Read Quechua Bolivia DC Bible BARUC 6 Bible Online

BARUC 6 - Quechua Bolivia DC Bible bible

BARUC 6

¹Qankunaqa Diospa contranta juchallikorqankichej. Chayrayku Babilonia rey Nabucodonosorqa qankunata presochasqasta llajtanman apasonqachej.

²Qankuna Babilonia llajtapi unayta kausanaykichej tiyan. Qanchis runa mitas chaypi kausankichej. Chaymantataj noqaqa allin kaypi orqhosqaykichej.

³Babiloniapi rikunkichej qolqe dioskunata, qori dioskunata, k'ullu dioskunatawan. Chaykunataqa runas lijrasninkupi apaykachanku. Chay dioskunaqa Diospi mana creejkunata mancharichinku.

⁴Pajtataj! Ama chay runas jinachu kaychej. Ama manchachikuychejchu chay dioskunamantaqa.

⁵Chay dioskunata rikojtiykichej adorajkunaj runas ukhupi, sonqoykichejpi ninkichej: Qanllata, Diosniyku, yupaychanayku tiyan!

⁶Angelniy qankunawan khuska kanqa. Paymin qhawasonqachej.

⁷Chay lantisqa qoriwantaj qolqewantaj qhatasqas kashanku. Runalla ruwarqa lantej qallunta. Simimpis qhasillamanta. Mana parlarikuyta atinchu.

⁸Runasqa qorimanta ruwanku pillusta chay lantispa umasninkuman churanankupaj, sipaskunapis kankuman jina, pikunachus k'achanchakuyta munajpuni kanku.

⁹Sacerdotesqa suwakoj kanku chay qorita chay qolqeta ima, qhapajchakunankupaj. Qollajtaj kanku khuskanta juchachakoj warmisman, templospi tiyakunku chaykunaman.

¹⁰Runasqa p'achasta churaykunku chay qori dioskunaman, qolqe dioskunaman, k'ullu dioskunaman, runaspis kankuman jina. Jinapis, chay dioskunaqa ismullanku, thutawan mikhuchikuspa.

¹¹Puka p'achaswan p'achallichisqas kajtinkupis, jallp'aqa patankupi sayallan. Uyasninkuta llimphuyachinapuni.

¹²Ujnin tojnuyoj kashan, llajtapi kamachej jina. Pillapis phiñachejtintaj, payqa chay runataqa mana wañuchiyta atinchu.

¹³Ujnintaj jap'ishan espadatawan hachatawan. Jinapis, maqanakupi mana sayanmanchu, nitaj suwa runas jamojtinkupis.

¹⁴Chaypi yachakun manapuni dioskunachu kasqankuta. Chayrayku, amapuni manchachikuychejchu chaykunamanta.

¹⁵Chay dioskunaqa, templospi sayashajkuna, p'akisqa k'analla jina kanku, mana ni imapaj sirvejkuna.

¹⁶Runasqa templosman yaykuspa jallp'ata oqharinku. Chay jallp'aqa dioskunaj ñawisninkuman k'askakun.

¹⁷Pillapis reypa contranta juchallikojtin, chay runataqa allinta wisq'anku wañuchisqa kanankama. Kikillantataj sacerdotesqa sumajta wisq'anku templo punkusta aldabaswan trancaswan ima, ama suwas yaykunankupaj dioskunata apakapoj.

¹⁸Sacerdotesqa dioskunaman lamparasta k'anchachinku, paykuna necesitasqankumanta astawanraj. Dioskunarí chay lamparastaqa mana rikuytapis atinkuchu.

¹⁹Chay dioskunaqa rijch'akunku templo k'ullusman. Chay k'ullusqa ukhumpi ismusqas kashanku. Pampamanta llojsinku khurusqa mikhurankutaj lantista p'achasninkutawan. Chay dioskunarí mana cuentata qokunkupischu.

²⁰Chay dioskunaj uyasninkoqa yana yanaslla kashanku q'osñirayku.

²¹Ch'iñispis patankupi sayarinku. Jinallataj, tukuy laya p'isqos, misispis.

²²Chaynejta rikuyta atinkichej qankunaqa, chaykuna cheqamanta mana dioskunachu kasqankuta. Chayrayku ari, ama chaykunamanta manchachikuychejchu.

²³Qoriwan k'achanchasqas kashanku aswan k'achitus kanankupaj. Chaywampis, sichus runasqa mana khitunkumanchu chay qoritaqa, chay dioskunaqa manapuni atinkumanchu lliphirichiyta. Chay dioskunaqa mana ni imata sienterqankuchu runaswan ruwachikushajtinku.

²⁴Runasqa anchata pagarqanku chay dioskunamanta. Jina kajtimpis, chay lantisqa mana kausayniyojchu kanku.

