Read Quechua Bolivia DC Bible JEREMÍAS 36 Bible Online

JEREMÍAS 36 - Quechua Bolivia DC Bible bible

JEREMÍAS 36

¹Josiaspa wawan Judamanta rey Joacim tawa watastaña kamachishajtin, Señorqa Jeremiasman parlaykullarqataj: Qelqanapaj uj librota oqharikuy, chaypitaj qelqay tukuy kay nisusqayta, Israelmanta, Judamanta, chanta chay nacionesmanta puchojkunaj contrankupi, chay Josiaspa tiemponmanta kunankama.

³Ichapis Judaman kaj runasqa ñak'ariykunasta apachimunashani chaymanta uyarispa tukuy sajra puriyninkuta saqenkuman, noqataj sajra ruwasqasninkumanta, juchasninkumantapis perdonapusaj.

⁴Jeremiasqa Neriaspa wawan Baructa wajyarqa, payman nerqa tukuy imastachus Señorpa nisqanta qelqananta. Baructaj uj libroman qelqarqa.

⁵Chaymanta Jeremiasqa Barucman yuyaychaj kay jinata nispa: Noqaqa Señorpa wasinman rinaymanta jark'asqa kani.

⁶Chayrayku jamoj ayuno p'unchaypaj qan riy, chaypitaj leey qelqacherqayki chay librota, qan qelqarqanki chayta, jinamanta tukuy ayllu, jinamanta Judamanta tukuy llajtaspi tiyakojkunapis Señorpa willachisqankuta uyarinankupaj.

⁷Ichapis Señormanta mañakunkuman, sajra puriykunasninkutataj saqenkuman. Señorpa k'ajaj phiñakuyninta ayllunman apachimusaj nisqanta. Chayqa manchay sinch'i manchachikunamin.

⁸Neriaspa wawan Barucqa imaynatachus profeta Jeremiaspa tukuy kamachisqanman jina ruwarqa: Señorpa wasinman rispataj libropi Señorpa willaynin qelqasqasta leerqa.

⁹Josiaspa wawan Judamanta rey Joacim, phishqa watataña kamachishajtin isq'on kaj killampi kamacherqa Jerusalempi tukuy tiyakojkuna, jinataj Judamanta, waj llajtasmanta jamojkunapis Señorpa ñaupaqempi ayunanankuta.

¹⁰Baructaj Diosta yupaychana wasimanta pata kaj patioman rerqa, mosoj punku chaynejman. Safampa wawan reypa kuraj kaj kamachin Gemariaspa cuarton chaynejmantapacha, tukuy aylluman leeykorqa maypichus Jeremiaspa palabrasnin kasharqa chay libromanta.

¹¹Gemariaspa wawan Safampa allchhin Micaiasqa Señorpa parlasqanta, Barucpa leesqanta uyarerqa.

¹²Chaymantataj, reypa palacionman rerqa reypa qelqerimpa wasinman, maypichus tukuy kurajkunas tantasqas kasharqanku chayman. Reypa qelqerin Elisama, Semaiaspa wawan Delaía; Acborpa wawan Elnatán; Safampa wawan Gemarías; Hananiaspa wawan Sedequías, jinataj chay waj kurajkunapis.

¹³Micaías tukuy uyarisqanta willarqa libromanta Barucpa leesqanta, ayllumanta tukuy runaspa ñaupaqempi.

¹⁴Reypa wasimpi kurajkunaqa Jehudita kacharqanku. Pay karqa Netaniaspa wawan, Selemiaspa allchhin, Cusej allchhin allchhintaj, payta kacharqanku Barucman nimunanta chay tukuy aylloj ñaupaqempi leesqan librota. Chaypacha Barucqa libro jap'irisqa ñaupaqenkuman jamorqa.

¹⁵Paykunataj nerqanku: Tiyarikuy, chay librotataj leeripuwayku, nispa. Baructaj leeriporqa.

