Read Quechua Bolivia DC Bible JEREMÍAS 4 Bible Online

JEREMÍAS 4 - Quechua Bolivia DC Bible bible

JEREMÍAS 4

¹Señorqa nin: Israel, kutimpuyta munanki chayqa, noqaman kutimpunayki tiyan. Chay millay lantisniykimanta t'aqakunki, noqamantataj mana t'aqakunkichu chayqa, chaypacha cheqamanta sutiypi juranayki tiyan, jinallataj justiciapi, cheqan kaypipis. Chaypacha nacionesqa sutiynejta bendicisqas kanqanku, jatunchawanqankutaj.

³Señorqa nin, Judapi kaj runasman, jinallataj Jerusalempi kaj runasmampis: Sumajta jallp'ata llank'aychej, amaña khishkas ukhuman tarpuychejchu.

⁴Judamanta, Jerusalenmantapis runas circuncidakuychej, rejsiwankichejtaj Señorniykichejpaj jina. Tratomanta señalta sonqoykichejman churaychej, pajtataj millay ruwasqasniykichejrayku phiñakuyniy nina jina k'ajarinman, jap'iykukojtintaj ni pi thasnuyta atishanmanchu.

⁵Kayta willaraykichej Jerusalempi, jinallataj Judá ayllupi, putututa waqachispa qhapariychej kay tukuy jallp'api, sinch'itapuni qhapariychej: Tantakamuychej! Jamuychej, pakakunasniyoj llajtasman!

⁶Banderata Sión cheqanejman sayachiychej. Mask'aychej paykunata, amataj sayakuychejchu! Wichay ladomantaqa jatun ñak'ariyta, wañuchinakuytawan apamusaj.

⁷Leonqa pakakuna jusk'umanta llojsimunña, nacionesta chinkarachejqa puririmunña; tukuy llajtasniykita ch'inyachinampaj, raqaykunallatataj saqenampaj.

⁸Chayrayku qhashqa p'achaswan p'achallikuychej, waqaychej, nanaywantaj qhaparqachaychej, imaraykuchus Señorpa k'ajaj phiñakuynenqa manaraj noqanchejmanta t'aqakunchu.

⁹Señorqa nin: Chay p'unchay chayamojtenqa, reyniykichej, kurajkunasnintin manchachikuywan kharkatitenqanku, sacerdotespis mancharikonqanku, profetakunapis t'ukushaj qhepakonqanku.

¹⁰Noqa nerqani: Ay Señor, imajtintaj Jerusalempi kaj runasta ch'aukiyankiri? Sonqo tiyakuyta qosqaykichej nerqanki, kunantaj kunkankupi cuchillo churasqa kashan.

¹¹Chay p'unchay chayamojtenqa, Jerusalén llajtamanta parlakonqa: Ch'in pampanejmanta q'oñi wayra phukumushan kay aylluynejman. Kayqa mana trigota wayrachinapaj jina allin wayrachu.

¹²Wayrata noqa apachimusaj chay wayraqa, ancha sinch'i wayra kanqa. Kunanrajmari paykunaj contrankupi jasut'i wakichikunanta kamachisaj.

¹³Qhawariychej, enemigosqa phuyu jina jamurishanku; ch'ajwapaj wakichisqa carretasninkoqa jatun muyoj wayraman rijch'akunku, caballosninkutaj ankasmantapis aswan sinch'i chakis kanku. Ay, imachus noqanchejqa chinkasqas kanchej!

¹⁴Jerusalén, sonqoykimanta sajra imasta llimphuchakuy, jinamanta salvasqa kanaykipaj. Mayk'ajkamataj umaykita muyuchikunki chay sajra yuyaykunawanri?

¹⁵Danmantapacha, Efraimpa orqo puntasninmantapacha, mana allin willaykuna chayamunku.

¹⁶Nacionesman, chantá Jerusalenmampis willaychej, karu llajtasmanta enemigosninku kachaykakamusqankuta, maqanaku ch'ajwaykunawan, tukuy Judapi kaj llajtaspa contrampi.

