Read Quechua Bolivia DC Bible BARUC 1 Bible Online

BARUC 1 - Quechua Bolivia DC Bible bible

BARUC 1

¹Kay librota qelqarqa Neriaspa wawan Baruc. Neriasqa Maasiaspa wawan karqa. Maasiastaj Sedequiaspa wawan. Sedequiastaj Hasadiaspa wawan. Hasadiasrí Hilciaspa wawan.

²Barucqa kay librota qelqarqa Babiloniapi phishqa kaj watapi, phishqa kaj killapitaj, qanchis kaj diapi, caldeos jap'ikapusqankumanta Jerusalén llajtata larwachispa.

³Baruc kay librota leerqa Joacimpa wawan Jeconiaspa ñaupaqempi. Joacenqa chaypacha Judamanta rey karqa. Reywan khuska ashkha runaspis tantakusqanku uyarej.

⁴Kurajkunapis uyarisqanku. Chantaqa, reypa ayllusnin, machu runas, tukuy laya runaspis. Tukuypuni uyarisqanku, tukuy Babiloniapi tiyakojkuna Sud mayoj chimpampi.

⁵Uyarispataj, runas waqarqanku. Mana ni imata mikhuspataj, Diosmanta mañukusharqanku.

⁶Chaymanta, qolqeta tantamorqanku, sapa uj qoyta atisqanman jina.

⁷Chay qolqetaqa Jerusalenman apachimorqanku, kuraj sacerdote Joacinman. Chay sacerdoteqa Hilciaspa wawan karqa. Jatun tatantaj Salom karqa. Ajinallataj, apachimorqa waj sacerdotesmampis, Jerusalempi qhepakojkunamampis.

⁸Chay qolqeta kachamorqanku Siván killapi, chunka kaj diapi, maypachachus Barucman qosqanku temploj imasninta, Judá jallp'aman kutiripunankupaj. Judamanta rey, Josiaspa wawan Sedequías chay imasta ruwachisqa qolqemanta.

⁹Chay reyqa chayta ruwachisqa maypachachus Nabucodonosor, Babiloniamanta rey, qharqosqa rey Jeconiasta Jerusalenmanta, pusachisqataj Babiloniaman, kamachejkunasnintinta, kurajkunasnintinta, ashkha runasnintinta ima.

¹⁰Chay qolqeta apacherqanku kayta nichimuspa: Kay qolqeta apachimuyku, chaywan rikuchikusta jaywanaykichejpaj, ajinallataj ñak'anaykichejpaj juchasrayku, inciensota q'osñichinaykichejpajtaj. Rikuchikusta wakichiychej Señor Diosninchejpa altarnin patapi.

¹¹Babiloniamanta rey Nabucodonosorpaj Diosmanta mañakuychej, ajinallataj wawan Baltasarpajpis, kay pachapi kausanankupaj wiñayta.

¹²Señorninchej kallpachawasqayku k'anchaynintataj qowasqayku, rey Nabucodonosor, Baltasar wawampis qhawanawaykupaj. Chantapis, atinaykupaj paykunata sirviyta unayta, ajinamanta allinta qhawanawaykupaj.

¹³Mañapuwaykutaj Señor Diosninchejmanta noqaykupaj, paypaj contrampi juchallikusqaykurayku. Chayraykumá, kunankama Señorqa mana karuncharqachu noqaykumanta k'ajaj phiñakuyninta.

¹⁴Templopi tantakushajtiykichej Ramadas nisqa fiestapajqa, waj diaspis, kay kachamusqayku librota leeychejpuni. Chantaqa, juchasniykichejta willakuychej.

¹⁵Willakuspataj niychej kay jinata: Señor Diosninchej cheqanyachin, noqanchejtaj p'enqayniyoj uyasninchejta k'umuykuchinanchej tiyan, imaynachus rikushanchej kunan diapis ajinata ruwasqankuta Judamanta runas, Jerusalempi tiyakojkunapis.

¹⁶Ajinallataj, reyesninchejpis, sacerdotesninchejpis, profetasninchejpis, tatasninchej ima.

¹⁷Noqanchejqa Diospa ñaupaqempi juchallikorqanchej.

¹⁸Noqanchejqa payta mana kasukorqanchejchu. Mana junt'arqanchejchu imatachus ruwananchejta nerqa chaykunata.

¹⁹Chay kutimantapacha, maypachachus Señorqa orqhorqa ñaupa tatasninchejta Egiptomanta kunankama, mana kasukorqanchejchu Señor Diosninchejta. Manapuni munarqanchejchu paypa nisqanta uyarikuyta.

²⁰Chayrayku, chay jina chhika llakiykuna jamuwarqanchej. Chayraykullataj kashanchej chay maldición urapi mayqentachus Diosninchej nerqa Moisesta ninanta llojsichishajtin Egiptomanta ñaupa tatasninchejta, qonawanchejpaj chay jallp'ata, lechetawan misk'itawan p'utuchimoj chayta.

²¹Nitaj uyarikorqanchejchu imatachus Diosninchej willachimuwarqanchej profetasnejta.

²²Sapa uj ruwallarqa imatachus sonqon nisharqa chayta, sajra kajta. K'umuykukorqanchej ajeno dioskunaman. Ruwarqanchejtaj imachus mana allin Diospa ñaupaqempi chayta.