¹⁶Chayta uyariytawankamataj may mancharisqas ujkuna ujkunaman ninakorqanku: Kay tukuy imastaqa reyman willananchej tiyan, nispa.

¹⁷Chaymanta Baructa taporqanku: Willariwayku ari imaynatachus kay tukuy imasta qelqasqaykita, nispa.

¹⁸Baructaj kuticherqa: Jeremías kikimpuni kay tukuyta niwarqa, noqataj chay tukuy niwasqanta tintawan uj libroman qelqarqani, mayt'usqa libroman.

¹⁹Chaypacha Barucman nerqanku: Qanwan Jeremiaswan rispa pakakamuychej, amataj pipis yachachunchu maypichus kasqaykichejta.

²⁰Chay kurajkunaqa reypa kamachin qelqerin Elisamaj tiyanan wasiman librota saqerqanku, palacionmantaj rerqanku kay tukuymanta reyman willamunankupaj.

²¹Reytaj kacharqa Jehudita reypa qelqerin Eliasamaj wasinmanta librota apamunampaj. Jehuditaj librota apamuytawan reypa ñaupaqempi leerqa, jinataj tukuy chay kurajkunaj ñaupaqenkupipis.

²²Isq'on kaj killapi kasqankurayku reyqa chirimanta pakakuna kaj wasimpi, nina k'ajajpa ñaupaqempi q'oñikuspa kasharqa.

²³Jehudí kinsa, chayri tawa t'aqastaña leejtinkama, reyqa cuchillowan khuchuspa ninaman wijch'uykorqa. Kayta jinallatapuni ruwasharqa ninapi ruphasqa chay libro tukukunankama.

²⁴Nitaj rey, nitaj kurajkunamanta uyarejkunapis chay libro leekusqanwanqa mancharikorqankuchu, nitaj uj chhikanta sonqonkuta nanachikojmampis rijch'akorqankuchu.

²⁵Elnatán, Delaía, Gemarías ima reyman nerqanku ama chay librota ruphachinanta, chaywampis payqa manapuni kasukorqachu.

²⁶Manachayqa reypa ayllun Jerameelta, Azrielpa wawan Seraiasta, Abdeelpa wawan Selemiasta ima kamacherqa jap'ispa presochanankuta Jeremiasta, qelqerin Baructawan. Señortaj paykunata pakaykorqa.

²⁷Maypachachus Jeremías Barucwan qelqacherqa chay librota rey ruphachejtinkama, Señorqa Jeremiasman parlallarqataj: Jap'iy waj librota, chaypitaj qelqallaytaj tukuy imachus chay ñaupaj libropi kasharqa chayta, mayqentachus Judamanta rey Joacim ruphacherqa.

²⁹Kay jinata noqa niyki, qanqa librota ruphacherqanki, Jeremiastataj k'amerqanki kay jinata qelqasqanmanta; Babiloniamanta reyqa jamonqapuni kay nacionta chinkachinampaj mana uj runasniyojta, mana uj uywasniyojtataj.

³⁰Kunanqa noqa Señor qanta niyki Judamanta rey Joacim; qampa mirayniykimanta Davidpa tronompi tiyakojqa mana kanqachu. Ayayqeqa ruphaypitaj chiripitaj wijch'usqa kanqa.

³¹Qanta jinataj mirayniykita, kamachisniykitapis juchasninkumanta jasut'isaj. Qankunaj pataykichejman, Jerusalempi tiyakojkunajpaman, Judapi tiyakojkunajpamampis, tukuy laya ñak'ariykunasta apachimusaj, apachimunay karqa chaykunasta, mayqenkunatachus qankunaqa mana kasorqankichejchu.

³²Chanta Jeremiasqa waj librota jap'iytwan qelqerin Barucman jaywarqa. Paytaj qelqarqa Jeremiaspa tukuy parlasqanta. Chayqa niyta munan imaschus rey Joacimpa ruphachisqan libropi qelqasqa karqa chay tukuyta. Jeremiasqa waj ashkha imastawanraj kay palabrasman rijch'akojta yapaykorqa.