Read Quechua Bolivia DC Bible JEREMÍAS 31 Bible Online

JEREMÍAS 31 - Quechua Bolivia DC Bible bible

JEREMÍAS 31

¹Señorqa nillantaj: Chay p'unchaypeqa tukuy Israel aylluspa Diosninku kasaj, paykunataj aylluy kanqanku, nispa.

²Señor nin: Ch'in pampapi wañojmanta ayqej ayllumanta khuyakorqani, maypachachus Israelqa samakuna cheqata mask'asharqa chaypacha.

³Noqa unaymantapacha paywan rikuchikorqani. Nerqanitaj: Noqa munakorqayki wiñay munakuywan, chayrayku khuyakuynillaywampuni qanta pusaykachayki.

⁴Israel, watejmanta oqharisqayki. Watejmanta chhulloj chhullojkunawan jamunkichej kusiywan tusurispa.

⁵Samaria orqospi watejmanta uvas sach'asta plantankichej. Pichus plantajqa poqoykunasninta mikhonqa.

⁶Uj p'unchay jamonqa maypachachus qhawajkunaqa Efraimpa orqosnimpi qhaparenqanku: Jamuychej, rinachej Sión orqoman, Señor Diosninchejman, nispa.

⁷Señorqa nin: Kusiy takiykunasta kusiywan takiychej Jacobpa ayllunrayku. Paymin tukuy nacionesmanta aswan kurajqa. Uyariychej yupaychaykunasta, niychejtaj: Señorqa ayllunta salvarqa, Israelmanta puchojkunata.

⁸Kutichimusqaykichej chay pata jallp'asmanta, tantaykusqaykichejtaj kay pachaj tukuy k'uchusninmantapacha. Paykunawan jamonqanku lerq'os, wist'us, wijsallisqa warmis, nacechikojkuna ima. Manchay ashkhapuni kutimonqanku.

⁹Mañakuspa waqaspataj jamonqanku. Noqa paykunata yakusniyoj mayusman pusaykusaj, sumaj pampachasqa ñannintataj ama misk'akunankupaj. Noqa Israelpa tatan kani, Efraenqa kuraj kaj waway.

¹⁰Naciones Señorpa palabranta uyariychej, mar qochaj karu cantosnimpi willaramuychej, nimuychejtaj: Señorqa Israel ayllunta ch'eqeracherqa. Jinapis tantaykamonqa, waqaychanqataj imaynatachus uj michejqa ovejasninta waqaychan ajinata.

¹¹Señorqa watejmanta Jacobpa ayllunta jap'ikaporqa, payta kacharicherqa aswan atiyniyojkunamanta.

¹²Jamonqanku, kusiywantaj Sión orqo patapi takenqanku, Señorpa allin kaj imasta apachimusqasninmanta kusikonqanku; trigowan, vinowan, aceitewan, ovejaswan, wakaswan ima, kausayninkoqa sumaj qarpasqa huerta jina kanqa; manataj kallpankuta chinkachenqankuchu.

¹³Chaypacha sipaskunaqa kusikuywan tusurenqanku, jinallataj waynakunapis, unayniyoj runakunapis. Noqa paykunata sonqochaykusaj: Waqayninkutaqa kusiyman tukuchisaj. Noqataj kusiyninkuta qopusaj nanayninkumanta aswan ashkhata.

¹⁴Chay sacerdotes kajkuna aswan allin kaj mikhunasta mikhunankuta nisaj, aylluytaj kusikuchun ashkha allin imasta qosqasniykiwan. Noqa Señor chayta nini.

¹⁵Señorqa nin: Ramá llajtapi uj qhapariy uyarikun, jatun waqay, jik'uytaj. Raquel wawasninmanta waqashan, manataj sonqochasqa kayta munanchu, imaraykuchus wawasnenqa wañusqasña kanku.

¹⁶Señortaj nin: Raquel, amaña astawan waqaychu, amaña waqaykunasniykita suruchiychu, imaraykuchus chay waqaykunasniykeqa t'inkayoj kanqa; wawasniykeqa enemigosniykej jallp'anmanta kutimponqanku. Noqa Señor chayta nini.

¹⁷Jamoj p'unchaykunapaj uj suyay tiyapusunki. Wawasniyki jallp'asninkuman kutimponqanku. Noqa Señor chayta nini.

¹⁸Efraimpa ayllunmanta kajkuna waqaspa willakojta uyarini: Noqa, mana amansasqa novillo waka jina karqani, jinapis qan kasukuyta yachachiwarqanki, qanman kutirichipuway. Qanmin Señor Diosniy kanki.

¹⁹Noqa qanmanta t'aqakorqani, jinapis juchayta saqespa qanman kutirimuni. Pechoyta takakuni, p'enqasqataj k'umuykachakushani wayna kayniypi juchasniyrayku.

²⁰Efraín llajtaqa noqapaj munasqa waway jina; aswan munasqa kaj wawaj. Payta k'amini chaypis, manapuni paymanta qonqakapunichu, sonqoy wawayawajtin, mayta paymanta khuyakuni. Noqa Señor chayta nini.

