Read Quechua Bolivia DC Bible BARUC 3 Bible Online

BARUC 3 - Quechua Bolivia DC Bible bible

BARUC 3

¹Tukuy Atiyniyoj Señor, Israelpa Diosnin, qhapariyki llakisqa sonqoywan, pampaman k'umuykusqa.

²Uyariwayku, Señor, khuyakuwaykutaj. Noqaykoqa ñaupaqeykipi juchallikorqayku.

³Qanqa wiñaypaj tiyanaykipi tiyakunki. Noqaykurí wañuy patapipuni kashayku.

⁴Tukuy Atiyniyoj Señor, Israelpa Diosnin, uyariy mañakususqankuta israelitas, wañuy patapiña kajkuna. Noqayku chay israelitaspa wawasninku kayku. Paykunaqa contraykipi juchallikorqanku, mana kasususpa, qanta Señor Diosninkuta. Chayrayku, kay llakiy k'askaykuwayku.

⁵Ama yuyarikuychu ñaupa tatasniykoj juchasninkumanta. Kunanqa yuyarikuy atiyniykimanta sutiykimantataj.

⁶Arí, qan kanki Señor Diosniyku. Noqaykoqa qanta yupaychayta munayku, Señor.

⁷Munayniykirayku sonqosniyku qanman k'askasqaspuni kashanku, Señor, qanman qhaparikunaykupaj. Kunan, karu llajtapi kashaspa, qanta yupaychayku. Sonqosniykupi mana kanñachu ñaupa tatasniykoj juchanku, contraykipi juchallikorqanku chaykunajta.

⁸Kashaykuraj kay karu llajtapi, maypichus qan ch'eqerachiwarqayku chaypi. Qhesachasqas kayku. Maldicisqas kayku. Ñaupa tatasniykoj juchasninkumanta castigasqas kayku. Paykunaqa qanmanta karunchakorqanku. Señor Diosniyku.

⁹Uyariy, Israel, imatachus nisqayki kausanaykipaj. Sonqoykiwan uyariy, yachayniyoj kayman chayanaykipaj.

¹⁰Israel, imaraykutaj enemigo naciompi kashankiri? Imaraykutaj ajeno llajtapi machuyashankiri?

¹¹Imarayku ch'ichichakushanki ayas qayllapi, wañuyman rejkunawan khuska?

¹²Noqa nisqayki: Chayta ruwarqanki yachay juturimanta karunchakusqaykirayku.

¹³Jap'iwajchus ñanta, Señor rikuchisorqa chayta, wiñaypaj sonqo tiyasqa kausakuwaj.

¹⁴Kunan, yachay ari maypichus yachay, maypichus kallpa. Yachallaytaj maypichus kashan unanchakuy. Chayta yachaspa yachanki maypichus mana tukukoj kausay, yachallankitaj maypichus kashan ñawispaj k'anchay, sonqo tiyasqa kaytaj.

¹⁵Maypitaj chay yachayta tariwajri? Imaynamantataj waqaychananman yaykuwajri?

¹⁶Maypitaj kashanku nacionesta kamachejkuna? Maypitaj kashanku fiero animalkunata atipajkunari?

¹⁷Maypi kashanku cielo p'isqoswan phujllajkunari? Chantaqa, maypitaj kashanku qolqetawan qoritawan tantakamojkuna, runas munakunku chaykunata? Maypitaj kashankuri chay runas pikunachus manapuni sayk'ojchu kanku qolqetawan qoritawan tantasqankumanta?

¹⁸Maypitaj kashankuri qolqe imasta ruwajkuna, mana kashankuña chaykunamanta?

¹⁹Chinkankupacha. Wañuy ukhuman yaykorqanku. Cuentankumanta waj runas rikhurimunku.

²⁰Paykunamanta aswan waynas jamunku kausankutaj kay pachapi. Chaykunapis mana rejsinkuchu yachayman pusaj ñanta.

²¹Paykuna mana yacharqankuchu mayninta chayayta yachaymanqa. Wawasninkupis yachaymantaqa mana dakorqankuchu. Chayrayku, yachayman pusaj ñanmanta karupi qhepakorqanku.

²²Canaampi yachaymanta mana parlayta uyarerqankuchu. Temampipis yachayta mana rikorqankuchu.

²³Yachayman pusaj ñanta, chantapis chay ñanman pusaj cheqanchanasta, mana rikorqankuchu Agarpa wawasnin, kay pachapi unanchakuyta mask'ajkuna. Ajinallataj, nitaj rikorqankupischu Madián llajtayoj qhatukojkuna. Temá llajtayoj qhatukojkuna ima. Chaymantataj, mana rejserqankuchu willanasta ruwajkunapis, unanchakojkunapis.

²⁴Israel, may jatunmin Diospa wasin, maypichus tiyakun chay cheqapis.

²⁵Diospa wasenqa jatun, mana lindesniyojchu. Manataj yachakunchu maypichus tukukun.

²⁶Chaymanta kanku chay jatuchaj ñaupa runas, maqanakupi wapu wapus.

²⁷Mana chaykunatachus Dios ajllakorqa yachayman pusaj ñanta rikuchinampaj.

²⁸Paykunaqa wañunku mana umayoj kasqankurayku. T'ojpikusqankurayku wañunku.

²⁹Pitaj janaj pachaman wicharerqari yachayta jap'ej? Pitaj yachaytaqa phuyusmanta uraykuchimorqari?

³⁰Pitaj jatun qochanta rerqari taripaj? Pitaj atinman yachayta apamuyta qoriwan cambiaspa?

³¹Mana ni pi rikunchu yachayman pusaj ñantaqa. Mana ni pi yuyanchu mayninta ripun yachayman.

³²Tukuy imata yachajqa yachayta rejsin. Payqa unanchakuyninwan jap'iykorqa. Payqa ari kay pachata wakicherqa wiñaypaj, chayman animalkunata churaspa.

³³Sichus pay ninman: K'anchay kachun, nispa, k'anchayqa rikhurimun. Sichus pay, k'anchaytaqa: Jamuy, nispa ninman, k'anchayqa kasukunman.

³⁴Qoyllurkuna lliphipinku jark'anasninkupi kusikuywan.

³⁵Pay, jamuychej, niytawanqa, paykuna: Kaypi kashayku, nispa ninku. Ajina, kusikuywan lliphipinku ruwaj Diospaj.

³⁶Chaymin Diosninchej. Mana waj dioskuna paywan ninakunkumanchu.

³⁷Payqa tarerqa tukuy yachayman pusaj ñankunata. Payqa yachayta qorqa kamachin Jacobman, munakusqan Israel ayllumampis.

³⁸Chaymantataj, yachay rikhurimorqa kay pachapi, kausarqataj runas ukhupi.