Read Quechua Bolivia DC Bible DANIEL Gr 1 Bible Online

DANIEL Gr 1 - Quechua Bolivia DC Bible bible

DANIEL Gr 1

²⁴Sadracwan, Mesacwan, Abed-negowan ima purisharqanku nina chaupipi, takispa, yupaychaspataj Señor Diosta.

²⁵Azariasqa, nina chaupipi kashaspa, Diosmanta mañakuyta qallarerqa nispa: Yupaychayki, Señor, ñaupa tatasniykoj Diosnin. Qantapuni yupaychanayku tiyan. Sutiyki jatunchasqa kachun wiñaypaj.

²⁷Qanqa, cheqan sonqoykiman jina, tukuy imata allinta ruwapuwarqayku. Tukuy imata cheqanta ruwaj kanki. Simiyki ujlla. Cheqan yachispa mana pantajchu kanki.

²⁸Qanqa cheqanta ruwarqanki kachamuspa kay jina nanayta noqaykuman, jinallataj ñaupa tatasniykoj ajllasqa llajtankumampis. Tukuy chaykunataqa kachamuwarqayku cheqanta, juchasniykuman jina.

²⁹Juchallikuspataj, mana ruwaspataj kamachikusqasniykita, noqaykoqa qanmanta karunchakorqayku. Tukuy imapipuni juchata tarerqayku. Kamachisqasniykita mana kasorqaykuchu.

³⁰Qanqa niwarqayku chayta junt'anaykuta kusisqas kanaykupaj. Noqaykurí manapuni junt'araykuchu niwasqaykutaqa.

³¹Chayrayku, juchasniykuman jinapuni kachamuwarqayku llakiytaqa.

³²Qanqa churawarqayku sajra enemigosniykoj makisninkuman. Chay runasqa mana Diosniyojchu kanku. Leykunata mana rejsinkupischu. Qanqa jaywawarqayku sajra reyman, tukuy reyesmanta aswan rumi sonqoyojman.

³³Kunanqa, ni simisniykutapis kichariyta atiykuñachu. Qanta munakojkuna, qanta sirvejkuna p'enqaywan qhatasqas kashanku.

³⁴Sutiykirayku, ama saqerpariwaykuchu. Ama tukuchiychu noqaykuwan ruwarqanki chay tratota.

³⁵Amataj noqaykumanta karunchachiychu khuyakuyniykitaqa. Kayta mañakuyku Abraham kausaqeykirayku, Isaac kamachiykirayku, ajllakusqayki Israelraykutaj.

³⁶Qanqa paykunaman nerqanki mirayninku kananta qoyllurkuna jina yupa, ajinallataj qocha t'iyu jina yupa.

³⁷Kunanqa, Señor, aylluyku aswan juch'uysitu tukuy ayllusmanta. Juchasniykurayku pampaman k'umuykuchisqas kayku tukuynejpi.

³⁸Mana kapuwaykuñachu nitaj rey, nitaj profeta, nitaj kamachejpis. Mana jaywaykuñachu rikuchikusta, manataj q'osñichiykuchu inciensotapis. Mana kapuwaykuchu ni uj cheqallapis mishkha poqoyniykuta jaywasunaykupaj, khuyakuyniykita tarinaykupajpis.

³⁹Jinapis, ichas kunanqa llamp'u sonqo rikhurimususpa, pampaman k'umuykuchisqas aswan allin ñawiyoj qhawawasqayku, qayllaykamusqaykumanta oveja kankawan, waka kankawan, waranqa wira ovejaswampis.

⁴⁰Kay kunan jaywasqaykoqa allin rikhurichun ñaupaqeykipi. Yachayku ari noqaykoqa jap'ikusqaykitapuni imallatapis qanman sonqonta jaywakojqa.

⁴¹Kunanqa tukuy sonqo thaskiyta munayku qhepaykipi. Qanta yupaychayku. Munayniykitataj junt'ayta munayku.

⁴²Ama k'umuykuchisqasta qhepachiwaykuchu. Cheqan sonqoykiman jina qhawawayku khuyakoj kasqaykimanta yuyarikuspa.

⁴³Jatun atiyniykiwan kacharichiwayku enemigosniykumanta. Tukuyman rikuchiy sutiyki jatumpuni kasqanta.

⁴⁴Kamachisniykita llakichejkuna p'enqaypi rikhurimuchunku, pampaman k'umuykuchisqas kachunkutaj. Atiyninkuta qhechuykuy. Kallpankutataj llauch'iyachiy.

⁴⁵Tukuy runas yachachunku qanlla Señor kasqaykita, qanlla Dios, qanlla gloriayoj tukuy kay pachapi.

⁴⁶Chay runas pikunachus reyta kasukuspa wijch'usqanku waynasta ninaman, enqhallajpuni kanku wijch'umuspa aceiteta, alquitranta, thanta p'achasta, k'aspista ima.

⁴⁷Nina larway oqharikoj pataman, horno ukhumanta aysakuspa iskay chunka iskayniyoj metro astawan.

⁴⁸Ninaqa llojsimuspa ruphaykucherqa caldeosta hornonejpi kasharqanku chaykunata.

⁴⁹Señorpa angelnintaj hornoman uraykamorqa kanampaj Azariaswan hermanosninwan ima. Uraykamuspataj, angelqa hornomanta ninaqa karuncharqa.

⁵⁰Ajinamanta, horno ukhupeqa wayra chirilla karqa. Ninaqa manapuni paykunata llankhaykorqapischu, mana nanacherqachu, mana ni imatataj nerqachu.

