Read Quechua Bolivia DC Bible SUSANA 1 Bible Online

SUSANA 1 - Quechua Bolivia DC Bible bible

SUSANA 1

¹Babiloniapi tiyakoj uj runa Joaquín sutiyoj.

²Paypa warmin karqa Hilciaspa ususin Susana. Susana k'acha uya karqa, Señortaj yupaychakoj.

³Tata maman cheqan sonqoyoj runas karqanku, yachachisqankutaj kausakunanta Moisespa leyninman jina.

⁴Joaquín may qhapaj runa karqa. Wasimpa chimpampi kapusqa uj huerta ashkha sach'ayoj. Sumaj rejsisqa runa kasqanrayku, judiosqa tantakoj kasqanku wasi punkumpi.

⁵Chay wata, chay llajtapi tiyakoj iskay machu runasqa, juecespaj ajllasqas kasqanku. Chay machu runasqa chay layamanta karqanku, pikunamantachus Señor nerqa: Millay kausay rikhurimun Babiloniapi machu runasnejta juecesnejta ima, mayqenkunachus jawallamanta runasta cheqan ñanman pusanku.

⁶Kay iskay machu runasqa sapa kuti rej kanku Joaquimpa wasinman. Cheqanyachikuyta munajkunapis paykunajpaman rej kanku.

⁷Chaupi p'unchayta, runas ripusqankumantaña, Susanaqa puriykachakoj kasqa qosampa huertampi.

⁸Chay iskay machu runastaj sapa día rikoj kasqanku Susanata puriykachakojta. Rikuspataj, mana allin yuyay sonqosninkuman yaykusqa.

⁹Millayta yuyaspataj Diosmanta qonqapusqankuña. Manataj yuyarikusqankuchu cheqan puriymanta.

¹⁰Iskayninku payta munapayashasqanku, manataj ni imata paykunapura ninakusqankuchu.

¹¹P'enqachikushasqanku munayninkuta willakuyta.

¹²Sapa día suyaj kasqanku ima kutitachus payta rikuyta atinkuman.

¹³Uj kuteqa ujnin nisqa ujninman: Ripunallaña. Mikhuna horañaqa, nispa. Chantaqa, sapa uj ripusqa wasinman.

¹⁴Chaymantataj, iskayninku kutirimusqanku, tinkukusqankutaj kikimpi. Tapunakusqankutaj imajtinchus kutirimusqankuta. Chaypacha, willakusqankuña sajra yuyayninkuta. Chaymantataj, uj yuyaylla suyashasqanku tariyta Susanata sapallanta.

¹⁵Uj kuti, suyashajtinku chay iskay machu runas, Susana rikhurimusqa huertapi iskay sipaskunallawan khuska. Chaypacha, Susanaqa munasqa yakuman yaykuyta mayllakoj, ancha ruphay kasqanrayku.

¹⁶Mana ni pi chaypi kasqachu, manachayqa chay iskay machu runaslla wateqaspa.

¹⁷Susanaqa nisqa, sipaskunaman: Apampuwaychej aceitetawan perfumestawan. Chantá, huerta punkuta wisq'ankichej. Bañakusaj, nispa.

¹⁸Chay sipaskunataj ajinata ruwasqanku. Huerta punkuta wisq'aykuspataj uj ladopi kaj punkunta llojsisqanku apamoj Susana mañakusqan chayta. Manataj rikusqankuchu machu runasta, pakayllapi kasqankurayku.

¹⁹Sipaskuna ripusqankumantataj iskay machu runasqa usqhayta chimpasqanku Susanaman.

²⁰Nisqankutaj: Huerta punku wisq'asqa. Mana ni pi rikuyta atiwasunchejchu. Noqaykoqa qanta munapayashayku. Ch'inllamanta entregakuy noqaykuman, nispa.

²¹Nisqankutaj: Mana munanki chayqa, noqaykoqa juramentowan nisqayku kacharisqaykita warmi kamachisniykita, uj waynawan tinkunaykirayku.

²²Susanataj: Imanasajtaj kunanqa?, nisqa waqaspa. Negakuyman chayqa, wañuyman pusawankichej. Ch'inlla kakuyman chayqa, manapuni makisniykichejmanta ayqesajchu.

