Read Quechua Bolivia DC Bible JEREMÍAS 5 Bible Online

JEREMÍAS 5 - Quechua Bolivia DC Bible bible

JEREMÍAS 5

¹Señorqa nin: Jerusalempa callesninta allinta qhawaspa muyuykachaychej, plazasnejta mask'aychej, ichachus pillatapis tarinkichej cheqan kajta ruwajta, tukuy ruwasqampi mana llullakojta. Pillatapis tarinkichej chayqa, Jerusalén llajtata qhespichisaj.

²Señorpa kausayninrayku jurajkunapis, llullakuspa juranku.

³Señor, qanqa cheqan runasta mask'ashanki. Jasut'erqanki, manataj nanachikorqankuchu; t'unaykorqankipis, manataj yachayta munarqankuchu. Ancha k'ullukojkunas kanku, rumismanta aswan sinch'istaj, manapuni allin ñanman kutirimuyta munarqankuchu.

⁴Noqa yuyarqani: Wajchakunalla wampus jina purisqankuta, imaraykuchus mana yachankuchu Señorpa munayninta, nitaj Diosninkoj kamachisqantapis.

⁵Chay jatun wiraqochisman risaj, paykunamantaj parlamusaj. Paykunaqa yachanqankupuni imachus Señorpa munaynin kasqanta, Diospa kamachisqantataj. Chaywampis, tukuyninku Diospa contrampi oqharikusqanku, manataj kasuyta munasqankuchu.

⁶Chayraykumin montemanta leones llojsimuspa wañurachenqanku, chay ch'in pampamanta atojkunataj t'isaranqanku, onzaspis llajtasninku qayllapi qhatiykachanqanku. Llajtasninkumanta llojsejtinkutaj paykunata t'isaranqanku, imaraykuchus ashkha kutista juchallerqanku, ashkha kutistataj wasanchararqanku.

⁷Señorqa nin: Imaynatataj kay tukuymanta perdonaykimanri? Wawasniyki saqerpariwanku, jurankutaj qhasi mana kaj dioskunasninkunejta. Ashkha mikhunawan atipacherqani, jinapis paykunaqa qhenchachakorqanku, tukuyninkutaj qhencharioman qokaporqanku.

⁸Chay qachilo caballos jina sink'urispa rinku, runa masinkoj warmimpa qhepanta.

⁹Manachu chay tukuymanta jasut'iymanri? Manachu ajina ayllumanqa chayta mask'akusqanman jina qopuymanri?

¹⁰Enemigosninkutaj yaykuchunku, huertasninkutataj q'arachunku. Amapis tukuyninkutachu q'arachunku. Ramasninta k'ajllarachunku, imaraykuchus chay uvas sach'asqa manaña noqajtachu.

¹¹Israelwan, Judawanqa wasanchawanku. Noqa Señor chayta nini. Jasut'i jamunanmanta willaykuna

¹²Israelwan Judawanqa Señorqa qhesachanku, kay jinata nispa: Payqa mana kanchu. Mana ima sajraspis qhatiriwasunchu, mana kanqachu maqanakuykuna, nitaj yarqhaykunapis, nispa.

¹³Profetasqa qhasi wayralla kanku, Señorpa palabranqa mana paykunapichu kashan. Arí, walejpacha, kayta niwan Tukuy Atiyniyoj Señor.

¹⁴Chayta paykuna nisqankurayku kay imas paykunata qhatirenqa: Saqesaj kay parlasqasniy, nina jina simiykimanta llojsinanta, Israel ayllutaj llant'a jina kachun, chay ninataj paykunata ruphaykonqa.

¹⁵Señorqa nillantaj: Israel, contraykipi karumantapacha waj llajtayojkunata pusamusaj, chay llajtayojkunaqa manchay sinch'i runas kanku, may unay runastaj kanku. Qanqa parlayninkuta mana rejsinkichu, nitaj chay nisqasninkuta yachankichu.

¹⁶Tukuy chay runasqa sinch'i maqanakojkuna kanku, armasninkutaj wañuywan ninakun.

¹⁷Poqochisqasniykita, t'antaykitapis mikhukaponqanku, chantapis qhari wawasniykita, warmi wawasniykitapis oqoykonqanku. Ovejasniykita, wakasniykitapis mikhullanqankutaj, uvas poqoykunasniykita, higos poqoykunasniykita ima. Chay armasninkuwan, chay atienekoj kanki chay ruwasqa llajtasniykita phirenqanku.

¹⁸Señorqa nillantaj: Chaywampis chay p'unchaykunapeqa mana tukuynintachu phirisaj.

¹⁹Maypachachus tapusonqachej: Imaraykutaj kay tukuyta Señor Diosninchej ruwawarqanchejri?, nispa chayqa kay jinata kutichiychej: Imaynatachus Señorta saqerparispa, kikin jallp'aykichejpi yupaychaj kankichej, chay mana rejsisqa dioskunata, ajinallatataj sirvinaykichej kanqa waj llajtayoj mana rejsisqa runata.

²⁰Israel reinoman willaychej, Judamantaj niychej:

²¹Kayta uyariy wampu, rumi sonqo Israel ayllu. Ñawisniyoj kanki, manataj rikunkichu, ningrisniyoj kanki, manataj uyarinkichu.

²²Noqa Señor nini: Qankuna manachu manchachikuwankichej? Manachu ñaupaqeypi kaspa kharkatitinkichej? Noqa mar qochaj cantosninman t'iyuta churani. Chay tukuyninmanta astawan jaqaymanqa mar qocha mana pasanñachu. Chay qhollchoqeyasqasnenqa astawan astawan, manchayta sonarispa phiñarikun, chaywampis mana pasayta atinchu.

²³Qankunaj sonqoykichejri ancha rumiyasqa, mana kasukojtaj, saqerpayawaspataj riporqankichej.

²⁴Mana unancharerqankichejchu, nitaj nerqankichejchu: Señor Diosninchejta manchachikunachej, payqa maychus tiempompi paratapis apachimuwanchej, ñaupaj parasta, qhepa parastapis. Cosechata oqharinapajtaj uj tiempota wakichipuwanchej.

²⁵Qankunaj juchasniykichejqa kay tukuyta jark'arqa, chayrayku allin imasta mana jap'iyta aterqankichejchu.

²⁶Chay aylluy ukhupi sajra runas tiyan, chay p'isqosta jap'ejkuna jina wateqanku, chaypajrí runasllata jap'inku.

²⁷Wasisninkuta suwasqa imallawan junt'achinku, imaynatachus p'isqosta jaulasman junt'achinku ajina. Ajinamanta atiyniyojman, qhapajmantaj tukunku.

²⁸Chaypitaj sumaj mikhusqas, wirastaj karishanku. Chay sajra ruwanankoqa mana tukukuyniyoj: Mana tatayoj wawasta mana qhawarikuchu, nitaj wajcha runaspa kausaynintapis allintachu qhawanku.

²⁹Manachu kay tukuymantaqa jasut'isaj? Manachu ajina runasmanqa chay ruwasqankuman jina qopusaj? Noqa Señormin chayta nini.

³⁰Manchay t'ukuna, manchachikuna imastaj, kay llajtapeqa rikhurishan.

³¹Chay profetaspa sut'inchasqasninkoqa llullas kanku, sacerdotekunapis munasqankuman jinalla kamachinku. Aylloyqa ajinatapis munallan! Chaywampis, imanankichejtaj chay tukukuy p'unchay chayamojtinri?