Read Quechua Bolivia DC Bible JEREMÍAS 42 Bible Online

JEREMÍAS 42 - Quechua Bolivia DC Bible bible

JEREMÍAS 42

¹Tukuy kamachejkuna soldados ukhumanta, Careaj wawan Johanampis paykunallawantaj, Oseaspa wawan Azariaspis, jinataj tukuy aylluntimpi juch'uymanta jatunkama qayllarqanku.

²Profeta Jeremiasman qayllarqanku, nerqankutaj: Uj imata mañakuyku: Ama qhesachawaykuchu. Kay pisi p'unchaykunapaj Diosniykimanta mañapuwayku. Ñaupajta ashkhas karqayku. Kunantaj uj chhikallaña puchurpariyku kay imaynatachus rikunki ajinata, chayman jina Señor Diosniyki yachachinawaykupaj, ima ñantachus qhatinaykuta, imatatajchus ruwanaykuta.

⁴Jeremiastaj paykunaman kuticherqa: Walej, Señor Diosniykichejmanta qankunarayku mañasaj imaynatachus mañawasqaykichejman jina; chantá rejsichisqaykichejtaj tukuy imatachus Dios kutichiwasqanta mana uj chhikanta pakaykurispa.

⁵Chaypacha paykuna Jeremiasman nerqanku: Señor Diosniyki noqaykoj contraykupi cheqan testigo kachun, sichus Señor Diosniykej noqaykuman nisusqanta mana junt'aykuman chayqa.

⁶Allimpis kachun mana allimpis kachun, Señor Diosniykutaqa kasusqaykupuni, imaraykuchus noqayku parlamunaykipaj kacharqayku, jinamanta allin rinawaykupaj.

⁷Chunka p'unchaymanta qhepaman Señorqa Jeremiasman parlarqa.

⁸Careaj wawan Johananta wajyarqa, jinallataj paywan kasharqanku chay soldadosta kamachejkunatapis, jinallataj tukuy runasmanta juch'uymanta jatunkama.

⁹Paykunamantaj nerqa: Pimanchus qankuna kachawarqankichej, nisqaykichejta mañamunaypaj chay Israelpa Señor Diosnenqa kay jinata nin:

¹⁰Sichus qankuna kay jallp'api tiyakuyta munankichej chayqa, noqa qankunata aswan allin kajwan yanapasqaykichej, mana chinkachisqaykichejchu, manachayqa allinta sayachisqaykichej, manataj t'irasqaykichejchu. Mayta sonqoyta nanachikuni kay ñak'ariykunasta qankunaman apachimusqaymanta.

¹¹Babiloniamanta reyta ama manchachikuychejchu, mayqentachus mayta manchachikunkichej chayta. Ama paytaqa manchachikuychejchu, imaraykuchus noqa qankunawan kashani salvanasuykichejpaj, kacharichisunaykichejpaj paypa atiyninmanta. Noqa Señor chayta nini.

¹²Qankunamantataj khuyakusaj, jallp'aykichejmantaj kutipojta saqesonqachej.

¹³Jinapis qankuna kay jallp'api mana qhepakuyta munankichej chayqa, ajinamanta Señor Diosniykichejtapis mana kasuspa chayqa, niykichejtaj: Egiptollapi tiyakuyta munaykuman karqa, maypichus maqanakusta mana rikusqaykuchu, manataj trompeta waqaykunasta uyarisqaykuchu, manallataj yarqhaymantapis wañusqaykuchu.

¹⁵Jinaqa uyariychej Judamanta qhepakojkuna Israelpa Tukuy Atiyniyoj Señor Diosnin imastachus qankunaman nisusqaykichejta: Sichus qankuna Egiptomampuni riyta munawajchej chayqa, maqanaku, yarqhay, mayqenkunastachus qankuna manchachikushankichej chayqa chayamusonqachejpuni, chay kikimpitaj wañunkichej.

¹⁷Egiptoman rispa tukuyniykichej tiyakamuyta munashajkunaqa, chaypi maqanakupi wañupunkichej, chayri yarqhaywan, chayri onqoywan. Mana pipis kausashajqa qhepakonqachu, manataj pipis ayqenqachu kay ñak'ariykunasta qankunaman apachimusqaymantaqa.

¹⁸Tukuy Atiyniyoj Señor Israelpa Diosnin nin: Ajinata imaynatachus phiñakuyniy k'ajarerqa Jerusalempi tiyakojkunaspa contrampi, ajinallatataj qankunaj contraykichejpipis oqharikusaj, sichus qankuna Egiptoman ripunkichej chayqa. Qankunapi tukuypa rikunanta maldicionniy rikuchisqa kanampaj, mayta t'ukunapaj jina kanqa, manataj jayk'aj kay lugarta rikunkichejñachu.

¹⁹Qankunaman Judá ayllumanta qhepakunkichejraj chaykunaman, Señor kamachisunkichej Egiptoman ama kutinaykichejta. Allinta yachaychej, noqa kunan allinta k'amishaykichej.

²⁰Qankuna jatun pantakuyta ruwashankichej, qankunallataj niwarqankichej Señor Diosniykichejman qayllaykunayta, niwarqankichejta; Señor Diosniykumanta noqaykurayku mañaripuwayku, yachachiwaykutaj tukuy pay kamachiwasqasniykuta, chayman jina ruwanaykupaj, nispa.

²¹Noqa kunan qankunaman rejsichiykichej imastachus Señor qankunaman ninayta kamachiwarqa chaykunasta, jinapis qankunaqa mana kasukuyta munankichejchu.

²²Chayrayku allinta yachakuychej, qankunaqa maqanakupi wañunkichej, yarqhaywan, onqoywantaj, may jallp'amanchus tiyakamoj riyta munashankichej chaypi.