqanki.

¹⁴Qanqa ninki: Uj jatun palaciota ruwachikusaj, pata kaj altompitaj jatuchaj wasista, nispa. Ventanastapis kicharinki, perqasnintapis cedrowan qhataykuspa pukawan pintaykunki.

¹⁵Cedros chaupillapi tiyakusqaykipichu sumaj rey kasqaykeqa yachakun? Tataykeqa kausaynimpi kusikorqa, chaywampis payqa cheqanta ruwaj, chayrayku paytaqa tukuy imapi allillan rerqa.

¹⁶Payqa ñak'arejkuna wajchastapis yanapaj, chayrayku paytaqa tukuy imapi allin rerqa. Chaypi yachakun noqa Señorta rejsiwasqanqa. Noqa Señor chayta nini.

¹⁷Qanrí, mana kajmanta qolqeta jap'iyllata munanki, mana juchayojkunata wañuchinki, runasniykita ñak'arichinki, waqachinkitaj.

¹⁸Josiaspa wawan Judamanta rey Joacimmantataj Señorqa nin: Pay wañojtenqa mana pipis waqaj kanqachu. Mana pipis kay jinata nispa waqaj kanqachu: Ay, wauqéy! Ay ñañay! Ay, Señor! Ay Reyníy!

¹⁹Burro wañusqata jina qhawarparenqanku, Jerusalenmanta qhatatatispa jawaman wijch'onqanku.

²⁰Qan, Judá, Líbano, orqoman wichariy, qhapariytaj. Jatunmanta Basán orqospi waqay. Abarim lomasmantapacha qhapariy, imaraykuchus tukuy kausaqesniyki tipasqasña kanku.

²¹Noqa parlarqayki tukuy imapis allin rishasojtin, manataj uyariyta munawarqankichu. Ajinatapuni ruwarqayki wayna kasqaykimantapacha. Parlasqayta mana uyariyta munawarqankichu.

²²Tukuy kurajkunasniykita wayralla oqharenqa, munasqasniykitaj waj jallp'asman wijch'usqas kanqanku. Qantaj p'enqaypi k'umuykachashaj rikhurinki chay tukuy juchasniykirayku.

²³Kunan qanqa thapaykipi k'acha karikushanki, Libanomanta chay apamusqa cedros chaupipi. Chantaqa ñak'arinki, maypachachus wijsayoj warmej nanaykunasnin jina jamusojtin.

²⁴Joacimpa wawan rey Judamanta Jeconiasman Señorqa nin: Kausayniyrayku jurayki: Paña makiypi uj sellana sorteja kawaj chaypis wijch'uykimanraj.

²⁵Qanta jaywaykusunaypaj wañuchej enemigosniykiman, qan pistachus manchachikunki chaykunaman wijch'usqayki. Babiloniamanta rey Nabucodonosorman chantaqa jaywaykusqayki, caldeosman ima.

²⁶Qantawan mamaykitawan khuskata wijch'usqaykichej, maypichus mana nacekojta rikusorqachejchu chay waj jallp'aman, chaypitaj iskayniykichej wañunkichej, nispa.

²⁷Maytapuni kutimpuyta munanqanku chay jallp'amanqa mana kutimonqankuñachu.

²⁸Jeconiasqa mana ni imapaj p'akisqa k'anallachu? Imaraykutaj payqa wawasnintin mana rejsisqa jallp'aman wijch'usqari?

²⁹Jallp'a, jallp'a, jallp'a, Señorpa parlasqanta uyariy!

³⁰Kay runaj sutinta librosman qelqaykuychej, mana wawasniyoj runata jina, chantá kausaynimpi mana allin kausayniyojlla runata jina. Ni pipis mirayninmanta kajkunaqa, Davidpa tronompeqa tiyakonqachu Judapi watejmanta kamachinampajqa.