Read Quechua Bolivia DC Bible JEREMÍAS 43 Bible Online

JEREMÍAS 43 - Quechua Bolivia DC Bible bible

JEREMÍAS 43

¹Maypachachus Jeremías Israel aylluman willayta tukorqa, paykunaj Señor Diosninku imastachus paykunaman nichisqanta.

²Osiaspa wawan Azarías, Careaj wawan Johananwan, waj wapuykachaj runaspiwan Jeremiasman nerqanku: Chay nisqaykeqa llulla, Señor Diosniykoqa mana kachamusunkichu, mana Egiptoman tiyakoj rinaykumanta ninawaykupajqa.

³Neriaspa wawan Baruclla wakichisunki, noqaykoj contraykupi imatachus ninawaykuta umachasunki, caldeospa atiynin uraman urmanaykuta munaspa, paykuna wañuchinawaykupaj, chayri Babiloniaman wijch'umunawaykupaj.

⁴Ajinaqa, ni Johanán, nitaj soldadosmanta kurajkunapis, nillataj Judapi qhepakoj runaspis, Señorpa nisqanta, mana kasorqankuchu, ajinamanta Judapi qhepakunankupaj.

⁵Manachayqa Johanán, tukuy soldadosmanta kurajkunapiwan Judapi puchoj runastawan tantaykorqanku. Tukuy cheqasman ch'eqerachisqas kasqankumantaña, wakin Judá ayllumanta kutimpullasqataj chay llajtankupi tiyakoj: Qharista, warmista, wawasta, reypa warmi wawasnintawan; jinataj pikunatachus kamachej Nabuzaradán Gedaliasman qhawanampaj saqerqa, chantapis, Jeremiasta, Neriaspa wawan Baructawan.

⁷Señorpa kamachisqanta mana kasuspa tukuyninku Egipto llajtaman riporqanku, Tafnes llajtakamataj chayarqanku.

⁸Tafnespitaj Señorqa Jeremiasman parlarqa: Jatuchaj rumista oqharikuy, chaymantaqa Judá aylloj ñaupaqempi wasej patampi p'ampaykuy llajtaj reynimpa palaciompa chimpannejman.

¹⁰Israelpa Tukuy Atiyniyoj Señor Diosnin nin: Babiloniamanta kamachej rey Nabucodonosorta pusachimusaj, chaymantaqa kay p'ampasqayki rumis pataman trononta churasaj, ajinallatataj toldontapis.

¹¹Paytaj Egipto jallp'ata phirita ruwanqa. Pischus wañunankupaj kashanku chaykunaqa wañonqanku, pischus jallp'amanta wijch'usqas kanankupaj kashanku chaykunaqa wijch'usqas kanqanku, pistajchus maqanakupi wañunankupaj kashanku chaykunaqa maqanakupi wañonqanku.

¹²Egiptopi Diosta yupaychana wasisman payqa ninata jap'iykuchenqa, dioskunasninkutataj presospis kankuman jina apakaponqanku. Egiptomanta pichanqa, imaynatachus uj michejqa p'achasninmanta usasninta pallan ajina, chaymantataj riponqa mana pejpa jark'asqan.

¹³Phirillantaj Egiptopi intita yupaychana wasista, ninawantaj lanti yupaychana wasista kanaykonqa.