²⁵Cheqamanta mana chakisniyojchu kanku. Chayrayku runasqa wantupi apananku tiyan chay lantistaqa. Ajinata, rikuchinku mana kallpayoj kasqankuta. Chay dioskunata yupaychajkunapis p'enqakuchunku.

²⁶Chaymantataj pampaman urmajtinkoqa, manapuni atinkuchu paykunallamanta sayarikuyta. Chantapis, sichus pillapis sayarichinman, maymanta puriyta atinkumanri! Chantaqa, jaywanasta chakisninkuman churanku wañusqasman jina.

²⁷Chay rikuchikustaqa mikhunku onqoy warmis killayoj warmispis. Tukuy kaynejta yachankichejña manapuni dioskunachu kasqankuta. Chayraykoqa, amapuni manchachikuychejchu.

²⁸

²⁹Chantaqa, imaraykutaj dioskuna kasqankuta ninkichejri? Warmisqa jaywanasta apanku chay qori dioskunaman, qolqe dioskunaman, k'ullu dioskunaman ima.

³⁰Sacrdotespis tiyarikushanku chay dioskunaj templosninkupi. Chay sacerdotesqa rikhurinku llik'isqa p'achasniyoj, ruthusqas, mana sunkhayoj, q'ala umas.

³¹Chaymantataj, chay sacerdotesqa qhaparinku dioskunaj ñaupaqenkupi, imaynatachus runas qhaparinku pillapis wañupojtin ajinata.

³²Sacerdotesqa lluch'unku lantispa p'achasninkuta. Chay p'achaswantaj p'achallichinku warmisninkuta wawasninkutataj. Chantaqa, ima sumaj kajtapis ruwajtiykichej lantismanqa, lantisqa manapuni atinkuchu t'inkata qoyta. Manataj atinkupischu pillatapis jasut'iyta.

³³Manataj atinkuchu mayqen runatapis reyman tukuchiyta. Nitaj mayqen reytapis tiyananmanta urmachiyta atillankutajchu. Manapuni atinkumanchu qhapajyachiyta. Ni phisullatapis qonkumanchu.

³⁴Sichus uj runa promesata ruwanman, mana junt'ajtin, ni phiñakunkupischu.

³⁵Manataj atinkuchu runata kacharichiyta wañuymanta. Nitaj atinkumanchu mana kallpayojta jark'ayta atiyniyojpa makisninmanta.

³⁶Mana kutichinkuchu ñawita mana rikojman. Manataj llojsichinkuchu ni pitapis wajcha kaymanta.

³⁷Mana khuyakuyta atinkumanchu warmi sapamanta. Manataj yanapankumanchu wajcha wawasta.

³⁸Chay dioskunaqa, k'ullumanta, rumimanta, qorimanta, qolqemanta ruwasqas, orqo rumisman rijch'akunku. Chaykunata sirvejkuna p'enqaypi rikhurinku.

³⁹Imaynatataj ari pillapis ninman dioskuna kasqankutari?

⁴⁰Kikin caldeospis chay dioskunamanta asirikunku maypachachus rikuspa uj opata pusanku Belpaman parlarichinampaj. Atinchu uyarikuyta chay lanti?

⁴¹Chay runasqa manapuni umayojchu kanku. Mana unanchakuyta yachankuchu. Unanchakuspaqa saqerparinkuman karqa chay lantisninkuta.

⁴²Warmisqa watuta watakunku wijsasninkuman. Tiyakunkutaj callespi afrechota q'osñichej, inciensopis kanman jina.

⁴³Sichus chay warmismanta ujnin ripun uj qhariwan, warmi masinta trataykun mana paypis qhariwan ripusqanmanta, watunta mana t'ipichikusqanmantataj.

⁴⁴Tukuy ima ruwasqanku chay lantispaj ch'aukiyaylla. Imaynamantataj ari pillapis yuyanman ninmantaj dioskuna kasqankuta?

⁴⁵Chay lantistaqa runaslla ruwarqanku k'ullumantachus qolqemantachus. Imaynamantachus runa ruwayta munarqa, ajina llojsin makisninmanta.

⁴⁶Chay lantista ruwajkuna runasqa mana unaytachu kausanku. Imaynamantataj dioskuna kankuman chay runaspa ruwasqasninkuri?

⁴⁷Chay runasqa wawasninkuman saqenku chay llullakuyta, chay p'enqayta.

⁴⁸Maypachachus ima ch'ajwachus ima llakiychus jamun, chay sacerdotesqa mask'ashankuña riyta lantisninkuwan khuska pakakoj.

⁴⁹Imaraykutaj mana atinkuchu piensayta mana dioskunachu kasqankuta chay mana librakuyta atejkuna ch'ajwasmanta, chay mana jark'akuyta atejkuna llakiykunamanta?