¹⁷Imaynatachus chay camposninkuta qhawajkuna muyuykunku, ajinata Judá aylluman muyuykonqanku, Señorpa contrampi oqharikusqankurayku. Señormin ajinata nin.

¹⁸Purisqasniyki, ruwasqasniykitaj, kay imaschus qhatirisunki chaytaqa apamun, juchasniykirayku kay jatun llakiykunaqa jamun, chaytaj sonqoykita mayta nanachisunki.

¹⁹Nanaywan q'ewiykachakuni; sonqoy aswan sinch'ita tiseqeyarin. Sonqoy t'impushan, mana ch'in kakuymanchu. Pututoj waqayninta uyarini, maqanakupi qhaparqachaytawan.

²⁰Sapa kuti llakiykunasmanta willaykunas chayamun. Tukuy jallp'antin phirisqa kashan. Uj ratollapi toldosniy phirisqas rikhurerqanku, maqanakuna toldosnimpis phaskasqas karqanku.

²¹Mashkha unaytawanrajtaj pataman banderata sayachisqata rikusajri, pututoj ch'ajwaynintapis uyarisajri?

²²Israel aylloyqa ancha wampu, mana rejsiwanchu, nin Señorqa. Mana yuyayniyoj wawas kanku, mana allintachu unanchakunku. Juchata ruwanankupajqa churasqas kanku, manataj allin kajta ruwayta yachankuchu.

²³Jallp'ata qhawarqani, rikorqanitaj ch'impachata, mana allin rijch'ayniyojtataj. Janaj pachata qhawarerqani, manataj k'anchayta rikorqanichu.

²⁴Orqosta qhawarerqani, manchayta ikharikusharqanku, tukuy juch'uy lomasnimpis kharkatishallarqankutaj.

²⁵Qhawarerqani manañataj uj runapis karqañachu, tukuy phawaj p'isqospis phawarikapusqanku.

²⁶Qhawarerqani, campospi chay poqoykunapis ch'in pampaman tukuchisqa karqa. Tukuy llajtasnimpis raqaykunallaña karqa. Señorqa k'ajaj phiñakuynin kay tukuytaqa ruwacherqa.

²⁷Señorqa nin: Tukuy jallp'antin q'arasqa kanqa, chaywampis mana tukuynintapunichu chinkachisaj.

²⁸Tukuy jallp'aman llakiylla junt'aykonqa, janaj pachapis llakiy p'achata churakonqa. Chayta parlani, manataj chay nisqasniymantaqa yuyarikusajchu, chayta niniña, manataj qhepaman kutiymanchu, nispa.

²⁹Caballospi jamojkunaspa, jinallataj wach'ina arcosniyojkunaspa ch'ajwaykunasninwan, runasqa usqhay usqhayta ayqenku, thansas ukhuman pakakamunankupaj, chayri qaqa k'ajllusman. Tukuy llajtas saqerpayasqas qhepakorqanku, manaña pipis chaypi tiyakojqa qhepakorqañachu.

³⁰Qanrí, raqayllaña kaj llajta, Imapajtaj puka p'achaswan p'achallikunkiri? Imapajtaj qori k'achanchanaswan k'achanchakunkiri? Imapajtaj ñawisniykita yanawan tiñikunkiri? Mana imapaj allinchu kasonqa chay k'achanchakusqasniykeqa, tukuy munapayasojkunaqa qhesachasunkuña, astawampis wañuchinasunkupaj mask'ashasunku.

³¹Nanaywan qhapariykunasta uyarini, uj warmi, ñaupaj kaj wawanta nacechikuspa nanaywan qhaparqachan ajina. Chaykunaqa Sión orqoj qharparikusqasnin kanku, makisnintataj jaywarakun. Ay noqamanta! Kay runa wañuchis wañuchishawankuña!, nispa.