Read Quechua Bolivia DC Bible JEREMÍAS 7 Bible Online

JEREMÍAS 7 - Quechua Bolivia DC Bible bible

JEREMÍAS 7

¹Señorqa parlaspa Jeremiasman nerqa: Señorta yupaychana wasej punkunman sayaykukuy. Chaypi kay willayta parlaykuy: Judapi tukuy tiykojkuna, kay punkusnejta qankuna yaykoj kankichej Señorta yupaychaj. Kunanqa uyariychej:

³Israelpa Diosnin tukuy atiyniyoj parlamususqaykichejta. Astawan allinta kausaychej, allinkunatataj ruwaychej, noqataj kay jallp'api tiyachillasqaykichejpuni.

⁴Ama atienekuychejchu, chay ch'aukiyajkuna kay jinata nisojkunaman: Señorta yupaychana wasin kaypi kashan. Señorta yupaychana wasin kaypi kashan, nispa.

⁵Kausayniykichejtachus allinyachinkichej, ruwasqasniykichejpis cheqan kanqa, cheqan kajtataj ujkuna ujkunawan ruwankichej chayqa, manallataj ñak'arichinkichejchu waj llajtayojkunata, wajcha wawasta, warmi sapasta ima chayqa, nitaj mana juchayoj runasta kay cheqapi wañuchiwajchejchu, nillataj waj dioskunaman yupaychaykunata qowajchejchu. Chaymantaj qankuna kikiykichejpaj sajrata wajyakuwajchej.

⁷Jina kajtenqa, noqa saqellasqaykichejpuni ñaupa tatasniykichejman qorqani chay jallp'api tiyakunaykichejta.

⁸Qankunaqa qhasi manakaj palabrasnimpi atienekushankichej.

⁹Qankunaqa suwankichej, wañuchinkichej, qhenchachakunkichej, manakajmanta jurankichej, Baalkunasman inciensota q'osñichinkichej. Qankunaqa mana rejsisqa lantista yupaychankichej.

¹⁰Chaymantaraj yupaychanawaykichej wasiyman jamuwankichej ñaupaqeyman chimpamunawaykichejpaj. Creekunkichej kacharisqas kasqaykichejta, chay millay ruwaykunata, mana noqaj munasqay imasta ruwaykichejpaj.

¹¹Yuyankichejchu kay noqapaj t'aqasqa wasi kashan chay suwaspa pakakunan kasqanta? Chay tukuyta rikuni, noqa Señor chayta nini.

¹²Riychej Silopi kashan, chay yupaychana wasiyman, chayta ñaupajpi ajllarqani tiyakuna wasiy kanampaj, qhawaychej imatachus paywan ruwasqayta Israel aylluypa juchasninrayku.

¹³Jinapis kutin kutinta willarqaykichej imaynatachus purishasqaykichejmanta, qankunataj mana kasuyta munawarqankichejchu, nitaj kutichillawankichejpischu. Noqa Señor chayta nini.

¹⁴Chayrayku chay Silopi yupaychana wasiyta jina ruwasaj, kaypi noqapaj yupaychana wasi kashan, chaytarí qankunaman, jinataj ñaupa tatasniykichejman qorqani, chaypitaj atienekoj kankichej.

¹⁵Qankunata ñaupaqeymanta wijch'usqaykichej imaynatachus ñaupajpi wauqesniykichej Efraimpa munayninmanta kajkunata wijch'orqani ajinata.

¹⁶Qan, Jeremías, ama kay aylluyraykoqa mañakuwaychu, ama majakuwaychu, nitaj mañakuwaychu paykunarayku. Ama astawan k'iskimanta mañakuwaychu, imaraykuchus manapuni uyarisqaykichu.

¹⁷Manachu Judá llajtaspi, jinataj Jerusalén callespipis ruwasqasninkuta rikunki?

¹⁸Wawasqa llant'ata pallanku, tatas kajkunataj ninata jap'ichinku, warmis kajkunataj jak'u masata ñat'unku tortillata ruwanankupaj, chay cieloj reinan ninku chay diosaman jaywanankupaj. Chaywan phiñachiwankichej, jinallataj chay mana rejsisqa dioskunaman vinota jaywasqaykichejwan.