²³Jinapis, aswan walej noqapajqa mana juchayoj kay, Señorpa ñaupaqempi, makisniykichejman urmajtiypis, nispa nisqa.

²⁴Chantaqa, Susana tukuy kallpanwan qhaparisqa. Machu runaspis qhaparillasqankutaj.

²⁵Ujninkutaj correspa huerta punkuta kicharisqa.

²⁶Uyarispa qhaparisqankuta huertapi, wasi ukhupi kashajkuna correspa yaykusqanku k'uchu punkunta yachaj imachus pasasqanta.

²⁷Uyarispataj machu runaspa willakusqankuta p'enqakusqanku. Mana ni jayk'aj uyarisqankuchu ari chay jinata parlayta Susanamanta.

²⁸Q'ayantin masa tantakamusqa Joaquimpa wasimpi. Iskay machu runastaj presentakamusqanku munaspapuni Susanata wañuyman kachaykuyta. Ajinataj, tukuy runaspa ñaupaqempi nerqanku: Kayman pusamuychej Hiliciaspa ususin Susanata, Joaquimpa warminta, nispa. Runastaj risqanku Susanata wajyamoj.

²⁹

³⁰Payqa rikhurimun tata mamanwan, wawasninwan ayllusninwantaj.

³¹Susanaqa delicadita karqa, k'acha uyataj.

³²Uyan qhatasqa rikhurimusqanrayku, chay sajra runasqa nerqanku velonta qechukunanta, k'acha kayninta rikuyta atinankupaj.

³³Tukuy ayllusnin tukuy amigosnimpis, tukuy chayta rikusharqanku chaykunapis, waqasharqanku.

³⁴Chaymantataj, chay iskay machu runasqa, runa chaupipi sayaspa makisninkuta churaykorqanku Susanaj umanman.

³⁵Paytaj waqaspa, pataman qhawarqa, sonqon Señorpi churasqa kasqanrayku.

³⁶Machu runastaj nerqanku: Noqaykoqa huertapi purikusharqayku. Purikushajtiyku rikhurimun kay warmi iskay sipaskunawan. Chantaqa, kay warmeqa sipaskunata nerqa wisq'anankuta punkuta. Nerqataj wisq'aytawantaj ripunankuta.

³⁷Chay kikimpacha payman chimpaykorqa uj wayna, pichus chaykama pakayllapi kakusqa. Iskayninkutaj juchallerqanku.

³⁸Noqaykoqa uj huerta k'uchupi kasharqayku. Chay millayta rikuspataj correrqayku paykunaman.

³⁹Iskayninkuta rikorqayku, manapis aterqaykuchu jap'iyta waynata, aswan kallpayoj kasqanrayku noqaykumantaqa. Punkuta kicharispataj ayqerqa chay waynaqa.

⁴⁰Chantaqa warmillata jap'erqayku, taporqaykutaj chay waynamanta pichus kasqanta.

⁴¹Payrí mana munarqachu willakuyta. Tukuy kaytaqa niyku testigos jina. Runastaj creerqanku chay nisqankuta. Machu runas juecestaj karqanku ari. Ajinamanta, tukuy nerqanku Susana wañuchisqa kananta.

⁴²Chantaqa Susana tukuy kallpanwan qhaparerqa kay jinata: Wiñay Dios. Qanqa pakasqa kajta rikullanki. Qanqa tukuy imata yachanki mana pasashajtinraj.

⁴³Qan yachanki kay runasqa llullakuspa parlasqankuta noqapaj. Rikuway wañuyman rishajta mana ni imata ruwajtiypis kay sajra runas niwasqankumanta.

⁴⁴Señortaj uyarerqa Susanaj mañakusqanta.

⁴⁵Pusashajtinkutaj Susanata wañuchisqa kanampaj, Señorqa rikhurichimorqa espíritu santota uj waynaj sonqompi. Chay waynaj sutenqa Daniel.

⁴⁶Danieltaj tukuy kallpanwan kay jinata qhaparerqa: Noqaqa mana munanichu kay warmi wauchisqa kananta, nispa.