⁵¹Chaypacha kinsantinku, horno ukhupi kashaspa, uj similla takiyta qallarerqanku Diosta yupaychaspa kay jinata:

⁵²Qanta yupaychayku, ñaupa tatasniykoj Señor Diosnin. Yupaychasqapuni kanayki tiyan wiñaypaj. Lliphipej santo sutiyki yupaychasqallataj. Yupaychasqapuni kanan tiyan wiñaypaj.

⁵³Yupaychasqa kanki lliphipej santo temploykipi. Chaypi yupaychasqapuni kanayki tiyan wiñaypaj.

⁵⁴Yupaychasqa kanki, rey tiyanapi tiyakojqa. Yupaychasqapuni kanayki tiyan wiñaypaj.

⁵⁵Yupaychasqa kanki, querubín chaupipi tiyakojqa. Qanqa ñawiykiwan ukhukamapis rikullanki. Yupaychasqapuni kanayki tiyan wiñaypaj.

⁵⁶Yupaychasqa kanki janaj pacha patapi. Yupaychasqapuni kanayki tiyan wiñaypaj.

⁵⁷Señorpa ruwasqasnin, Señorta yupaychaychej. Paypaj takipuychej wiñaypaj.

⁵⁸Señorpa angelesnin, Señorta upaychaychej. Paypaj takipuychej wiñaypaj.

⁵⁹Janaj pacha, Señorta yupaychay. Paypaj takipuy wiñaypaj.

⁶⁰Janaj pachapi kaj yaku, Señorta yupaychay. Paypaj takipuy wiñaypaj.

⁶¹Tukuy qoyllurkunapis, Señorta yupaychaychej. Paypaj takipuychej wiñaypaj.

⁶²Intipis killapis, Señorta upaychaychej. Paypaj tukipuychej wiñaypaj.

⁶³Janaj pacha qoyllurkuna. Señorta yupaychaychej. Paypaj takipuychej wiñaypaj.

⁶⁴Parapis chhullapis, Señorta yupaychaychej. Paypaj takipuychej wiñaypaj.

⁶⁵Tukuy laya wayraspis, Señorta yupaychaychej. Paypaj takipuychej wiñaypaj.

⁶⁶Ninapis ruphaypis, Señorta yupaychaychej. Paypaj takipuychej wiñaypaj.

⁶⁷Chiripis ruphaypis, Señorta yupaychaychej. Paypaj takipuychej wiñaypaj.

⁶⁸Chhullapis chhullunkapis, Señorta yupaychaychej. Paypaj takipuychej wiñaypaj.

⁶⁹Qhasapis chiripis, Señorta yupaychaychej. Paypaj takipuychej wiñaypaj.

⁷⁰Qhasapis rit'ipis, Señorta yupaychaychej. Paypaj takipuychej wiñaypaj.

⁷¹P'unchaypis tutapis, Señorta yupaychaychej. Paypaj takipuychej wiñaypaj.

⁷²K'anchaypi laqhapis, Señorta yupaychaychej. Paypaj takipuychej wiñaypaj.

⁷³Lliuj lliujpis phuyuspis, Señorta yupaychaychej. Paypaj takipuychej wiñaypaj.

⁷⁴Kay pacha, Señorta yupaychay. Paypaj takipuy wiñaypaj.

⁷⁵Orqospis lomaspis, Señorta yupaychaychej. Paypaj takipuychej wiñaypaj.

⁷⁶Tukuy ima jallp'api wiñajqa, Señorta yupaychaychej. Paypaj takipuychej wiñaypaj.

⁷⁷Juturispis, Señorta yupaychaychej. Paypaj takipuychej wiñaypaj.

⁷⁸Qochaspis mayuspis, Señorta yupaychaychej. Paypej takipuychej wiñaypaj.

⁷⁹Challwaspis, tukuy yakupi kausakojkunapis, Señorta yupaychaychej. Paypaj takipuychej wiñaypaj.

⁸⁰Tukuy p'isqospis, Señorta yupaychaychej. Paypaj takipuychej wiñaypaj.

⁸¹Tukuy uywaspis, tukuy monte animalkunapis, Señorta yupaychaychej. Paypaj takipuychej wiñaypaj.

⁸²Runaspis, Señorta yupaychaychej. Paypaj takipuychej wiñaypaj.

⁸³Israel ayllu, Señorta yupaychay. Paypaj takipuy wiñaypaj.

⁸⁴Señorpa sacerdotesnin, Señorta yupaychaychej. Paypaj takipuychej wiñaypaj.

⁸⁵Señorpa kamachisnin, Señorta yupaychaychej. Paypaj takipuychej wiñaypaj.

⁸⁶Cheqan sonqoyoj runas, Señorta yupaychaychej. Paypaj takipuychej wiñaypaj.

⁸⁷Santo runaspis, llamp'u sonqoyojkunapis, Señorta yupaychaychej. Paypaj takipuychej wiñaypaj.

⁸⁸Ananías, Azarías, Misael, Señorta yupaychaychej. Paypaj takipuna wiñaypaj, imaraykuchus payqa sepulturaman yaykunanchejmanta jark'awarqanchej, wañuymanta librawanchej, enqhasqa hornomanta kacharichiwarqanchej, larwaj hornomanta salvawarqanchej.

⁸⁹Señorta agradecekuychej sumaj sonqo kasqanrayku, munakuynintaj wiñaypaj kasqanrayku.

⁹⁰Señorman k'umuykukojkuna, tukuyniykichej payta yupaychaychej. Paypaj takipuychej. Agradecekuychej, munakuynin wiñaypaj kasqanrayku.