¹⁹Chaywan noqamantaqa astawan paykuna kikinkuta, mana allinninkupaj p'enqaynillankupajtaj ruwakunku. Noqa Señor chayta nini.

²⁰Chayrayku, noqa Señor cheqatapuni nini, tukuy phiñakuyniyta thallinayta kay cheqaj contranta, runakunasnimpa contrampi, jinallataj uywasnimpa contrampi, sach'asnimpa contrampi, chantá cosechasnimpa contrampipis. Chayqa nina jap'iykuchisqa mana thasnukuyta atej jina kanqa.

²¹Tukuy Atiyniyoj Señorqa Israelpa Diosnin ayllunman nin: Tukuynin uywa wañuchisqasta qoychej, jinataj ima rikuchikutachá jaywayta munankichej chaykunatapis, chay aychamantataj mikhuychej.

²²Maypachachus qankunaj ñaupa tatasniykichejta Egiptomanta orqhomorqani chaypachaqa, mana imatapis nerqanichu, nitaj kamacherqanichu uywa wañuchisqasta q'olachinamanta, nillataj uywata wañuchispa jaywanamantapis.

²³Imatachus kamacherqani chayta kasunallawankuta; jinamantataj noqa Diosniykichej kanaypaj, qankunatajrí ayllusniy kanaykichejpaj. Nillarqanitaj: Qankunachus allin munasqay ñanta rikuwajchej chayqa, allinmin qankunata risonqachej.

²⁴Chaywampis mana kasuwarqankuchu, nitaj uyariwarqankuchu, manachayqa rumi sonqo kayninkuwan apachikorqanku, sonqonkoj millay ruwayta munasqasninman jina. Noqaman kutirimunawankutaqa wasanchakuwarqanku.

²⁵Ñaupa tatasninku Egiptomanta llojsimusqankumantapacha kunankama, qankunaman kamachisniy profetasta kachamullarqaykichejpuni.

²⁶Chaywampis, qankunaqa manapuni kasuwarqankichejchu, manachayqa chay ñaupa tatasniykichejmantapis astawanraj rumi sonqos karqankichej.

²⁷Qan, Jeremías, willay kay tukuy imasta amapis kasusuchunkuchu, sinch'ita qhapariy, amapis uyarisuchunkuchu.

²⁸Niy: Kaymin chay nacionqa Señor Diosninta mana kasojqa, nitaj kasukuyta munajqa. Chay cheqan kaj ruwayqa mana kanchu, manañataj ujtawan chaymanta parlallankupischu.

²⁹Jerusalén runas, chujchasniykichejta k'utukuychej, wijch'uychejtaj. Llakiy wañuyta chay ch'in lomaspi takiychej. Señorqa may phiñasqa kashan kay runaspa contrampi. Paykunata saqerparin, qhesacharparintaj.

³⁰Señorqa nillantaj: Judamanta runasqa mana walejtachu rijch'ayniypi ruwanku: Chay millachikuna lantisninkuta noqapaj t'aqasqa chay yupaychanawanku wasiyman churarqanku, chaywantaj ch'ichicharqanku.

³¹Ben-hinom vallepi Tofetpa altarninta jataricherqanku, qhari wawasninkuta, jinataj warmi wawasninkutapis ruphachinankupaj, chayta noqa mana kamacherqanichu, nitaj yuyallarqanipischu.

³²Chayrayku noqa Señor nini: Uj p'unchay chayamonqa, maypachachus kay cheqata manaña Tofet nenqankuchu, nitaj Ben-hinom nispapis, manachayqa runa wañuchina nenqanku. Tofetpitaj wañusqasta p'ampanqanku manaña maypipis p'ampanapaj kasqanrayku.

³³Chay runaspa ayasnintaqa suwintus, sajra animales ima mikhonqanku, nitaj pipis chaykunata mancharichej kanqachu.

³⁴Judá llajtapi jinallataj Jerusalén callespipis fiestaspi tusuykunata, takiykunata, jinallataj casarakupi takiykunatapis chinkachisaj. Tukuynin jallp'ataj ch'in pampaman tukuchisqa kanqa.