Read Quechua Bolivia DC Bible JEREMÍAS 30 Bible Online

JEREMÍAS 30 - Quechua Bolivia DC Bible bible

JEREMÍAS 30

¹Kay jinatamin Señorqa Jeremiasman parlarqa, nerqataj: Israelpa Señor Diosnin nin: Uj libroman qelqay kay tukuy nisqasniyta: Uj p'unchaykuna jamushan, maypachachus Israelmanta, Judamantawan kajkuna kutimponqanku chay. Noqa Señor chayta nini. Noqa kutichimusaj, tatasninkuman qorqani jallp'anku kanampaj chayman.

⁴Israelmanta, Judamantawan Señorpa nisqanqa, kaymin chay willayqa: Señorqa nin: Llakiymanta qhapariykuna uyarikun, jatun mancharikuywan, kharkatitiywantaj.

⁶Tukuyta tapurikuychej, uj qhari atinmanchu nacechikuyta, imaraykuchus qharista rikuni, uj wijsayoj warmej nanaykunasninwan jina q'ewiykachakojta. Imaraykutaj uyasninku q'ellu q'ellulla kashanri?

⁷Uj jatun ñak'ariy p'unchay qayllamun, chay jina p'unchayqa mana ujtawan kanqachu. Uj llakiy p'unchaykuna Jacobpa ayllumpaj kanqa, chaywampis salvakonqa.

⁸Noqa Tukuy Atiyniyoj Señor nini: kamachiy yugomanta aylluyta kacharichisaj, lazosninta p'itirasaj, amaña ujtawan waj llajtayojkunaj kamachin kanampaj.

⁹Paykuna noqa Señor Diosninkuta kasuwanqanku, rey kanampaj churasaj chay Davidtapis kasonqanku.

¹⁰Noqa Señor nillanitaj: Jacobpa ayllun kamachiy, ama mancharikuychu. Qan, Israel, ama mancharikuychu. Qanta, wawasniykitapis noqa kacharichimusaj, chay karu llajtasmanta, maypichus wijch'usqas kashankichej chaymanta. Watejmanta sonqo tiyasqa kaypi tiyakunki, ch'inllapi mana pejpa mancharichinan.

¹¹Noqa Señor nillanitaj, qanwan salvasunaypaj kashasqayta. Tukuy nacionesta tukuchisaj maypichá ch'eqeracherqayki chaykunata. Jinapis qantaqa mana tukuchisqaykichu; jasut'isqayki juchallikusqaykiman jinalla. Manapuni saqesqaykichu mana jasut'ispaqa.

¹²Señor nin: Nanachikusqasniykeqa mana thañiyniyoj, chay onqoyniykipis mana thañiyniyoj.

¹³Mana pipis qanmanta dakojqa kanchu, manataj pipis nanasqasniykita jampiykusoj kanchu, manataj jampipis kanchu.

¹⁴Tukuy munapayasojkuna qonqapusorqanku; manañataj pipis qanmanta llakikunchu. Noqa qantaqa nanaykucherqayki enemigosniykipis kayman jina, manchay sinch'ita jasut'erqayki may chhika sajra ruwasqasniykimanta, mana yupay atina juchasniykimanta ima.

¹⁵Imaraykutaj nanasqasniykimanta qhaparqachankiri? Nanasqasniykeqa mana jampikuyniyoj, ashkha sajra ruwasqasniykimanta, mana yupay atina juchasniykiraykutaj. Ajinata qanwan ruwani.

¹⁶Jinaqa, tukuy qanta oqoykusojkunaqa oqoykusqasllataj kanqanku. Qanta ch'uskisojkunaqa ch'uskisqasllataj kanqanku. Tukuy enemigosniyki wijch'usqas kanqanku. Qanta suwasojkunapis suwasqasllataj kanqanku.

¹⁷Kausayniykita kutichipusqayki, nanasqasniykitataj jampisqayki. Enemigosniykeqa nichunkupis: Sionqa saqerparisqaña kashan, mana pipis paymantaqa yuyarikunchu, nispa. Noqa Señor chayta nini.

¹⁸Señorqa nin: Jacobpa ayllunta wasinman kutichimpusaj, tukuy nacionninmanta khuyakusaj, llajtaspis chay raqaykuna patallapitaj jatarichisqas kanqanku, palaciospis mayupichus karqanku chayllapitaj.

¹⁹Paykuna ukhumanta graciasta qospa takiykunas llojsenqa, kusiywan asirikuykunapis. Mana pisiyanqankuchu, manachayqa astawan ashkhayachisaj. Mana pipis qhesachanqachu, imaraykuchus noqa paykunata allimpaj qhawasaj.

²⁰Israelitasqa ñaupajta jina kanqanku, tukuy ayllonqa ñaupaqeypi sinch'ita sayanqanku, noqataj jasut'isaj tukuy ñak'arichejkunata.

²¹Paykuna ukhumanta kuraj kajninku llojsenqa, kamachejninkupis paykuna ukhullamantataj llojsenqa. Paytaqa noqaman qayllachimusaj. Pitaj kausayninta qoyta munanman noqaman qayllamunawampajri?

²²Paykuna aylluy kanqanku, noqataj Diosninku kasaj. Noqa Señor chayta nini.

²³Diospa phiñakuynenqa uj llojlla para jina, uj sinch'i muyoj wayra jinataj, juchasapaspa patanman chayan.

²⁴Señorpa phiñakuynenqa mana thasnukonqachu imatachus munasqanta junt'anankama. Qhepa p'unchaykunaman tukuy kay imastaqa unanchankichej.