⁵⁰Tukuy ayllus, tukuy reyespis uj kuti yachanqanku chay dioskunaqa qhasi dioskunalla kasqankuta, k'ullulla, qorilla, qolqella. Chaykunataqa runaslla ruwarqanku makisninkuwan. Manapuni Dios jina atiyniyojchu kanku.

⁵¹Kunanqa, imaynamantataj yachakunman mana dioskunachu chaykuna, manachayqa runaj ruwasqasnillan? Imaynamantataj yachakunman mana ni imata Dios jina ruwayta yachasqankuta?

⁵²Chay dioskunaqa manapuni churayta atinkumanchu uj reyta mayllapipis. Manataj runaspaj parachinkumanchu.

⁵³Manapuni atinkumanchu phiñanakuspi cheqanyachiyta. Nitaj jark'ankumanchu mana juchayojta wapu runaj makinmanta. Chaykunaqa mana ni imata ruwayta yachankupunichu. Rijch'akunku wayrapi phawaj p'isqosman.

⁵⁴Ruphakunman chayqa uj templo maypichus kashanku chay k'ullu lantis, qoriwan k'achanchasqas, sacerdotesqa qhajpacha ayqenku salvakoj. Chay dioskunarí, k'ulluslla kasqankurayku mana kuyurinkuchu, larwankutaj.

⁵⁵Chay lantisqa mana jark'akunkumanchu mayqen reymantapis, mayqen enemigosmantapis.

⁵⁶Jina kajtenqa, imaynamantataj runas yuyankuri dioskuna kasqankuta.

⁵⁷Chay k'ullu dioskuna, qoriwantaj qolqewantaj k'achanchasqas nitaj atinkumanchu ayqeyta suwasmanta. Suwasqa temploman yaykunku, qhechunkutaj lantismanta qorita, qolqeta, p'achasta ima, ripullankutaj. Chay dioskunarí kakullanku mana ni imata ruwayta atispa.

⁵⁸Chayrayku, aswan sumaj chay dioskunamanta uj kallpayoj rey. Chantapis, aswan sumajtaj kanku chay k'anallaspis wasispi kashanku chaykuna. Dueñoqa chaykunawanqa imallatapis munasqanta ruwallan. Aswan sumajtaj ima punkullapis, imaraykuchus chay punkoqa jark'an ukhupi kajta. Jinallataj aswan sumajpuni uj madera pilar, wasi chaupipi sayashaj, chay qhasi dioskunamanta nisqaqa.

⁵⁹Intipis killapis, qoyllurkunapis lliphipinku. Chaykunaqa runasta yanapanku, Diosta kasukuspa.

⁶⁰Chantapis, lliuj lliuj rikhurimojtin, rikukullan. Chantapis, wayra tukuynejpi phukullampuni.

⁶¹Phuyuspis, Dios nejtin tukuy ladoman kachaykukunankuta, kasukunku. Chantaqa, ninapis Dios nejtin ruphaykuchinanta orqosta sach'astapis, chayta ruwallan.

⁶²Kay dioskunarí manapuni rijch'akunkumanchu chay nisqanchejman, nitaj k'acha kaypi nitaj atiypi.

⁶³Chayrayku manapuni yuyanachu nitaj ninachu dioskuna kasqankuta. Manapuni atiyniyojchu kanku, manataj cheqanyachiyta atinkuchu, manataj ni ima sumaj kajta ruwankumanchu runaspaj.

⁶⁴Yachaspaña mana dioskunachu kasqankuta, ama chaykunamanta manchachikunkichejchu.

⁶⁵Chay dioskunaqa mana atinkuchu nitaj maldiciyta nitaj bendiciyta reykunata.

⁶⁶Nitaj runasman rikuchinkumanchu t'ukunasta cielopi. Mana lliphipinkuchu inti jina, nitaj k'anchankuchu killa jina.

⁶⁷Uywaspis astawan valenku chay dioskunamantaqa. Uywasqa atinku ayqeyta pakakuytapis. Munasqankuta ruwallanku sapitanku.

⁶⁸Chay lantisqa manapuni dioskunachu. Ama ari manchachikuychejchu.

⁶⁹Imaynatachus p'isqo manchachi mana allintachu qhawan poqoykunata, ajinallatataj mana ni imapaj sirvinkuchu chay dioskuna, k'ullumanta, qorimanta, qolqemanta ruwasqas.

⁷⁰Rijch'akunku khishkasman, maypichus p'isqos sayanku, chaykunaman. Rijch'akullankutaj laqhapi churasqa ayaman.

⁷¹Chantapis, yachallankichejtaj mana dioskunachu kasqankuta rikuspa imaynatachus patankupi llik'iranku k'acha p'achasninku. Kikin chay lantispis ismullankutaj. Tukuynejpi runas chay lantismanta asirikonqanku.

⁷²Cheqan sonqoyoj runaqa, mana lantista yupaychajqa mana ni jayk'aj asipayachikonqachu.