Read Quechua Bolivia DC Bible JEREMÍAS 3 Bible Online

JEREMÍAS 3 - Quechua Bolivia DC Bible bible

JEREMÍAS 3

¹Señorqa nin: Sichus uj qhari warminmanta t'aqakun, chay saqerpayasqa warmitaj waj qhariwanñataj tantakun chayqa, ñaupaj kaj qosanwan mana watejmanta kutinakullanqatajchu. Jina kanman chayqa, llajtantinta ch'ichichanman. Chaywampis, qanqa Israel, ashkha munasqasniykiwan qhenchachakorqanki, kunanraj noqaman kutirimuyta munashanki. Noqa Señormin chayta nini.

²Lomasta allinta qhawariy: Maynejpitaj qampa qhenchachakusqayki mana kanchuri? Ch'in pampaspi árabe warmi jina chukuykuspa qharisniykita ñan cantospi suyaj kanki. Kay llajtata ch'ichichakusqasniykiwan, sajra ruwasqasniykiwantaj qhenchacharqanki.

³Chayraykumin paraqa mana kanchu, ch'aki tiempopi, jinataj q'omer tiempopipis. Qanqa uj qhencha warmiman rijch'akoj kashanki, ni uj chhikanta p'enqarikuspa.

⁴Manaraj unaychu niwarqanki: Tatay kanki, sipas kayniypitaj kausaqey!, nispa.

⁵Phiñasqallapunichu kanki? Wiñaypajchu phiñakuyniyki qhepakonqa? Kayta nej jinari, atisqaykita sajra kajta ruwaj kanki.

⁶Rey Josiaspa p'unchaykunasnimpi Señor niwarqa: Rikunkichu mana kasukoj Israel ayllu imatachus ruwasqanta? Rispa chay jatun orqos patapi, juch'uy orqos patapipis riytawan, qhenchachakuyman qokaporqa, jinallataj tukuy ch'ampa sach'as urapipis.

⁷Noqa yuyarqani chay tukuy ruwasqasninmanta qhepaman kutirikamunawanta, jinapis manapuni kutirikamuwarqachu. Chay mana kasukoj ñañan Judapis kay tukuyta rikorqa; rikullarqataj imaynatachu chay mana kasukoj Israelta kachapusqayta, chantá paymanta t'aqakusqayta qhenchachakusqanrayku. Jinapis Israelpa ñañan qhencha Judapis mana manchachikorqachu, manachayqa paypis qhencherioman qokapullarqataj.

⁹Chaytaqa payllamanta imata jina ruwarqa, tukuy nacionnintinta mana allinman churarqa. Judaqa t'aqakuwaspa, rumista, k'ullustawan yupaychaj churakorqa.

¹⁰Chay tukuyta ruwaspañapis chay t'aqakuwaj Judaqa nillataj tukuy sonqowanchu noqaman kutirimuwarqa, manachayqa ch'aukiyawarqa. Noqa Señormin chayta nini.

¹¹Señor niwarqa: Mana kasukoj Israelqa aswan pisi juchayoj kashan chay t'aqakuwaj Judamanta nisqaqa.

¹²Rispa willamuy, wichaynejman qhawaspa: Señorqa nillantaj: Noqaman kutirimuy mana kasukoj Israel. Mana phiña uyaywanchu qanta jap'isqayki, nitaj qampaj phiñakuyneyqa wiñaypajchu kashan, imaraykuchus noqaqa k'acha khuyakoj kani. Noqa Señormin niykichej.

¹³Juchayoj kasqaykita reparakuy, Señor Diosniykita mana kasoj kasqaykita, mana rejsisqakunawan tukuy ch'ampa sach'as uraspi qhenchachakusqaykita, kamachiykunasniyta mana kasusqaykita ima. Noqa Señormin chayta nini.

¹⁴Señor nillantaj: Kutirimuychej mana kasukoj wawas, imaraykuchus noqa qankunaj Señorniykichej kani. Noqa jap'isaj sapa llajtamanta ujta, iskaytataj sapa ayllumanta. Sionmantaj kutichisqaykichej.

¹⁵Noqa qankunaman qosqaykichej allimpaj rijch'awaj kamachejkunasta, paykunataj qankunata kamachisonqachej, sumaj yachaywan, sumaj yuyaywantaj.

¹⁶Qankuna jallp'aykichejpi astawan yapaykojtiykichej, ashkha wawasniyojñataj kajtiykichej, mana pipis parlanqañachu Señorwan trato ruwasqa kajmanta, manaña pipis chaypi yuyanqañachu, nitaj ujtawan yuyarikonqañachu, manataj pipis watukonqañachu, nitaj waj mosojta ruwanqankuchu. Noqa Señor chayta nini.

¹⁷Chaypacharaj Jerusalenqa Señorpa tiyakunan kanqa, tukuy nacionestaj chaypi yupaychanawankupaj tantakonqanku, manañataj ujtawan k'ullukuspa sonqonkupi chay sajra millay yuyaykunata qhatenqankuchu.

¹⁸Maypachachus chay p'unchay chayamojtin, Judá aylluwan tantaykukonqa Israel aylluwan khuska. Kutimonqanku wichaynej jallp'amanta qankunaj ñaupa tatasniykichejman chayaqenkupaj jina qarqani chay jallp'asman.

¹⁹Israel, noqa qanta wawaypaj jina jap'ikapuyta yuyarqayki, sumaj moq'ena jallp'ata qonasuypaj; tukuy kay pachapi jallp'asmanta aswan k'acha jallp'ata. Noqa yuyarqani tatáy ninawaykita, manataj jayk'ajpis noqamanta karunchakunaykita.

²⁰Chaywampis qankunaqa, imaynatachus uj warmi qosanta wasanchan ajinata, noqata wasanchawarqankichej. Noqa Señormin chayta nini.

²¹Ch'in orqospi qhapariykuna uyarikun: Chaykunaqa kanku khuyakuyta mañakuspa israelitaspa waqaynin. Cheqan ñanmanta t'aqakaporqanku, noqa Señor Diosninkutataj qonqakapuwarqanku.

²²Mana kasukoj wawas noqaman kutirimpuwaychej, noqataj jampisqaykichej chay mana kasukoj kayniykichejmanta. Kaypi kashayku, qanmantaj chimpakamuyku, imaraykuchus qanllamin Señor Diosniykoqa kanki.

²³Cheqamanta mana imapaj allinchu karqa orqo puntasman wicharisqaykoqa, nitaj chay orqospi qhaparqachasqaykupis. Señor Diosnillaykupimin Israelqa salvacionta tarin.

²⁴Lantista yupaychasqasniyku p'enqayta chinkachiwarqayku unaymantapacha tatasniykoj tarisqanku chay ovejasta, uywasta, qhari wawasta, warmi wawastapis.

²⁵May p'enqasqas k'umuykukunachej ari, manaña allimpajchu qhawasqas kanchej, imaraykuchus wawasmantapacha kunankama, noqanchej ñaupa tatasninchejpis juchallerqanchej Señor Diosninchejpa contrampi, manataj payta kasorqanchejchu.