Read Quechua Bolivia DC Bible JEREMÍAS 44 Bible Online

JEREMÍAS 44 - Quechua Bolivia DC Bible bible

JEREMÍAS 44

¹Jeremiasqa Judá ayllumanta kajkunapaj uj willayta jap'erqa, pischus Egipto jallp'api tiyakusharqanku chaykunapaj: Migdolpi, Tafnespi, Menfispi, uranej uray jallp'aspi ima: Israelpa Tukuy Atiyniyoj Señor Diosnin nin: Qankuna rikunkichej tukuy ñak'ariykunasta, Jerusalempa patanman apachimusqayta, jinataj Judamanta chay waj llajtasmampis. Kunan chaykunaqa urmachisqas kashanku, manataj pipis chaykunapi tiyakunñachu.

³Chay millay juchasta ruwasqasninkurayku, phiñachiwarqanku waj dioskunasllata yupaychaspa, inciensosta q'osñichispa; chay dioskunaqa mana imatapis ruwanankuchu karqa, paykunawan qankunawan, nitaj ñaupa tatasniykichejwampis.

⁴Kutin kutinta kamachisniy profetasta qankunaman kachamorqaykichej willanasuykichejpaj millachikuni chaykunata amaña ruwanaykichejpaj.

⁵Jinapis qankunaqa nisqayta mana ruwarqankichejchu, nitaj kasuwarqankichejchu. Juchasta saqenaykichejtaqa, inciensosta waj dioskunallaman q'osñichinkichej.

⁶Chaypacha k'ajaj phiñakuyniyta, ninata jina lauraricherqankichej, Judá llajtaspi, Jerusalén callespi ima. Chaykuna kunan p'unchaykama ch'impacha raqaykunasllaña qhepakunku.

⁷Israelpa Tukuy Atiyniyoj Señor Diosnin kunan nini: Imaraykutaj chay jatun sajra imasta qankunallataj apakamunkichejri? Imaraykutaj Judamanta qharista, warmista, wawasta, ñuñoj wawasta mana ujniyoj chinkanankuta munankichejri?

⁸Imaraykutaj ruwasqasniykichejwan phiñachiwankichej, kaj tiyakushankichej chay Egiptopi waj dioskunasllaman inciensosta q'osñichispari? Chay imaswanqa qankuna chinkachisqas kanallaykichejpajtaj wakichishankichej, tukuypi rikunantataj maldicisqas kankichej, k'umuykachachisqastaj kay pachapi tukuy naciones ukhupi.

⁹Ñachu qonqapunkichejña ñaupa tatasniykichejpa tukuy juchasta ruwasqasninkumanta, Judamanta reykunajta, chantá warmisninkojmanta qankuna kikiykichej ruwasqasniykichejmanta, warmisniykichejpis chay tukuy Judá jallp'api, jinataj Jerusalén callespipis?

¹⁰Kunankama qankunaqa mana saqenkichejchu sajra puriyniykichejta, nitaj manchachikuyniykichejpis kanchu, nitaj yachachisqasta, nitaj leykunastapis junt'ankichejchu, qankunaman, jinataj ñaupa tatasniykichejmampis qorqani chaykunata ima.

¹¹Chayrayku noqa Israelpa Tukuy Atiyniyoj Señor Diosnin niykichej: Qankunaj pataykichejman sajra kajkunata apachimusaj, jinallataj tukuy Judata chinkachinayta nini.

¹²Judamanta puchojkuna Egiptoman tiyakapoj apurakaporqanku, chaykunataqa tukuyninku wañuchisqas kanankuta nini. Tukuyninku aswan juch'uymanta, aswan jatunkama wañonqanku maqanakupi, chayri yarqhaypi, tukuypa rikunantataj maldicisqas, t'ukunapaj jina may k'umuykachachisqastaj kanqanku.

¹³Egiptopi tiyakojkunata jasut'isaj, imaynatachus Jerusalempi tiyakojkunata maqanakuywan, yarqhaywan, onqoywan ima jasut'erqani ajinata.

¹⁴Puchoj judíos, Egiptoman tiyakoj ripojkunamanta mana ujllapis ayqeyta atenqankuchu Judaman mayta kutipuyta munashaspapis. Jinamanta manapuni tiyakapoj kutiponqankuchu, manachayqa pisislla chay ayqekojkunamanta kutenqanku.

¹⁵Chantá tukuy runas, warmisninku inciensosta waj dioskunaman q'osñichisqankuta yachajkuna, chaypi tukuy warmis kajkuna, jinataj Judamanta runaspis Egiptopi Patros chaynejpi tiyakojkuna ima ashkhas tantaykukuspa Jeremiasman kuticherqanku: Señorpa willachimuwasqaykuta mana kasusqaykuchu.

