Read Quechua Bolivia DC Bible BARUC 4 Bible Online

BARUC 4 - Quechua Bolivia DC Bible bible

BARUC 4

¹Kikin yachayqa waqaychan imatachus Dios runasman kamacherqa ruwanankupaj, chay Diospa leyninta, wiñaypaj sayashan chayta. Yachayta waqaychajkuna kausayman chayanqanku. Qhesachajkunarí, wañonqanku.

²Kutiriy, Jacob, yachaytaqa jap'iy makisniyki kicharisqa. K'anchayman puriy paypa p'unchaynimpi.

³Ama wajman qoychu k'anchayniykitaqa, ama wajman qoychu, nitaj truecaychu.

⁴Israel, may kusikuyniyoj kanchej, imaraykuchus yachanchej imachus allin Diospa ñaupaqempi, chayta.

⁵Kallpachakuy, ayllúy. Qanqa waqaychanki Israelpa sutinta.

⁶Qanqa nacionesman vendesqa karqanki. Jinapis, mana chinkachisqachu kanki. Enemigosniykej makisninman entregasqa karqanki, Diosta phiñachisqaykirayku.

⁷Qanqa runasta ruwaj Diosta phiñacherqanki rikuchikusta jaywaspa mana Diosmanchu, manachayqa supaykunaman.

⁸Qonqaporqanki wiñay kausayniyoj Diosmanta, qanta ruwasorqa chaymanta. Chayta ruwaspa, llakicherqankitaj Jerusalén llajtata, ñuñuchisorqa chay mamaykita.

⁹Ajllasqa llajta rikorqa imaynatchus phiñakuy pataykichejman urmarqa. Nerqataj kay jinata: Uyariychej, Jerusalén qayllapi kaj llajtas. Diosqa jatun nanayta apachimuwan.

¹⁰Rikuni imaynamantataj wiñay Diosqa pusacherqa presochasqasta qhari wawasniyta, warmi wawasniyta ima.

¹¹Noqaqa mikhuchej kani jatun kusikuywan. Chantaqa, llakikuspataj, waqaspataj ripusqankuta rikuni.

¹²Ama ni pipis kusikuchunchu warmi sapata rikuwaspa, yachaspataj wawasniyta qhechuwasqankuta. Ch'impacha kani wawasniypa juchasninkurayku, Diospa leyninmanta karunchakusqankurayku.

¹³Paykunaqa mana kasorqankuchu Diospa kamachisqanta. Paykunaqa mana kausarqankuchu Diospa kamachisqanman jina, manataj paywan pusachikorqankuchu cheqan ñanninta.

¹⁴Jamuychej qayllapi kaj llajtas. Qhawaychej imaynatachus wiñay Diosqa presochasqasta apacherqa qhari wawasniyta warmi wawasniytataj.

¹⁵Payqa karumantapacha apachimorqa contrankupi mana sonqoyoj runasta, waj parlayniyoj runasta, machu runasta mana respetajkunata, wawasta mana ima khuyakojkunata.

¹⁶Noqa qonqasqa warmi sapamanta, qhechuwarqa munasqa qhari wawasniyta, warmi wawasniytapis.

¹⁷Noqarí, imaynamantataj yanapaykichejman, wawasníy?

¹⁸Diospuni, chay llakiykunata apachimusorqachej chaymin, enemigosniykichejmanta kacharichisonqachej.

¹⁹Siguiychej, wawasníy, jap'illaychej chay ñanniykichejta. Noqaqa qhesachasqa qhepakusaj.

²⁰Noqaqa kusikuy p'achasniyta lluch'ukorqani. Qhashqa p'achata churakorqani Diosmanta mañakunaypaj. Wiñay Diosman qhaparisaj kausashajtiyraj.

²¹Kallpachakuychej, wawasníy, Diosmantataj mañakuychej yanapasunaykichejta. Paymin sarusqa kasqaykichejmanta kacharichisonqachej, contrasniykichejpa makisninkumantapis.

²²Noqaqa suyashani wiñay Dios salvasunaykichejta. Santo Señor, wiñay Dios kusichiwarqa niwaspa khuyakunanta qankunamanta.

²³Noqaqa, llakikuspa waqaspataj paykunata rikuni ripushajtinku. Jinapis, Diosqa paykunataqa kutichipuwanqa mana tukukoj kusikuywan.

²⁴Kunanqa, qayllanchejpi kay llajtasmanta runas presochasqasta rikushanku llojsejta. Pisi tiempomantawan rikonqanku imaynatachus wiñay Dios paykunata kacharichenqa k'anchayninwan lliphipiyninwan ima.

²⁵Wawasníy, pacienciawan jap'ikuychej Diosninchejmanta jamoj chay nanayta. Contrasniykichej qhepaykichejpi purerqanku. Usqhayllata rikunkichej imaynatachus paykunaqa chinkachisqas kanqanku. Qankunaqa chakisniykichejta kunkanku pataman churankichej.

²⁶Munakusqa wawasneyqa fiero ñanta jap'erqanku. Enemigosninku pusakaporqanku imaynatachus phiña animales ovejasta apakapunku ajinata.

²⁷Sonqochakuychej, wawasníy, Diospa yanapayninta mañakuychej. Paymin kayta kachamusojqa, yuyarikusunkichej.

²⁸Qankunaqa munarqankichejpuni Diosmanta karunchakuyta. Kunanqa, payman kutiriychej. Tukuy sonqowampuni payta mask'aychej.

²⁹Paymin, kay llakiyta kachamusojqa mana tukukuy kusiyta qopullasonqachejtaj salvacionta qosuspa.

³⁰Sonqochakuy, Jerusalén, Diosqa sutinta qosojqa, sonqochasonqa.

³¹Llakichisojkuna waqanqanku. Urmachisqa kasqaykimanta kusikojkunaqa waqanqanku.

³²Wawasniykita presochajkuna llajtasqa waqallanqankutaj. Chay llajtapis, maymanchus wawasniyki pusasqas karqanku, waqallanqataj.

³³Chay llajtaqa urmasqaykimanta kusikorqa. T'unarparichisqa kasqaykimanta asirikorqa. Jamoj diaspi phutikonqa mana runasniyojña qhepakusqanmanta.

³⁴Diosqa qhechuponqa chay chhika runasta, chay llajta kusirichejkuna chaykunata. Wapu kaynintaj nanayman tukonqa.

³⁵Wiñay Dios ashkha diasta chay llajtataqa ruphaykuchenqa. Unayta supaykunalla chay llajtapis tiyakonqanku.

³⁶Jerusalén llajta, inti llojsimuy ladota qhaway. Rikunkitaj Dios kachamusunki chay kusikuyta.

³⁷Qhaway. Jamushankuña chay wawasniyki, ripojta rikorqanki chaykuna. Inti llojsimuy ladomantawan, inti yaykuy ladomantawan jamushanku.