Read Quechua Bolivia DC Bible JEREMÍAS 52 Bible Online

JEREMÍAS 52 - Quechua Bolivia DC Bible bible

JEREMÍAS 52

¹Maypachachus Sedequías kamachiyta qallarishajtenqa iskay chunka ujniyoj watasniyojña karqa, chunka ujniyoj watastataj Jerusalempi kamacherqa. Mamampata sutin karqa Hamutal; payqa Libnamanta Jeremiaspa ususin karqa.

²Sedequiaspis sajra imasta ruwallarqataj Señor imastachus chejnej chaykunata, imaynatachus rey Joacimpis ruwarqa ajinata paypis ruwarqa.

³Chayrayku Señorqa Jerusalempaj phiñakorqa, chantá Judá ayllupajpis, ñaupaqenmantataj wijch'orqa. Sedequiastaj Babiloniamanta reypa contrampi oqharikorqa.

⁴Maypachachus Sedequías isq'on watastaña chunka kaj killapi kamachishajtin, chunka p'unchaynimpi rey Nabucodonosorqa tukuy soldadosnintin Jerusalenta jap'inampaj purirerqa, muyuykorqataj. Jerusalempa ñaupaqempi jaraykukorqa, chay muyuykunasnimpitaj jallp'a moqosta llajtaman yaykunankupaj sayaricherqanku.

⁵Jerusalén llajtaqa Sedequías chunka ujniyoj watasta kamachinankama soldadoswan muyuykusqa karqa.

⁶Chay watamanta tawa kaj killampi isq'on kaj p'unchaynimpitaj Jerusalempi astawan yapakorqa, runas mikhunankupaj manaña imapis karqañachu.

⁷Chaypacha llajtaj perqasninta jusk'urparerqanku, chaypi caldeos jark'asharqanku. Chay ch'isi tukuy soldadosnintin reyqa chay llajtamanta ayqerqanku. Maypichus iskay perqas chaupipi uj punku kasharqa chayninta llojserqanku, reypa huertanman rina ñanninnejta rispa, chaymanta jap'irerqanku Jordán valleman pusaj ñanta.

⁸Jinapis caldeosmanta kajkuna soldadosqa rey Sedequiasta qhatiykorqanku, chay Jericó pampanejpitaj taripamorqanku. Soldadosnintaj payta saqerparerqanku, tukuynejmantaj ch'eqeraporqanku.

⁹Caldeostaj reyta jap'iytawankama, aparqanku Babiloniaj reypa ñaupaqenman, pichus Ribla llajtapi kasharqa, Hamat jallp'api. Chaypimá Nabucodonosorqa rey Sedequías wañunanta kamacherqa.

¹⁰Paypa ñaupaqempi wawasnimpa umasninta qholurparerqa, jinataj Judamanta chay allichaj runasnintapis.

¹¹Sedequiasmantarí kamacherqa ñawisninta orqhorparispa cadenawan ch'ipaykuytawankama Babiloniaman pusanankuta. Chaypi presochasqa karqa wañunankama.

¹²Babiloniamanta rey Nabucodonosorqa chunka isq'onniyoj watastaña kamachishajtin, phishqa kaj killampi chunka kaj p'unchaynimpitaj, Nabuzaradán Jerusalenman chayamorqa; payqa karqa reypa yanapajnin, reypa soldadosninta kamachej runa.

¹³Paytaj Diosta yupaychana wasita ruphaykucherqa reypa palacionta, chantá llajtapi tukuynin wasistapis, astawanqa allin rejsisqa runaspa wasisninkuta.

¹⁴Riyserqanku chay soldadostaj Jerusalempa muyuynimpi kasharqa chay perqata thuñiykorqanku.

¹⁵Chaymantaqa Nabuzaradanllataj Babiloniaman pusarqa chaypi wijch'usqas kamunankupaj, tukuy chay llajtapi puchojkunata, jinataj Babiloniamanta reywan ujchakojkunata tukuy puchojkunatawan.

¹⁶Wakin allin wajcha runasnin kajkunallata puchucherqa, chay uvas chajrata poqochejkunapaj, chantá chay jallp'asta llank'anankupaj.

¹⁷Caldeosqa chay Diosta yupaychana wasipi broncemanta tukuy imasta t'unararqanku: Bronce sayantasta, pampa chukusninta, jatun yaku churusnintapis. Chay tukuynin broncetataj Babiloniaman apakaporqanku.

