Read Quechua Bolivia DC Bible JEREMÍAS 25 Bible Online

JEREMÍAS 25 - Quechua Bolivia DC Bible bible

JEREMÍAS 25

¹Josiaspa wawan Joacim Judapi tawa watataña kamachishajtin, Señorqa uj willayta Jeremiasman parlaykorqa, tukuynin Judá aylluman imaschus kananmanta. Chayqa karqa Babiloniapi rey Nabucodonosor uj watapi kamachishajtillanraj.

²Profeta Jeremiasqa kay willayta tukuy Judá aylluman, jinataj tukuy Jerusalempi tiyakojkunamanwan willarqa, nerqataj: Amompa wawan Josías, Judapi chunka kinsayoj watasta kamachisqanmanta kunankamaqa, iskay chunka kinsayoj watasña pasan Señor noqaman parlamuwasqanqa, noqataj chayta qankunaman kutin kutinta willarqaykichej, jinapis qankunaqa mana uyariwarqankichejchu.

⁴Chaywampis Señorqa, qhepan qhepampi kachamusunkichej tukuy kamachisnin profetasta, qankunatajrí mana kasuta ruwarqankichejchu, nitaj uyariyllatapis munarqankichejchu, manataj chay nisqasninkutapis ruwarqankichejchu.

⁵Paykuna nisorqachej: Saqeychej chay sajra puriyniykichejta, millay ruwasqasniykichejtapis; jinamanta tiyarikunaykichejpaj Señor qankunaman, jinataj ñaupa tatasniykichejman wiñaypaj qosorqachej chay jallp'api.

⁶Ama waj dioskunata qhatiychejchu, ama jatunchaychejchu, amataj yupaychaychejchu. Ama Señortaqa phiñachiychejchu. Qankuna kikiykichej ruwakunkichej chay dioskunata yupaychaspa, manataj sajra kajtapis chayachimusonqachejchu.

⁷Chaywampis qankunaqa manapuni kasuyta munawarqankichejchu, manachayqa phiñachiwankichej, qankuna kikiykichej ruwasqaykichej dioskunasta yupaychaspa. Chaytaj kanqa, qankunallatataj mana allin rinasuykichejpaj. Señor chayqa nin.

⁸Chayrayku, Tukuy Atiyniyoj Señorqa ajinata nin: Qankuna chay k'amisqasniyta manaña kasuwankichejchu.

⁹Chayrayku wichaynejmanta tukuy ayllusta wajtasaj, chantá Babiloniamanta kamachiy rey Nabucodonosortapis, paykuna kay jallp'aman maqaj yaykumunankupaj, tukuy kaypi tiyakojkunaman, jinallataj chay qaylla nacionesmampis. Tukuyninkuta paykunata tukuchisaj. Paykunata wiñaypaj raqaykunasman tukuchisaj, uj t'ukunapaj jina, mancharikunapaj jinataj kanankama.

¹⁰Paykuna ukhupi chay kusiy wayñu, fiesta takiykunastapis manaña uyarikunanta saqesajchu, nillataj maran rumispa ch'ajwaykunasnintapis; nillataj ujtawan k'anchaykunas rikukunantapis.

¹¹Tukuy kay llajta phishqa kanqa, raqaykunasmantaj tukuchisqas kanqa. Qanchis chunka watas junt'ata kay naciones Babilonia reypa makisnimpi kanqa.

¹²Qanchis chunka watas junt'akojtinkamataj, juchasninkumanta cuentata mañarisaj, Babilonia reymanta, nacionninmanta; caldeosmantapis, chay nacionninkutataj wiñaypaj chinkachisaj. Noqa Señor chayta nini.

¹³Tukuy imasta willachisqayta, kay jallp'aj patanman urmaykuchimusaj. Chaykunataj kay libropi qelqasqas kashanku. Chaykunallatataj Jeremías sutiypi tukuy nacionespa contrampi willarqa.

¹⁴Jatuchaj nacionesmanta, atiyniyoj reykunapis paykunataqa jap'iykullanqankutaj. Ajinata paganaypaj chay ruwasqasninkuman jina.

¹⁵Israelpa Señor Diosnin niwarqa: Qhawariy kay copaqa phiñakuyniymanta vinowan junt'a kashan. Chayta makinmanta jap'ispa ujyachiy, ima nacionesmanchus kachasqayki chay tukuyman.

¹⁶Chantá ujyaykuytawan macharanqanku, locoyanqankutaj, paykunaman maqanakuyta apachimusaj.

¹⁷Noqa chay copata Señorpa makisninmanta jap'erqani, tukuy nacionesmantaj ujyacherqani, mayqenkunamanchus Señor kachawarqa chaykunaman.

¹⁸Chay copata jaywarqani Jerusalenman, Judá llajtaman, reykunasninkuman, jinataj kurajkunasninkumampis. Chaykunata tukuchinaypaj, raqaykunasllataña saqeranaypaj, may t'ukunapaj, mancharikunapaj jina, tukuy rikojkuna wananankupaj jina.

