Read Quechua Bolivia DC Bible JEREMÍAS 33 Bible Online

JEREMÍAS 33 - Quechua Bolivia DC Bible bible

JEREMÍAS 33

¹Jeremías presochasqa kashajtin, chay cárcel patiompi watejmanta Señorqa parlaykorqa, nerqataj: Noqa Señor, kay pachata ruwaj, rijch'ayninta ruwaspaña maypichus sinch'i kananman churaykaporqani, achay qanta niyki:

³Mañakuway, uyarisqaykitaj, willasqaykitaj jatuchaj imasta, mana yachasqayki imastataj yachachisqayki.

⁴Noqa Señor Israelpa Diosnimpata uj willayniy tiyapuwan, Jerusalempi kaj wasismanta, jinataj Judá llajtaj reykunasnimpa wasisnimpis urmachisqas kanankumanta.

⁵Chay caldeoswan maqanakunankupaj jallp'asta jusk'usqasninkoqa llajtaman yaykunankupaj chaykunaqa ayaswan junt'aykuchinallankupaj kanqa. Noqa chay sinch'i phiñakuyniypi wañurachisaj imaraykuchus uyayta t'aqani, paykunamanta pakakunitaj, chay may chhika sajrasta ruwasqasninkurayku.

⁶Jinapis jampiykusaj, kausachisajtaj, sonqo tiyasqa kaypi waqaychasqa kaypi mayta kusikonqanku.

⁷Judamanta, jinataj Israelmanta wijch'usqa kajkunata kutichimpusaj, watejmantataj jatarichisaj qallariypi jina.

⁸Llimphuchasaj noqaj contraypi tukuy juchallisqankumanta, llimphuchasaj tukuy juchasta ruwasqasninkumanta, contraypi oqharikusqankuta ima pampachasaj.

⁹Kay jallp'api Jerusalenqa noqaj kausayniy, jatunchakuyniytaj kanqa tukuy nacionespa ñaupaqempi. Maypachachus tukuy allin kajta Jerusalempi tiyakojkunaman patanman apachimusqayta uyarenqanku, jinataj tukuy allin kajwan junt'achisqayta parlajta uyarenqanku, chaypachaqa mancharikuywan kharkatenqanku.

¹⁰Señorqa nin: Qankuna ninkichej kay cheqan ch'in kasqanta, chaypi runas nitaj uywaspis mana kasqankuta; Jerusalempa callesnin Judajpa llajtasnimpis ch'usaj pacha kasqankuta, ni runaspis, nitaj uywaspis chaypi kasqankuta.

¹¹Kaypi watejmanta uyarikullanqataj, fiestaspi kusiy takiykuna, casarkojkunapaj kusiy takiykuna. Kaypis uyarikullanqataj: Tukuy Atiyniyoj Señorman graciasta qoychej, imaraykuchus Señorqa k'achamin, wiñaypajtaj munakuynenqa. Diosta yupaychana wasimantaj agradecekuna jaywanasta apamonqanku. Arí, noqa kay jallp'aj kausayninta allinyachisaj qallariypi karqa ajina. Noqa Señor chayta nini.

¹²Tukuy Atiyniyoj Señorqa nin: Kay jallp'api, kunan ch'in pacha kashan chaypi mana runas, nitaj uywaspis kashanchu chaypi, tukuynin llajtasnimpi, watejmanta pastos wiñallanqataj, tukuy michejkuna chaykunapi ovejasninkuta michimunankupaj.

¹³Chay orqo kinraykuna llajtaspi, mar qocha canto pampasnimpi, Néguev chaykunaspi, Benjamimpa jallp'asnimpi Jerusalempa qayllasnimpi, Judajpa wakin llajtasnimpipis watejmanta michejkuna ovejasninkuta yuparishaj rikhurillanqankutaj. Noqa Señor chayta nini.

¹⁴Señorqa nillantaj: Mayk'ajchus bendicionesta qonayta nerqani Israel aylluman, Judamampis chayta junt'apunay p'unchay chayamonqa.

¹⁵Chay p'unchay chayamojtin, Davidpa mirayninmanta uj cheqanta ruwajta sayarichisaj, chaytaj cheqanchanqa, cheqantataj ruwanqa kay jallp'api.

¹⁶Jaqay p'unchaykunapi Judaqa salvasqa kanqa, Jerusalentaj sumaj waqaychasqa kausakonqa. Chaypacha sutinmanta wajyanqanku: Señormin cheqa kayninwan atipayninchejqa.

¹⁷Noqa Señor chayta nini: Mana jayk'ajpis Davidpa mirayninmanta Israelpa tronompi tiyakojta, chaypi mana tukukonqachu.

¹⁸Chaypeqa jayk'ajpis Leví ayllumanta sacerdotesqa kallanqapuni, sapa p'unchay ruphachisqa rikuchikuta jaywanawankupaj, noqaj sutiypi ch'aki mikhuykuna poqoykunasta ruphachinankupaj, waj rikuchikustapis jaywanawankuta.

¹⁹Señorqa Jeremiasman parlallarqataj: Noqa Señor nini: Manapuni atikunchu, p'unchaywan ch'isiyaywan trato ruwasqay mana junt'akunanqa, jinamantaqa manachari p'unchaywan, ch'isiyaywampis tiemponman jina kanmanchu.

²¹Ajinallatataj junt'akonqapuni, kamachiy Davidwan trato ruwasqayqa, jinataj tronopi mirayniymanta uj tiyakojqa. Chanta Leví ayllumanta kamachisniy sacerdoteswampis manapuni tratoytaqa p'akisajchu.

²²Kamachiy Davidpa mirayninta, kamachisniyta, Levejpa mirayninmanta kamachisniy sacerdotestapis may chhikaman mirachisaj janaj pachapi qoyllurkunata jina, mar qochaj t'iyunta jinataj, mana yupay atinata.

²³Señorqa Jeremiasman parlarqa: Manachu reparanki runas nishasqankuta, iskaynin ayllusniy Israelpa, Judatawan, noqa kikiypa ajllasqasniyta qhesachasqayta? Chayrayku qhesachaywan aylluytaqa qhawashanku, manaña uj naciompaj jinapischu qhawashanku.

²⁵Noqa Señor nini: P'unchaywan, ch'isiyaywampis noqa tratota ruwarqani, leykunata churarqani, janaj pachata, chanta kay pachatapis kamachinampaj.

²⁶Mana jayk'ajpis qhesachasajchu Jacobpa mirayninta, nitaj kamachiy Davidpa miraynintapis, nitaj saqesajchu kamachejkunata sayarichiyta, Abrahampa mirayninmanta, Isaacpamanta, Jacobpamantapis; imaraykuchus wijch'usqa kajkunata kutichimusaj, khuyakusajtaj.