⁴⁷Tukuy runastaj kutirispa payta taporqanku: Imata nishankiri?, nispa.

⁴⁸Paytaj chaupinkupi sayaspa nerqa: Umaykichejta chinkachinkichejchu, israelitas? Imajtin mana as allinta tapuspalla, mana ni ima sut'i kajtillan kay warmita wañuyman pusashankichejri?, nispa.

⁴⁹Juzgadoman kutimuychej. Chay runasqa falsota parlarqanku kay warmej contrampi.

⁵⁰Chantaqa tukuy runas usqhayllata juzgadoman kutimporqanku. Waj machu runastaj Danielman nerqanku: Jamuy. Noqaykuwan khuska tiyakunki. Diosninchej machu runaj yachayninta qosorqa.

⁵¹Danieltaj nerqa: Chay iskayninkutaqa churamuwaychej ujninta kay ladoman, ujnintataj jaqay ladoman. Noqaqa sapa ujta tapurisaj.

⁵²T'aqasqas kasqankumantaña, Danielqa ujninta wajyaspa payta nerqa: Watasniykiwan tantaqa, sajra kajpis mirasqa, Kunanqa pataykiman urmanqa ñaupa juchasniyki.

⁵³Justiciata ruwaj kanki falsota. Mana juchayojta juchachaj kanki. Juchayojtataj kacharichej kanki. Qonqapusqanki Señorpa nisqanmanta: Mana juchayojta cheqan sonqoyojtataj ama wañuyman pusankichu, nispa.

⁵⁴Kunanqa, sichus cheqamanta rikunkipuni paykunata, niway ima sach'a urapichus kasharqanku paykunaqa. Machu runataj kutichikorqa: Uj castaña sach'a urapi.

⁵⁵Danieltaj nerqa: Llullakuspa parlanki. Chay llullakusqaykeqa chinkayman apasonqa. Castaña sach'a urapichu rikorqanki paykunata? Diosqa ordenta qorqaña angelninman iskayman khuchusunanta.

⁵⁶Chaymanta Danielqa nerqa pusakapunankuta chay machu runata, pusamunankutataj chay ujta. Chayajtintaj nerqa: Qanqa Canaanmantachá kanki, mana Judamantachu. K'acha uya warmita munapayarqanki. Sajra yuyay sonqoykiman yaykorqa.

⁵⁷Chayta qankunaqa ruwaj kankichej Israel warmiswan. Paykunataj, manchachikusqankurayku mana quejakojchu kanku. Kay Judá ayllumanta warmirí manapuni munarqachu ch'inlla kakuyta.

⁵⁸Kunanqa niway ima sach'a urapichus rikorqanki paykunata. Payrí kutichikorqa: Uj encina sach'a urapi, nispa.

⁵⁹Danieltaj nerqa: Llullakusqaykeqa pataykiman jamusonqa. Cheqachu encina sach'a urapi rikorqanki paykunata? Diospa angelnenqa espadanta jap'ishanña wajtasunampaj, iskayman lajrasqa kanaykipaj. Ajina iskayniykichej wañunkichej!

⁶⁰Chantaqa, tukuy runas tantaykukuspa, qhaparispa Diosta yupaycharqanku. Payqa llakiymanta kacharichin paypi sonqonkuta churajkunata.

⁶¹Chaymantataj, imaraykuchus Danielqa sut'ita rikhuricherqa kikin simisninkunejta llullakusqankuta, tukuyninku chay iskay machu runasta jap'ispa wañucherqanku, imaynatachus paykuna munasharqanku Susanata wañuchiyta, ajinata.

⁶²Moisespa leyninman jina wañucherqanku paykunata. Ajinamanta ari, chay kuti mana juchayojqa wañuymanta librasqa karqa.

⁶³Hilciaspis, warmimpis Diosman graciasta qorqanku Susana wawankumanta. Kikillantataj, Susanaj qosan Joaquimpis, graciasta qorqa Diosman. Chantaqa, tukuy ayllusnimpis, mana ni ima p'enqay paypi kasqanmanta.

⁶⁴Chay kutimantapacha Danielqa may munasqa karqa llajtampi.