²¹Israel, ñanniykita señaleswan sut'inchay; watejmanta tarikapunaykipajtaj allinta qhawarikuy chay purisqayki ñankunasta. Kutimuy, Israel ayllu, kutimpuy llajtasniykiman.

²²Mayk'ajkamataj purinki ujnejmanta ujnejmanri? Ayllúy, qanqa uj mana kasukoj sipas jina kanki. Noqa Señor, kay pachapi uj mosoj imata ruwani, uj warmeqa uj qharita muyupayanampaj.

²³Israelpa Tukuy Atiyniyoj Señor Diosnin kayta nin: Maypachachus Judaman runasta kutichimojtiy, ujtawan paykuna jallp'ankupi rikhurejtinku, jinallataj llajtankupipis chaypacha nenqanku: Señor bendicichun kay llimphu orqota maypichus cheqa kaj tiyakun chayta.

²⁴Judamanta runakuna, llajtasninmantapis chajrasta llank'ajkuna, ovejasta michejkunapis chaypi tiyakaponqanku.

²⁵Chay sayk'usqasta, mana kallpayojkunatapis noqa mikhuchisaj, ujyachisajtaj atipachinaykama.

²⁶Mosqokushaspa rijch'ariytawan ñawisniyta kicharerqani, puñuyniytaj atipawarqa.

²⁷Señorqa nin: Qhepa p'unchaykunapi Israelpi, Judapipis runas mayta miranqanku, jinallataj uywaspis.

²⁸Imaynatachus sumajta qhawarqani usqhayta sik'inaypaj, urmachinaypaj, uramantaj wijch'unaypaj, phirinaypaj, chayri ima llakiytapis ruwanaypaj, ajinallatataj allinta qhawasaj jatarichinaypaj, plantanaypajpis. Noqa Señor chayta nini.

²⁹Jaqay p'unchaypeqa manaña ninakonqankuchu: Tatasqa mikhunku k'allkusqa uvasta, wawasninkurí kirusninkuta chañachikunku, nispa.

³⁰Pischari k'allku uvasmanta mikhojkunalla kirusninkuta chañachikunku. Sapa ujpis juchasninrayku wañonqanku.

³¹Señorqa nillantaj: Chaypacha uj p'unchay jamonqa, maypichus Israelwan Judawan ima mosoj tratota ruwasaj.

³²Kay mosoj tratoqa mana chay ñaupa tatasninkuwan ruwarqani jinachu kanqa, mayk'ajchus Egiptomanta makinkumanta jap'ispa orqhomorqani chaypacha, imaraykuchus paykunawan trato ruwasqayta mana junt'arqankuchu noqa dueñonku kashajtiy. Noqa Señor chayta nini.

³³Jaqay p'unchaykunapi Israelwan tratoyta ruwasaj chayqa, kay jina kanqa: Leyniyta sonqosninkuman churasaj, chantá yuyayninkumampis qelqaykullasajtaj. Noqa Diosninku kasaj, paykunataj aylluy kanqanku. Noqa Señor chayta nini.

³⁴Manaña yachachinakunanku kanqachu ujkuna ujkunata, kausaqesnintin, ayllusnintimpis, noqata rejsinawankupajqa, imaraykuchus tukuy rejsiwanqanku, jatunmantapacha juch'uykama. Noqa juchasninkumanta perdonapusaj, manañataj jayk'ajpis juchasninkumanta yuyarikusajchu. Noqa Señor nini.

³⁵Pichus intita p'unchaynimpi k'anchanampaj churarqa, killata, ch'askastapis tutampi k'anchanankupaj churarqa. Mar qochatapis phiñarikojta, qhollchoqeyasqampis mayta mayta ch'ajwarejta churaj. Tukuy Atiyniyoj sutichasqa Señorqa chayta nin:

³⁶Maypachachus kay churasqay leykunas mana junt'akunmanchu chayqa, chay kikin p'unchaypacha Israelqa aylluy kayta saqenman. Noqa Señor chayta nini.

³⁷Sichus uj p'unchay janaj pachata midinkuman, kay jallp'atapis cimientosninkama qhawankuman chayqa, chay p'unchaypacha Israelta qhesachasaj tukuy ima ruwasqasninmanta. Noqa Señor chayta nini.

³⁸Señorqa nin: Uj p'unchay jamonqa, chaypacha Israelqa jatarichisqallataj kanqa, Hananeel torre chaymantapacha esquinapi punkukama.

³⁹Chayqa cheqanta renqa, chaynejmanta Gareb orqokama, chaymantataj Goa chaynejman wist'uykonqa.

⁴⁰Tukuynin valle maypichus wañusqasta p'ampanku, ushphatataj qhallinku chaykuna, Cedrón mayu chay patapi tukuy kaj campospis, caballospa yaykunan punkun esquinakamataj, inti llojsimuynejmanqa noqapaj t'aqasqas kanqanku, chay tukuytaj manaña jayk'ajpis urmachisqaschu, nitaj tukuchisqaschu kanqanku.