Read Quechua Bolivia DC Bible BARUC 2 Bible Online

BARUC 2 - Quechua Bolivia DC Bible bible

BARUC 2

¹Ajinamanta, Señorqa junt'arqa imatachus nerqa noqanchejwan ruwananta chayta. Junt'arqa imatachus ruwanan karqa Israelta kamachejkunawan, reyesninchejwan, Israelpitaj Judapitaj tiyakojkunawan ima.

²Mayllapipis mana ni jayk'aj pasarqachu ni imapis rijch'akojqa chay ruwasqanman Jerusalenwan, Moisespa leynimpi qelqasqanman jina.

³Mikhorqanchej qhari wawasninchejpa warmi wawasninchejpatawan aychankuta.

⁴Señorqa nerqa israelitas urmanankuta muyuyninkupi kaj nacionespa makisninkuman. Nerqataj qhesachasqas kanankuta. Nillarqataj Israel jallp'a ch'in pampaman tukunanta tukuy naciones ukhupi maypichus Israel aylluta ch'eqerarqa.

⁵Señor Diosninchejpa contrampi juchallikusqanchejrayku, mana payta kasuspa, waj nacionespa urampi kakushanchej, mana patapichu.

⁶Señor Diosninchejqa cheqanyachin. Noqanchejrí, pampaman k'umuykukunanchej tiyan, imaynachus ñaupa tatasninchej ruwarqanku, ajinata.

⁷Tukuy laya llakiy, Señorpa nisqanman jina, patanchejman urmaykuwanchej.

⁸Mana mañarikorqanchejchu Diosmanta mañakuspa yanaparinawanchejta payman kutirinanchejpaj saqespa imachus mana allin sonqonchejpi chayta.

⁹Chayrayku Señorqa tukuy chay llakiykunata chayachimuwarqanchej, imaraykuchus payqa cheqantapuni niwarqanchej imatachus ruwananchejta.

¹⁰Noqanchejrí mana kasukorqanchejchu kamachiwasqanchejta nitaj junt'arqanchejchu imatachus ruwananchejta.

¹¹Kunanqa, Señor, Israelpa Diosnin, qanqa llojsicherqanki aylluykita Egiptomanta jatun atiyniykita rikuchispa, t'ukuna milagrosta ruwaspa, rejsichispataj sutiykita kunankama.

¹²Señor Diosniyku, juchallikuyku, mana cheqanchu kayku, nitaj justiciata ruwaykuchu, tukuy kamachikunasniykita mana casuykuchu.

¹³Phiñakuyniykita karunchay noqaykumanta. Pisilla kayku nacionespi maypichus qan noqaykuta ch'eqerachiwarqayku chaypi.

¹⁴Uyariy, Señor, mañakusqaykuta. Sutiykirayku, llakiyniykumanta kacharichiwayku. Pikunachus kayman pusamuwarqayku, k'acha sonqowan qhawawachuyku.

¹⁵Ajinamanta, tukuy runas yachanqanku qanqa Señor Diosniyku kasqaykita. Yachanqankutaj Israel ayllu wawasnimpis sutiykiwan sutichasqas kasqankuta.

¹⁶Qhawawayku, Señor, santo cheqamantapacha, maypichus tiyakunki chaymanta. Yuyarikuy noqaykumanta. Ningriykita qayllachimuy, uyariwaykutaj.

¹⁷Kichariy ñawisniykita, rikuwaykutaj. Señor, wañusqasqa, pejkunajpata ayasninku p'ampasqasña kashanku, mana yupaychasunkuñachu nitaj kusirikunkuñachu cheqanyachej kasqaykimanta.

¹⁸Señor, yupaychasonqa llakisqa sonqoyoj runa, pichus k'umpusqataj mana kallpayojtaj purin, pichus yarqhaywan mana rikuytapis atinchu.

¹⁹Señor Diosniyku, mana profetaspa ruwasqasninkuraykuchu nitaj reyespa ruwasqasninkuraykuchu kay mañakusqaykuta qanman chayachishayku.

²⁰Qanqa llakichiwarqayku jatun phiñakuyniykiwan, imaynatachus willacherqankiña santo profetasniykinejta, nispa: Kayta nichimun Señorqa: Ama ni imata nispa Babiloniamanta reyta sirviychej. Ajinata ruwaspa, kakullankichej chay jallp'api ñaupa tatasniykichejman qorqani chaypi.

²²Ichapis mana munankichejchu kasuyta kay kamachisqayta, Babiloniamanta reyta sirvinaykichejta.

²³Chayta ruwankichej chayqa, nitaj Jerusalén llajtapi, nitaj waj Judá llajtaspipis runasqa atenqankuchu kusikuywan takirikuyta. Ni casamientospipis atenqankuchu takirikuyta. Chaypacha, llajtaykichej ch'in pampaman tukonqa, mana runasniyoj jallp'aman.

²⁴Noqaykurí mana kasukorqaykuchu chay kamachiwasqaykuta: Babiloniamanta reyta sirviychej, nispa. Qanrí junt'arqanki imatachus kamachis niyki profetasnejta willarqankiña chayta. Qan nerqankeqa reyesniykoj tullusninku, ñaupa tatasniykoj tullusninkutaj sepulturasmanta orqosqas kanankuta.

²⁵Chayrayku, kunanqa q'ala wijch'urasqas kashanku pampapi, p'unchaypeqa ruphaypi, tutapitaj chiripi. Paykunaqa may sinch'i llakiywan wañorqanku, yarqhayrayku, maqanakusrayku, onqoyrayku ima.

²⁶Kay wasipis, sutiykiwan sutichasqa chay, kay jina raqayman tukuchinki Israelpa sajra kayninrayku, Judáj sajra kayninraykutaj.

²⁷Jina kajtimpis, Señor Diosniyku, qan qhawawarqayku k'acha sonqowan khuyakuywantaj.

²⁸Chayta willarqankiña kamachiyki Moisesnejta, maypachachus nerqanki qampa leyniykita qelqananta israelitaspa ñaupaqenkupi, kay jinata nispa:

²⁹Mana kasuwankichej chayqa, kay jina runasniyoj aylluykichej, pisi runasniyoj aylluman tukonqa, chay naciones ukhupi, maypichus noqa ch'eqerachisqaykichej chaypi.

³⁰Yachani ari mana kasunawaykichejta, rumi sonqo kasqaykichejrayku. Qharqosqas kajtiykichejrí, chaypachaña unanchankichej.

³¹Chaypacha, yachankichej noqa Señor Diosniykichej kasqayta. Noqaqa yuyayniyoj runasman tukuchisqaykichej, ningritataj qosqaykichej uyarinaykichejpaj.

³²Maypichus tiyakunkichej, yupaychawankichej, yuyarikunkichejtaj noqamanta.

³³Qankunaqa, rumi sonqo kayniykichejta saqerparinkichej, noqaman kutirinkichejtaj wist'u puriyniykichejmanta, yuyarikuspa imachus pasasqanmanta ñaupa tatasniykichejman, pikunachus contraypi juchallikorqanku.

³⁴Chantaqa, llajtaykichejman kutirinaykichejta nisaj. Chay jallp'ataqa juramentowan nerqani qonayta Abrahamman, Isaacman, Jacobmampis, ñaupa tatasniykichejman. Ajina, watejmanta chay jallp'aqa qankunajta kanqa. Paykunawan ruwasaj mana tukukoj tratota. Noqaqa paykunaj Diosnin kasaj, paykunataj noqaj aylluy kanqanku. Manaña wijch'usajchu Israel aylluyta paykunaman qorqani chay jallp'amanta.