¹⁸Ajinallatataj aparqanku chay ushpha jap'inasta, palasta, mecha ushpha orqhonasta, jatuchaj vasosta, jatuchaj cucharasta, jinataj Diosta yupaychanapaj broncemanta kaj imastapis.

¹⁹Ajinallatataj, chay soldadosta kamachej apakaporqa qorimanta, qolqemanta, tukuy kaj imasta: Mayllakuna chuwasta, nina braserosta, jatuchaj vasosta, ushpha orqhonasta, k'anchanasta, jatuchaj cucharasta, ofrenda vinopaj kaj vasostapis, iskay sayantasta, jatun yaku churanata, chunka iskayniyoj bronce torosta, jinataj chay uran chukusta, mayqenkunatachus rey Salomón Diosta yupaychana wasipaj ruwachisqa chaykunata. Chay tukuymanta parlajtenqa mana yachakorqachu mashkhachus kasqan.

²¹Chay iskay jatuchaj sayantasqa sapa uj pataman pusaj metrosniyoj karqa, muyuyninmantaj phishqa metros khuskanniyoj jina karqa. Sonqonqa soqolla karqa. Chay bronceqa phatunman uj t'ajlli jina karqa.

²²Sapa sayanta patapi bronce kirpanayoj karqa. Chaytaj phatunman iskay metro kuraj jina karqa. Chaypa muyuynintaj broncemanta simp'asqawan muyuykuchisqa karqa, chantá broncemanta morq'oswan k'achanchasqataj. Iskaynin sayantasnin kikinkamalla karqanku.

²³Chay broncewan simp'aykusqaj patampi sapa ujpi karqa puka morq'os jina, chay tukuymantaqa isq'on chunka sojtayoj sut'ipi kasharqanku.

²⁴Soldadosta kamachejqa kuraj sacerdote Seraiasta presota jap'erqa, pay jina sacerdotellataj karqa chay Sofoniastawan. Chantá Diosta yupaychana wasej patiompi kinsa soldados qhawasharqanku chaykunata ima.

²⁵Chay llajta ukhu kaj runasta presochaykullarqataj soldadosta kamachisharqa chay runasta, reypa palaciompi qanchis yanapajkuna runastawan, paykuna llajtapi qhepakusqanku, ajinallatataj waj soldadostapis, pichus soldadopaj jap'iraj chay runasta, jinallataj chay llajta ukhupi sojta chunka purikoj runastawan.

²⁶Nabuzaradanqa kay tukuyta Babilonia reypa ñaupaqenman pusarqa, chaypachaqa Ribla llajtapi kasharqa chay Hamat jallp'api.

²⁷Chaypitaj Babiloniamanta reyqa wañurachinankuta kamacherqa. Ajinatamin Judá aylloqa jallp'anmanta wijch'usqa karqa.

²⁸Nabucodonosorqa qanchis wata kamachiynimpi Judá ayllumanta kinsa waranqa iskay chunka kinsayoj runasta wijch'ucherqa.

²⁹Chunka pusajniyoj watas kamachiynimpitaj pusaj pachaj kinsa chunka iskayniyojta Jerusalenmanta runasta wijch'ucherqa.

³⁰Iskay chunka kinsayoj watas kamachiynimpitaj, Nabuzaradanqa qanchis pachaj tawa chunka phishqayojta Judá ayllumanta kajkunata wijch'ucherqa. Chay wijch'usqa runasqa tukuynimpi karqanku tawa waranqa sojta pachajniyoj runas.

³¹Judamanta rey Joaquín wijch'uchikusqanmantaña kinsa chunka qanchisniyoj watasninman chunka iskayniyoj killasninman iskay chunka phishqayoj kaj p'unchaynimpitaj rey Evil-merodac Babiloniapi kamachiyta qallarerqa. Payqa Judaj reynin Joaquinman k'acha kayninta rikucherqa, carcelmantataj orqhohimorqa.

³²Payta allimpi qhawarqa Babiloniapi paywan kasharqanku chay waj reykunamanta nisqaqa.

³³Ajinamanta Joaquemqa preso kanan p'achata lluch'ukuspa reywan khuska tukuy kausaynimpi mikhorqa.

³⁴Chantapis, tukuy kausaynimpi Joaquenqa wañupunankama Babilonia reymanta mikhunata jap'ej.