¹⁹Kunampis ajinallapuni kashan. Egiptomanta rey faraonmampis jaywallarqanitaj, jinallataj chay kamachisninman, kurajkunasninman, tukuy runasninmampis ujyachillarqanitaj.

²⁰Chantá chaypi tukuy ayllusmanta kaj runasmampis, ajinallatataj Uzpa jallp'ampi tukuy reyesninman, chantá filisteo cheqanejman, Ascalonman, Gazaman, Ecronman, Asdodmanta puchojkunamampis ujyachillarqanitaj.

²¹Chaymantaqa ujyachillarqanitaj Edomman, Moabman, Amonman;

²²Tiromanta Sidonmantapis tukuy reykunasninman; mar qocha nisqa chay jallp'asmanta tukuy reykunasninman ima.

²³Dedanman, Temaman, Buzmampis, chay umasninkuta ruthukunku chay ayllusman;

²⁴Arabiamanta tukuy reyesman; ch'in pampapi tiyakojkuna tukuy laya aylluspa reykunasninman;

²⁵Zimrimanta, Elammanta, Mediamantawan kaj reykunasninmanwan;

²⁶wichaymanta kaj reykunaman, qaylla kaj, chayri karupi kajkunamanwan ujyacherqani. Kay niyta munan tukuy kay pachapi kaj reykunamanm. Tukuyninkumanta qhepatataj Babiloniamanta kaj rey ujyanqa.

²⁷Chaymanta Señorqa nillawarqataj: Niychej noqa Tukuy Atiyniyoj Israelpa Señor Diosnin machaykunankukama ujyanankuta kamachisqayta, ajtuykukunankukamataj, pampaman urmaspataj manaña jatarinankukama, chay maqanakuykunasta qankunaman apachimusqayrayku.

²⁸Manachus qanmanta jap'ikusuyta, ujyaytapis munankuman chayqa, niy paykunaman: Imaynamantapis ujyanaykichejpuni tiyan, imaraykuchus Tukuy Atiyniyoj Señor chaytaqa, nin, nispa.

²⁹Jasut'isniyta apachimuyta qallarisaj, noqapaj t'aqasqa kashan chay llajtay pataman. Yuyankichejchu qankunaqa mana jasut'isqalla qhepakuyta? Manapuni mana jasut'isqaqa qhepakunkichejchu, imaraykuchus tukuy kay pachapi tiyakojkunaman maqanakuykunasta apachimusaj. Noqa Tukuy Atiyniyoj Señor chayta nini.

³⁰Qan, Jeremías, sutiypi kay tukuyta willaray, niytaj: Señorqa chay sinch'i qhapariyninta kachaykamun, maypichus llimphu tiyakunan chay patamantapacha. Uvasta ch'irwajkuna jina qhaparin, paypa ayllumpa contranta, tukuy jallp'api tiyakojkunaj contrampiwan.

³¹Chay ch'ajwayqa kay pachaj cantosninman chayanqa, imaraykuchus Señorqa uj naciompa contrampi juiciota oqharenqa. Pay tukuy runasta cheqanchanampaj wajyanqa, chay juchayojkunatarí wañuyman wijch'uykunampaj. Señormin chaytaqa nin.

³²Tukuy Atiyniyoj Señorqa nin: Ñak'ariykunasqa nacionmanta nacionman chayanqanku. Uj manchay sinch'i llojlla paras oqharikamun kay pachaj tukuy k'uchunmantapacha.

³³Pistachus Señor chay p'unchaypi wañuchenqa chaykunaqa, kay jallp'aj uj cantonmanta uj cantonkama mast'alla kanqanku. Manataj pipis paykunamantaqa waqanqachu, manataj pipis ayasninkuta p'ampaykamunankupaj oqharenqachu, pampallapi wanu jina qhallasqas kanqanku.

³⁴Qhapariychej, michejkuna, nanaywan qhapariychej! Qankuna aylluyta pusankichej chaykuna, pampapi sunt'iraychej! Imaraykuchus wañuchinanku rato chayamunña, qankunatatajri wañuchisonqachej wira ovejata jina.

³⁵Michejkunaqa mana ayqeyta atenqankuchu, aylluyta pusajkunapis mana ayqekuyta atenqankuchu.

³⁶Chay michejkunaqa qhaparinku; nanaywan qhaparenqanku aylluyta pusajkunaqa, imaraykuchus Señormin pastosninkutaqa ch'akirparichin.

³⁷Señorqa phiñakorqa, chay pastosniyoj camposninkutataj q'ararparicherqa.

³⁸Imaynatachus uj leonqa thapanmanta llojsin ajinata llojserqa, paykunaj jallp'ankutaj raqaykunasllapiña rikhurerqa, Señorpa phiñakuynin jap'iykukusqanrayku, uj sinch'i maqanakutataj paykunaman apacherqa.