Read Quechua Bolivia DC Bible LAMENTACIONES 2 Bible Online

LAMENTACIONES 2 - Quechua Bolivia DC Bible bible

LAMENTACIONES 2

¹Chay jinapuni kasqa Señorpa phiñakuynenqa, chhika sumaj Sión llajtata laqhaykuchin. Israelitaspa k'acha kayninkuta, janaj pachamanta kay jallp'a pataman urmaykuchimun; chay jina k'ajaj phiñakuyninwan Señorqa maymanchus chakinta churanamanta mana yuyarikullampischu.

²Señorqa tukuy imata pampata ruwan mana khuyakuspa. Phiñakuyninwan Señorqa Jacobpa wawasninta wasintinta tukuyninkuta thuñirarqa. Judá llajtaj jark'achisqa perqasnintapis tukuyninta pampachan; maytapuni reyta kamachejkunatawan k'umuykachachin.

³K'ajaj phiñakuyninwan israelitaspa atiyninta chinkachin. Enemigosnin rikhurimojtinkama, payqa atiyninta wajnejman ithirichin. Payqa Jacobpa ayllumpi ninata jina phiñakuyninta jap'iykuchin, chaytaj tukuy munayninta q'olaykun.

⁴Enemigopis kanman jina Señorqa wach'inanta sumajta mat'iykurin, paña makinwantaj chayta jap'iykun enemigo jina. Chaywantaj mashkha sumaj kajtapis tukuyninta chinkarichin. Sión llajtapi ninata jina k'ajaj phiñakuyninta kachaykun.

⁵Señorqa enemigo jina tukuynin israelitasta tukuchin; palaciosta thuñiran, llajta jark'achisqa perqastapis pampata ruwan. Jinamanta k'acha Judá llajtata manchay llakiywan waqaywantaj junt'aykuchin.

⁶Uj suwa jina Señorqa wasej imasninta oqharerparerqa; maypichus tantakoj kanku chaytapis thuñirparerqa. Señorqa qonqacherqa, jinallataj Siompi samakuna p'unchaytapis chinkacherqa. Chay jina phiñakuyninwan reyta, chanta sacerdotestapis qhesacharqa.

⁷Señorqa altarninta qhesachan, jinallataj parlana wasintapis. Llajtaj muyuynimpi jark'achisqa perqastapis enemigosman saqerparerqa. Enemigostaj Señorpa wasimpi manchayta kusiywan qheparqacharinku fiesta p'unchaypi jina.

⁸Señorqa nerqa k'acha Sión llajtaj perqasnin urmachisqa kananta, ajinata wakicherqa, iskayrayaspataj thuñinankama pararqa. Jawa perqantinta, ukhu perqantinta ujllapi pampaman urmachin.

⁹Punku wisq'anasninkoqa pampaman wijch'usqas karqanku. Aldabasninkupis p'akirasqas karqanku. Reyninkuwan kurajkunasninkuwanqa maypichus kamachiykunas mana kanchu, chaykunaj chaupinkupi kashanku. Profetasninkupis Diosmanta mosqoypi jina manaña imatapis astawan rikuyta aterqankuchu.

¹⁰Sionmanta kurajkunaqa ch'inmanta pampapi tiyarakunku, umasninkuman jallp'awan qhallarakuspa, qhashqa p'achas churaykusqas. Jerusalempi llimphu kaj sipaskunaspis pampakama k'umuykorqanku.

¹¹Ñawisniypis waqasqaypi sinch'itaña sayk'un, ch'unchulasniypis kayman jaqayman kuyurinku. Sonqoyqa llakiywan phatashanña, aylluypa llajtanta chay jina thuñisqata rikuspa; astawanqa wawasta, ñuñoj wawastawan yarqhaywan callespi wañurashajta rikuspa.

¹²Wawasqa mamasninkuman nej kanku: Maytaj t'antawan vinowanri? Llajta callespi maynejpipis ch'anqasqa jina wijch'usqasña kanku; mamankoj arphimpi ñak'ayllataña samaqeshanku.

¹³Chaymantaqa pi rikojtataj pusamusqaykiri? Jerusalempa ususin, pimantaj rijch'achisqaykiri? Siompa llimphu ususin, pimantaj rijch'achisqayki qanta sonqochasunaypajri? Qampa llakiyniykeqa mar qocha jina may jatumpuni. Pitaj kunanqa thañichisonqari?

¹⁴Profetasniykeqa mana kaj qhasi imasta willasunku; juchasniykitaqa mana rikhurichinkuchu, chaypacha reparachisojteyqa mana karuman wijch'usqachu kawaj karqa. Manachayqa llullallata willasunku, qhasi manakajta creechispa.

¹⁵Ñanta tukuy rejkunaqa qanmanta asiykukuspa, makisninkuta t'ajllarakamunku. Silbamuspa, umasninkuta khiwirispataj Jerusalén llajtamanta ninku: Kaymin chay chhika sumaj mentasqanku llajtaqa, tukuyta kay pachapi kusichejqa, nispa.

¹⁶Tukuy enemigosniyki qampajqa rimanku. Paykunaqa alqochakuspa, kirusninkuta k'arurakuspataj ninku: Kaytaqa chinkachinachej; noqanchejqa kaytapuni suyasharqanchej. Kayqa kunanqa, rikunchejña, nispa.

¹⁷Señorpuni kaytaqa ruwan imatachus nisqanman jina. Señorqa junt'an palabrasninta, unaymantapacha kamachisqasninta. Payqa chinkacherqa manataj perdonanchu, enemigosniyki qanmanta asikojtin qhawallarqa. Enemigosniykej atiyninta astawan jatunyacherqa.

¹⁸Señorpa yanapayninta mañakuy. Sumaj Sión llajta, uj yaku wayq'o jina waqayniykita tuta p'unchay jich'ay ari. Mana samarispa, nitaj sayk'uspa waqallaypuni ari.

¹⁹Sayarikuspa tukuy ch'isi qhaparikuy ari. Paran paranta Señorpa ñaupaqempi waqarikuy ari. Makisniykita oqharikuspa Señormanta mañakuy ari, calle yaykunaspi mikhunamanta jina wawasniyki ama wañupunankupaj.

²⁰Pitachus kay jinata ruwasqaykitaqa khuyariy ari Señor. Kay warmisqa wijsankumanta llojsisqa wawasninkuta mikhullanqankuchu, chay juch'uy wawasninkuta ima? Dioswan parlana cheqapi sacerdoteswan, profetaswanqa wañurachisqaschu kanqanku?

²¹Kaynejpi jaqaynejpi wijch'u wijch'ulla espadawan wañuchisqas kashanku, wawas, machu runas, sipaskuna, wayna runas ima. K'ajaj phiñakuyniyki p'unchaypi wañuracherqanki, ñak'ararqankitaj mana khuyakuspa.

²²Tukuynejmanta imastachus manchachikunayta tantaykamunki uj jatun p'unchaypi jina. Señorpa k'ajaj phiñakuynin p'unchaypeqa mana ujllapis ayqenmanchu, nitaj kausashajpis qhepakunmanchu. Imastachus uywaspa sayachisqasniyta wañuracherqa.