Read Quechua Bolivia DC Bible LAMENTACIONES 1 Bible Online

LAMENTACIONES 1 - Quechua Bolivia DC Bible bible

LAMENTACIONES 1

¹Jerusalén llajtaqa chay chhika runayoj kashaspa ch'impacha qhepakun! Tukuy llajtasmanta chay chhika jatun llajta kashaspa viudaman jina tukun! Chay llajtaj muyuynimpi kaj suyusta kamachej llajtaqa impuestota paganan tiyan!

²Tukuy tuta, sonqo nanayta waqan; waqaynenqa uyan urayta sururishan. Mana mayqen munasqallampis sonqochaykurej kanchu; tukuy kausaqesnin wasancharqanku, enemigosninmantaj tukorqanku.

³Judá llajtapi tiyakojkunaqa karuman apachisqas karqanku; chaypeqa may ñak'arichisqas kanku, mana ruway atina kamachipitaj. Waj nacionespa chaupimpi tiyakojqa, manataj samakuyta jap'iyta atinchu. Tukuynin enemigosnenqa ujllata qhatiykuspa, uj k'ullkupi jina jap'erparerqanku.

⁴Sión llajtaj ñankunasnenqa ch'impacha llakiy, mana pipis jatun fiestanman jamoj kanchu. Llajta punkusqa tukuynin thuñisqas, ch'impachataj; chaynejta sacerdotesqa jik'un jik'unta waqarikunku; llimphu sipaskunasninkoqa manchay llakisqas kanku; Jerusalenqa phutiypa atipasqan kashan.

⁵Enemigosninkoqa kamachejkuna kanku, chay chejnejkunasninkoqa mayta qhapajyanku. Jerusalentaqa Señorpuni chay jinata llakichin, chay chhikata juchallikusqanrayku. Wawasnenqa enemigosninnejta karuman apasqas karqanku.

⁶Siompa ususimpata tukuy k'achita kaynenqa chinkaporqa; kurajkunasnenqa pastota mana tariy atej tarukas jina karqanku; qhatiykachajkunaj ñaupaqenta kalpi kalpilla ñak'ayllataña ayqekorqanku.

⁷Jerusalén runasqa enemigosninkoj makinman urmaspa, manaña pipis paykunata yanaparej kajtin, yuyarikunku llakiyninkumanta, Señorpa contranta oqharikusqankumantawan. Chantaqa yuyarikullarqankutaj ñaupajta may qhapaj kasqankumanta. Enemigosninkutaj paykunata mayta alqochakuspa asipayarqanku imaynatachus urmasqankumanta.

⁸Jerusalenqa anchatapuni juchallikorqa. Chayrayku qharqosqa karqa. Tukuy payta sumajpaj qhawajkunaqa qhesacharqanku, q'alallata rikusqankurayku. Chaynejta kunan payqa qhepaman kutirispa jik'un jik'unta waqashan.

⁹P'achanqa millay ch'ichi kashan, manataj yuyarikusqachu imaynatachus tukukunanmanta. Chayrayku payqa mana yuyasqamanta urmarparin, manataj pipis sonqochaykurej kanchu. Qhawariway ari Señor, llakiyniyta, enemigosniypis manchayta wapuykachasqankuta.

¹⁰Enemigosqa Jerusalempata k'acha imasninta jap'ikaporqanku. Jerusalén llajtaqa rikorqa Dioswan parlana wasinman mana creej runas ujllata junt'aykushajta. Chay runastaqa kamacherqanki Señor Dioswan parlana wasiykiman ama yaykunankuta.

¹¹Tukuy llajtantin waqarikuspa, mikhunata mask'akamunku. Tukuy k'acha imasninkuta mikhunallawan chhalarparinku, ajinamanta ama yarqhaywan wañunankupaj. Qhawariway, Señor, kay jina llakiypi rikhurisqayta.

¹²Qankuna, ñanta rejkuna, manachu sonqoykichejta noqamanta nanachikunkichej? Sayarispa qhawariwaychej, kay llakiyta ñak'arishani chaymanta astawan llakiy kanchus manachus chayta. Kay jinataqa Señorpuni jasut'ishawan k'ajaj phiñakuynimpi.

¹³Señorqa patamantapacha ninata kachaykamuwan, chaytaj tulluykama chayawan. Chakisniyman uj tojllata churaykuwan. Qhepaman wijch'uwan. Ch'inman sapayta saqerpariwan, chaypi nanaywan tukuy p'unchay ñak'arinaypaj.

¹⁴Señorqa juchasniyta rikuwan, chay juchasnillaywantaj yugowan jina wataykuwan. Chaytaj manchayta llasaykuwan, kallpayta tukuchinawankama. Señorqa sajra kaykunaman jaywaykuwan, noqataj manaña atipayta atinichu.

¹⁵Señorqa sumachaj kallpayoj jark'akuwaj runasniyta qhesacharparin; ashkha soldadoswantaj kachaykamuwan, kallpayoj runasniyta wañurachinankupaj. Señorqa uvastapis sarushanman jina, Judaj llimphu ususinta sarurparin.

¹⁶Chayrayku noqaqa manchayta waqarikuni; ñawisniymanta waqayqa sururishan. Mayta kusichispa sonqochawajneyqa saqerpariwan. Wawasneyqa tukuynin wañurachisqas kanku, enemigosniykutaj atipawaykupuni.

¹⁷Sión llajtaqa makisninta jaywarikamun, manataj pipis kanchu payta sonqochaykurej. Señorqa uj kamachiyta Jacobpa contranta orqhomorqa, qayllampi kaj llajtasllataj enemigosnin kanankupaj. Jerusalenqa paykunaj chaupinkupi millachikunaman tukun.

¹⁸Señorqa cheqampuni, noqarí paypa contranta oqharikorqani. Kunanqa, runakuna, tukuy qhawaychej, rikuychejtaj imaynachus nanayniy kasqanta. Llimphu sipaskunasniywan, waynakunasniywan karuman apachisqas kanku.

¹⁹Munasqasniyta qhawarikorqani, paykunataj astawan ch'aukiyawanku. Sacerdotesniywan, kurajkunasniywanqa llajta ukhupi tukukunku, kausanankupaj mikhunata mask'akuspa.

²⁰Qhawariy, Señor, llakiyniyta. Sonqoyqa phataj jinaña kashan. Sonqoyqa tijrasqa jina kashan, imaraykuchus anchatapuni contraykipi phiñakorqani. Llajta punkuspeqa espadawan wawasta wañurachinku, llajta ukhupitaj wañuy sayaykun.

²¹Waqashajta uyariwarqanku, manataj pipis sonqochaykuriwaj kanchu. Tukuy enemigosniy yachanku mana allimpi kasqayta, maytataj kusikunku qan kay jinata ñak'arichiwasqaykimanta. Paykunamampis jasut'ita apachimusaj nisqaykitaqa apachimunki, chaypachataj paykunapis noqa jina kanqanku.

²²Qampa ñaupaqeykiman chayamuchun tukuy sajra ruwasqasninku. Imaynatachus noqa contraykita juchallejtiy ruwarqanki, ajinallatataj paykunatapis ruway ari. Anchataña llakikuni. Chaynejta sonqoyqa ancha nanasqaña.