¹⁷Manachayqa ruwallasqaykupuni imatachus ruwanaykuta nerqayku chaykunata. Jaywallasqaykupuni inciensosta, vinotapis ch'allasqayku Cielomanta Reina nisqa diosaman, imaynatachus kunankama reyesniyku, noqayku, ñaupa tatasniyku ruwarqanku ajinata, Judá llajtaspi, jinallataj Jerusalén callespipis; ñaupajtaqa ashkha mikhunasniyku tiyapuwarqayku atipachikunaykupaj jina, tukuy imapi allin riwarqayku, manataj ima ñak'ariypis jamuwarqaykuchu.

¹⁸Maypachachus inciensosta, vinota chay Cielomanta Reinaman jaywayta saqerqayku chaymantapacha tukuy imas pisiwayku, runasniykupis yarqhaypitaj, maqanakupitaj wañuranku.

¹⁹Chayman warmis yaparqanku: Noqaykoqa t'antasta ruwaj kayku chay Cielomanta Reina nisqaj sutimpi lantinman rijch'akojta, inciensosta jaywaj kayku, vinomanta rikuchikustapis jaywaj kayku. Chay tukuytaqa qosasniykoj yachasqan ruwayku.

²⁰Chaypacha Jeremiasqa kuticherqa, tukuy qharisman, warmisman, chay jinata kutichisqankumanta: Qankunaqa yuyankichejchu kay tukuyta Señorqa mana yachasqanta, chayri qonqapusqantapis, ñaupa tatasniykichej, kurajkunasniykichej, jinata tukuy aylluntin inciensosta waj dioskunaman jaywasqaykichejta chay Judá llajtapi Jerusalén callespipis?

²²Señorqa manapuni rikuyta aterqachu qankunaj chay millay ruwasqasniykichejta, chay ruwasqasniykichejqa payman mana allimpajchu rijch'an. Chayraykumin qankunaj jallp'aykichejqa ch'inyachisqa kashan, mana runayoj; tukuy yachaqakunampaj jina maldicisqa mancharikunapaj jina kashan.

²³Kay sajra ñak'areyqa waj dioskunaman inciensota q'osñichisqaykichejrayku jamushasunkichej, jinamanta Señorpa contrampi juchallispa mana paypa yachachiykunasninta, leykunasnintapis kasusqaykichejrayku, nitaj nisqasninta junt'asqaykichejrayku ima.

²⁴Chaywampis Jeremiasqa tukuy aylluman nerqa, astawanqa warmisman: Uyariychej, tukuy qankunapaj kay Señorpa willayninta, Judá ayllumanta runas Egiptopi tiyakojkuna uyariychej.

²⁵Israelpa Tukuy Atiyniyoj Señor Diosnin nin: Qankuna, warmis, simiykichejwan ninkichej, makiykichejwantaj kikinta ruwankichej. Qankuna ninkichej inciensosta, rikuchikustapis Cielomanta Reina nisqaman jaywanaykichejta, nisqaykichejtataj junt'anaykichejtapuni. Kunanqa junt'aychej, ruwaypitaj rikuchiychej chay ruwasaj nisqaykichejta.

²⁶Tukuyniykichej Judamanta kaj runas Egiptopi tiyakojkuna Señorpa nisqanta uyariychej: Jatun sutiyrayku jurani, manaña pipis Judamanta kajkunaqa manaña ujtawan parlanqachu tukuynin Egipto jallp'api sutiyta oqharenqankuchu, Señorpa sutinrayku, nispaqa.

²⁷Noqa qhawashani ñak'ariykunasta apachimunaypaj, mana allin kajkunatachu. Judamanta tukuy Egiptopi tiyakushajkuna, cheqamanta tukuyninku maqanakupi, yarqhaywantaj wañuchisqas kanqanku.

²⁸Pisislla wañuymanta puchojkunaqa kanqanku Egiptomanta, Judá ayllumanta kajkuna kutimpojkunaqa. Ajinaqa tukuy Judapi qhepakojkunaqa, jinataj Egiptoman tiyakoj ripojkunaqa ima palabraschus junt'akusqanta rikonqanku paykunajtachus, chayri noqajtachus.

²⁹Noqa Señor qankunaman kay señalta qosqaykichej yachanaykichejpaj, kay tukuy nisqasniy junt'akunampaj kay jallp'api qankunata jasut'inaypaj.

³⁰Noqa jaywaykusaj Egiptomanta rey Hofra faraonta wañuchej enemigosnimpa makisninman, imaynatachus Sedequiasta Judamanta reyta Babiloniamanta rey Nabucodonosorman jaywarqani ajinata; chayqa wañuchiyta munaj enemigoy karqa.